تأملات باكية

أجيال بتيجى

أجيال بتمضى

و اهو كله ماشى

و اللى بيبصم

و اللى يوقع

يا دوب حضور

و اللى بيلبس

و اللى بيخلع

و اللى بياكل

و اللى يجوع

و اللى بيخلع

و لا حد يبقى

و لا غيره شئ

واحد أحد

فردٌ صمد

الكل يفنى

هوه اللى باقى

سبحانه وحده

هوه الإله

و لا شئ سواه

و اللى تراب

راجع إليه

روح م السما

تدخل فى برزخ

دنيانا فانية

الدهر فيها

يمضى فى ثانية

فين جدو آدم

مِنْ بعده عالم

فين سِيْدنا نوح

أجيال كتيرة

تيجى ، تروح

و الدنيا واقفة

تحكى ، تبوح

عن سر فيها

كامن فى كلمة :

مافيهاش خلود

و لا فى الوجود

يُنفخ فى صور

الكل ينهض

يمْضى حضور

الملك لك

وحدك يا رب

الأمر لك

وحدك يا رب

النهى لك

وحدك يا رب

الرحمة منك

رحمن رحيم

فتاح عليم

و لطيف بعبدك

و العفو عندك

23/10/2011

ســــر

ســــر

سر م الأسرار حقولهولك ، كنت خبيته

بادور على قلبى فى صدرى فى مطرح ما كنت حطيته

بين الحنايا بادور و بابحث كتير، أنا مالْقيته

لو إنه جالك و هام حواليكى بالذمة قوليله

يرجع ينور و ينبض فى رحاب بيته

دا اللى يفوت داره يقل ف قيمته و مقداره

يجيلى أجيب له الدقيق و هو يصب فيه ـ يا قمرـ زيته

5 أغسطس 2011

العفو

العفو

العنف ليه بقى طبعك و القسوة يا مصرى

غيرت طبعك ؟

دا العفو كان فى الطبع شئ حصرى

و الرحمة كانت فى قلبك مع الدما بتسرى

4أغسطس2011

مرتبة الشرف

مرتبة الشرف

قلبى من جوه صدرى رقص من فرحته و اتخطف

لما الأميرة ارتدت تاج من دهب مترصع بمرتبة الشرف

قمة ذكاء ، و التفوق بيه القريب و البعيد سلم و اعترف

الأدب و الذوق و واخدة من كل علم بطرف

كتبت شيك على بنك السعادة و قلت له :

روح على حساب الأميرة و انصَرف

لو بسى يعرف بأمورتى رئيس الحكومة عصام شرف

لخدها وزيرة العمارة فى المحروسة .. آه بسى لو عرف !

حتبنى لنا مصر الجديدة : عمارات ، ﭭلل و قصور..

و هندسة آخر ترف

فن العمارة وقف يقول للتاريخ كلمته ثم انصرف ..

قال دى أميرة أميرة الجمال و المفهومية عن جدارة ..

مش صدف.

3 أغسطس 2011

ما تدوريش

ماتدوريش

على إيشى قاعدة تدورى

و القلب ملهوف على نظرة هنا

يصرخ يقول يا جميل إحنا هنا

قاعد و مستنى الرضا

شوف يا قمر من كام سنة

ما شايفاشى ؟

دا اللى ما يشوف ضنى الفؤاد

يبقى يا جميل أطبش

14 يوليو 2011

مع الطبيعة

مع الطبيعة ..

ما تغيّريش من جمالك بحبة بودرة و روج و رتوش

أشوف عيون المها بلون الدجى حارساها سهام و رموش

و انا كل ما انظر لهم ، قلبى يسيح م الهوى و يبوش

يطب ساكت من هواه و اجرى على الطبيب :

الحق يا طبيبى و حوش

دا اللى بتجرى ورا الماكياج :

منظر و بسّى ، و الحقيقة فاشوش

من غير كوافير : شعر الجميلة حرير ، حتى و لو منكوش

أما الخدود دى هيه تفاح أمريكانى ، لكن ما هوش مرشوش

شوفوا الشفايف : دى ورد بلدى بيرقص من فرحته مدووش

صاروخين على صدرها ¤

بينهم سبيل ، أسدين فى الالتحام يتحولوا لوحوش

اللى يقرب حيتكهرب و يرجع منكسر مدشوش

خصوصى لصاحب النصيب ، وغيره راجع م الميدان بللوش

20 يوليو 2011

دموع فى عيون أمى

دموع

فى عيون أمى

بتهد ليه يا ولدى فى أساس بيتك

مش هوه دا الحب اللى عليه ربيتك

فى كل غنوة تقولها : يا حبيتى يا أمى

فى كل أفعالك تزيد من غمى و فى همى

عايز و عايز و عايز من غير جهاد و مشقة

من أول اللقمة إلى التعليم إلى الصحة و عايز شقة

منين يا إبنى ، و انت قاعد معتصم و متظاهر و لا بتبنى

ما باخدش منك غير كلام ، خيبت فيك ظنى

بتحبنى ؟ .. دا الحب عندك يا دوب مجرد كلمة

و مفيش جهاد ، دا العمل واجب يزيد بُه ربنا النعمة

الفرقة دبت و كله بيرفع بالشعار صوته

"بحبك يا بلدى" .. بلاشى مش عايزة هذه النغمة

قوم يا مصرى : شوف جدودك دوخوا الدنيا

علم و حضارة و قوة بالعمل و الهمة

معقولة إنك حفيد خوفو و أحمس و رمسيس العظيم ـ بالذمة

و حفيد صلاح الدين اللى جعلنى فى يوم فى الدنيا أعظم أمة

غضبانة عليك يا ولدى م النهارده ليوم الدين

إن لم تقوم و تنهض للبنا و تشمر الساعدين

أرفع إيديا للسما أدعى يا ولدى بالهداية و ما تكون من الضالين

يا رب حقق دعايا لولدى ..

يا مجيب الدعا ..

آمين

27 يوليو 2011

إيدين متشابكة

إيدين متشابكة

أحط ايديا فى إيديكى

و عينى باصّـة فى عينيكى

و إيدك نايمة فى كفى

و انا بالوعد مستكفى

أحط الإيد على صدرك

أحس بنبضه بيقوللى

أنا مشتاق .. يا طول صبرك

و نارى الحارة بتخللى

هوانا سر من سرك

11 يوليو 2011

الثبات و الحقيقة

الحقيقة والثبات

داير أدور ع الحقيقة

بسأل عليها كل ساعى ف كل درب

فيلسوف ، عالم كبير ولا ّ صغيّر

كلهم قالوا يا بختك

إن لقيت أية إجابة

دا احنا طول العمر كنا

نسعى لنعرف عنها حاجة

حتى هبابة

لفيت أصلى فى الجوامع

و الزوايا

و اقرا ذكر و ما تيسر فى المقامات و التكايا

كل ما أدرك فى يومى

بكره ألقاه قد تغيّر

الشمس طول اليوم تنور

فى العشا : فينها ؟ .. ما فيش

و القمر ليلة مدور

باقى الليالى : برضه ما فيش

زاوية مزنوقة ف زقاق

داخل أصلى

المؤذن صاح على المدنة و كبر

الله أكبر

الله أكبر .. هيه دى ..

الحقيقة اللى أنا عنها بادور

الدنيا مبدؤها التغير

و الثبات أصل الحقيقة

14 يونيو 2011

سبحانه

سبحانه

هيه بإيدك و الا بإيدى ؟

سيدك و سيدى

كله بأمره ، كله بطوعه و كلمته

و بحكمته ، من صنع إيده

الأمر له و النهى و الملكوت

و الكون دا عبده ، مأمور بأمره ، و المهيمن :

هو سيده

مسلم + مسيحى

مسلم + مسيحى

قومى يا أجدع بلد

دى قلوب و حالفة لتبنى المجد

تحمى الديار و تصونها فى ساعة الجد

حلفت على كده الصبية و حلف معاها الولد

رفعوا الهلال و الصليب فى حضنه

دا المصرى عارف من قديم الزمان إنه

صاحب حضارة بناها أبوه و الجدود

إرادة زى الحديد ، و العزم القوى المشدود

لا تقوللى مسلم ، مسيحى : دا كلام خايبين

أرض الكنانة : منها اتخلقنا سوا و ليها سوا راجعين .

20 يونية 2011

(ردا على محمد سعيد فى منتدى أبناء مصر)