إحنا و الحياة

إحنا و الحياة

بوحيلى بسرك

و سرك فى بير

و قولى الهُوَيـﱢـن

و قولى الخطير

دا قلبى يساعك

دا مخزن كبير

و ليه الحداشر

ما بين العنين

و وشك مغيم

و باين حزين

مش إحنا اللى كنا

بنملا الزمان

ببسمة بتلمع

و نكتة بتلسع

و إشراق منوّر

و ضحكة جنان

و نجرى و نلعب

كإن الدنيا لينا

فى بهجة و أمان

و حب ف إيدينا

و كان الشفايف

بتنطق نغم

و ناسية الألم

شوية صَـبا

و حبة حجاز

و ترقص قلوبنا

حقيقى بترقص

ما هواش مجاز

لا ماضى هاممنا

و بكره متاعنا

ما حدش يلومنا

ما حدش سامعنا

و مهما ادلهمت

نطنش ، نغمض

و شاريين دماغنا

و كنا بنرجا

دخول المغيب

قلوبنا بترعش

و فايضة وجيب

دا وقت الغباشة

لقاء الحبيب

و رجع البلابل

و صوت عندليب

و ليه النهارده

بقى رمز تانى

و له معنى تانى

و له طعم تانى

خلاف الشروق

بداية الحياة

نقيض الغروب

و ليه النهارده

نسينا الهزار

نخاف م النهار

و يرعب قلوبنا

دخول المسا

قوليلى بصراحة

بلاش بسبسة

تغـيّرنا إحنا

و اللا الزمان ؟

و اللا الحياة

قسيت علينا

و اللا السبب

جوانـّا ، فينا ؟

الدنيا هيّـه

لساها هيه

و الشمس طالعة

دهبى و بهية

و النخلة لسه

طارحة بلحها

و الأرض برضه

خيرها و سماحها

للى عايزها

و اللى يغيّر

من خلق ربه

شاهرة سلاحها

خللينى أسأل

تانى يا بيضة

من غير مشاغبة

و لا أى زيطة

العيب دا منا

جوانا إحنا

و اللا الحياة ؟

نستنى بكره

يمكن تكون .

فيه الحياة

أحلى و أحلى

و نعيد شبابنا

روح مش جسد

أما الجسد

رايح لحاله

و الروح دى عايشة

فى كل حالة

بعد الحياة

ف خلود للأبد

18 أكتوبر 2010

معايدة

معايدة

أجمل معايدة من أجمل صديقة

إحساس رهيّف ، ألفاظ رقيقة

كان نفسى أشوفك و لو دقيقة

لكين الدنيا و ده حالها

جافة و جافية ماهش رفيقة

لحظة تأمل

لحظة تأمل

قعدت أقلب فى دفاتر عمرى ...

إيه كل ده ؟ .. يا خبر !!!

قدمت إيه باعتبارك بشر ؟

كمثل البعوضه من الخيرات ،

أما الشرور فبركان ثار و انفجر

صفحاتها بتقوللى :

حاسب على مهلك :

قربت ع الصفحة الأخيرة

جملة مكتوبة بخط يقراه اللى جاى بعدك :

تمت بحمد الله ، و انطوت صفحاتك ، بعدها تهلك

انتهى فى الحياة عملك ، انتهى بؤسك و انقضى سعدك

بعديها يمصمصوا شفايفهم و ينصرفوا من عندك

ما يبقى لك سوى عملك و دعوات طيبة من ولدك

و خير فى يوم عملته و وجه المولى كان قصدك

فى عيد ميلادى

14 أكتوبر 2010

اهمد

اهمد

لو كنت أعرف إن الجواز بالشكل ده حلو و لذيذ

و لا كان كلام الناس يهمنى و لا نأورة و لا تأويز

وكنت رحت اتجوزت لى دستة

أخلطهم بحبة عسل على لبن و آخد كل يوم لهطة

الأولى تفطرنى عسل و التانية تزغطنى كما البطة

لكن أخاف مراتى الطيبة تغضب فأزعل تجينى فى النافوخ جلطة

أو حتى تتهور فتنزل على دماغى ضرب بالبلطة

دا كيد النسا حراق كما فلفل على شطة

و الغلطة معاهم حتكون لك فى عمرك هيه آخر غلطة

ما تهمد يا عجوز و بلاش شقاوة ،

ما تكمش فى الزوايا : كما الأرنب أو القطة

25 سبتمبر 2010

الصيام فى رجب

الصيام فى رجب

أقول له تعالى يمين يقول لى يا أخى لأ

أقول طيب شمال يقول لى يا أخى لأ

طيب نغرب و الا نشرق ، برضه يا أخى لأ

خلانى حطيت إيديا يا أخى فى الشق

لا عاجبه شئ فى الحياة ، إنسان عجيب أخر عجب

حتى الصيام ما بيعجبوش لو إنه كان فى رجب

الغضب باين فى وشه ، مقدور عليه و انكتب

قلت له لو إنى أشوف بسمه فى وشك :

أديك تلاتة جنيه دهب

29 سبتمبر 2010

يا نهاق أبيض

الأوله هاق ، و التانية هاق

و التالتة مش كل من نهق له تنهيقة تقول لى دا يبقى حمار

دا نهيقنا يا سيد صبا على سيكا على حجازى كار

النهقة تطلع من القلب معزوفة بالنوتة على الجيتار

بيسرقوامنها المقامات

يغنوها مطربيكو اللى عاملينلى كبار

و هيه أصلا نهقتين من هنا على حبة نعيرمن هناك

لا كلام و لا نغم

و الصوت أنا عارفه طبيعى بما إني يا آدمى حمار

29 سبتمبر 2010