يوم هنى
فى يوم هنى
هوّه ميلاد القمر
الأرض بالنور أشرقت
و قلوب صبية بالهوى شعشعت
عصفورة بأحلى ما فى الغُـنا زقزقت
رقصت من السعادة و بدعت
و البلابل على أغصان الشجر
و العندليب السعيد هجر
عشه ، و جه يبارك بأحلى أيام العُمُـر
الروض بيتباهى بأحلى زهرة بين الزهورأينعت
باقى الزهور بالغيرة من دا الجمال ولعت
مصرى
فى نص الليل
و الزمان بيدور
رايحة سنة و اللى جايّـة بتتمخطر
و الناس فى فرح و سرور
بيقدموا صلاتهم و الدعا
يزيد فى بلدنا الخير
و يعم السلام أكتر
فجأة !! دخل الشيطان يزأر
و فحيحه و شره و حقده
طاغى .. بيتفجر .
سقطت قلوب الضحايا تشتكى
رجلين هنا و ايدين هناك
أعضاء متمزقة بتتبعتر
عايز يفرق شملنا
كان غيره أشطر
مش وقته يا مصرى الدموع أو الآهات
مطلوب يا مصرى غير كده .. أكتر
نادى يا مصرى بعزم الصوت
و لو من أجلها ح تموت :
الكل حر فى دنيته و ف دينه
إن كان نصارى فالصليب دا يبقى حقهم
و الله محبة
و المسلمين : الكل إخوة و زيادة حبة
و الله أكبر .
بمناسبة الاعتداء على الكنيسة بالاسكندرية
1 يناير 2011
كل سنة و انت .. إيه ؟
أقول لك إيه ؟ .. مانيش عارف
و اعيد لك إيه و انا شايف :
قلوب بالهم مروية
نفوس بالحزن مسقية
و دمع من العيون ذارف
أقول لك إيه ؟ .. مانيش عارف
بإيه من قلبى راح اعيّـد
عليك يا صاحبى يا وليم
و انا محبط و متألم
و سبحانه العظيم يعلم
دا قلبى الجرح فيه نازف
أقول لك إيه ؟ مانيش عارف
تكون دى آخر الأحزان
و تحيا مصرنا لينا
دى أم لكل من فيها
دا هيه النور و فى عنينا
و أقول لك إيه ؟ .. مانيش عارف
اقول لك و مش مكسوف
تعيش فيها سنين طيب
بدون أحزان ،
و فى اطمئنان
و لا حتى هبابة خوف
و قلبى على قلبك
و يدى على يدك
نحش الشوك
نبص لفوق
و نسعى سوا نبنى
لمستقبل عظيم وارف
كده أبقى أنا عارف
ح تبقى مصر واحتنا
ح ننسى فيها أحزاننا
نعيش فيها بدون الخوف
مسيحى كنت أو مسلم
صحيح قـُولى يا أخى وليم ؟
عيد الميلاد المجيد
7 يناير 2011
زمان
زمان ....
و كان العمر فى أوله و الشباب فوْرة
و القلب كان دافى و الهوى ثورة
و الدنيا على كيفنا بتمشى و فين ما نعوز
لا يوم كشرت فى وشنا و لا ضربت لنا بوز
و الفتى مغرور بقوته ، وبصحته و فتوته و صباه
مهش حاسب إن الزمن بياخد تمن لهوه و متعته و هواه
تاجر يبيع الهوى بالعمر : ساعة ، سنة ، أسابيع
شاطر ، و إحنا خيبانين ،
نجرى و نعرض عليه عمرنا ... و نبيع
يضرب الدنيا بجزمته و يقول لها ما عليكى قدى
و هيه بتمد له فى الغى و تسايره و تـْعِِِبّ له م الهوى وتدى
عايز يكوش ع الحياة و لذاتها يلملم منها نصيب أكبر
مهوش معتبر بالعبر و لا قانع و لا بيصبر
تجرى بنا الأيام و الوش يتغير .
و تدوّر الدنيا على غيرنا قصدها تغره
بعد ما دوّب الواحد فى هواها عمره
غرير ..
ما هوش قادر يفرق بين الصواب و الخطأ من أمره
23 أكتوبر 2010
يا ولدى
إلى شباب مصر
ليه القساوة دى
و انت لحمك و دمك
نبتة من طين البلد دى
بلدك و بلدى
مصر اللى كرمها ربنا فى توراته
و عظـّم قدرها ف إنجيله ، و فى قرآنه
عايشه بستره و رحمته ، و فى ظلال العرش و أمانه
مصر اللى أوت يوسف و يعقوب و كل أسباطه
مصر اللى شعبها ليوم القيامة ، صابر على رباطه
ِسيْدنا الخليل زارها و خد منـِّـها هاجر
أم العرب و جدة ِسيْدك النبى الحاشر
وطـِّى على ترابها و بوسه و قول له أنا غلطان
دا مسك غالى و عنبر ، والتبرطاهر زعفران
اطلب من المولى السماح و العفو و الغفران
خليك لها درع الأمان يحميها من غدرة الأزمان
و خد أخوك المواطن مصرى بالحب و الود و الأحضان
12 يناير 2011
التمن
واقف بيصرخ فى الفلا
حرية كاملة للوطن ، ولا ّ فلا
الدم عربون التمن
غالى صحيح ، إنما
هوه فدا أغلى وطن
قام الشباب قومة واحدة بيزعـقوا
احنا فداه .. و فدا الكرامة ،
و الزمن
هوه زماننا فيه ح نبنى ،
فيه ح نعلا بالوطن
الروح لـُـو عاشقة ،
والفؤاد فى ترابه الزعفران
هوه بيته و السكن
لما الشعوب بتقول كرامة
سكتها ح تكون سكة سلامة
و المهر نار .. بحر من الدما
تحرق صحيح إنما
ترسم طريق و تمهده
هوه طريق آخره الكرامة
و المصرى له قيمة و قـَـيامة
يوم الغضب
يوم الغضب
علم الكرامة انتفض
على أعلى سارى فى البلد
قام و رفرف و انتصب
و الشباب اللى قالوا الرقاب
و الدما و الأرواح
هيه فداء مصر الوطن
و لا فيش كرامة ، تنتزع من غير تمن
شُهَدا إن قتلنا البغى .. أحرار إذا عشنا بعدها
لكن مش ح نرجع إلى عصر إنذل فيه أهلنا
نصنع اليوم مجتمع يستحقه عن جدارة ابننا
الشعب اللى ثارللكرامة ،
اسمه ف سجل الخالدين انكتب
و اللى ظلم ، و اللى بغى ،
اسمه من كل الوجود انشطب
الهمة و الصبر الجميل يا شباب
النصر واقف لكم ع الباب
و الشمس من تانى من ساحة التحرير
رايحة تنور من جديد فى ثورة التنوير
مصطفى سلام
26 يناير 2011
مين يحب الحمار
كل منافق قام اليوم
وف إيده سكينة ، قادوم
يرهب بيها شباب الثورة
لجل يطفى حماس الفورة
بيقول لك فى بجاحة يا ريس
يا أفسد حاكم جبار
إن سيادته بكل نفاقه
بيحبك يا أغبى حمار
6 قبراير 2011
