أعشقك

أعشقك

أحبك و أهواك و ادوب فى غرامك و أعشقك

و ابدر حواليك الهوى من شمالك حتى جنوبك

و من مغربك وحتى مشرقك

و أرشف كاسات الهوى و امزمز فيها وادوّقك

و احفر للهوى حفرة غويطة

أغطسك فيها و اغرقك

اكدبى كيف ما انتى عايزة

ورغم علمى بكذبك ،

و بخداعك ،

من ساسك ياجميلة لمفرقك

مضطر يا قمراية أصدقك

25/6/2013

تأملات

عيد جديد

قالوا ميلاد

ميلاد دا إيه ؟

دا عام بيجرى

و لا حد يعرف

و لا حد يدرىِ

العمر ينقص

و احنا بنرقص

و التورته والع

فوقها الشموع

لو بس ندرك

لو بس ندرى

نبكى بدموع

العمر ضايع

و الناس بتلهو

و لا فيشى مانع

إن إحنا ننسى

إن الحياة

حلوة و غرورة

غانْـيَـة ومُلعب

واحنا بهبلنا

واخدينها مَلعب

أجيال بتيجى

أجيال بتمضى

و اهو كله ماشى

و اللى بيبصم

و اللى يوقع

يا دوب حضور

و اللى بيلبس

و اللى بيخلع ⁽¹⁾

و اللى بياكل

و اللى يجوع

و اللى بيخلع ⁽²⁾

و لا حد يبقى

و لا غيره شئ

واحد أحد

فردٌ صمد

الكل يفنى

هوه اللى باقى

سبحانه وحده

هوه الإله

و لا شئ سواه

و اللى تراب

راجع إليه

روح م السما

تدخل فى برزخ

دنيانا فانية

الدهر فيها

يمضى فى ثانية

فين جدو آدم

مِنْ بعده عالم

فين سِيْدنا نوح

أجيال كتيرة

تيجى ، تروح

و الدنيا واقفة

تحكى ، تبوح

عن سر فيها

كامن فى كلمة :

مافيهاش خلود

و لا فى الوجود

يُنفخ فى صور

الكل ينهض

يمْضى حضور

الملك لك

وحدك يا رب

الأمر لك

وحدك يا رب

النهى لك

وحدك يا رب

الرحمة منك

رحمن رحيم

فتاح عليم

و لطيف بعبدك

و العفو عندك

-------------

(1)        أى يخلع هدومه

(2)        أى يفلسع (هاها ) ، أى يتكل ، أى يورينا عرض قفاه – و المعنى هنا : مغادرة الحياة الدنيا

23

يوم القيامة

(1)

الطريق

ماشى فى دنيا ضلام مانيش عارف طريقى منين

عارف بدايته ، لكين النهاية يا ترى على فين

ح تقوللى ع الأخرة ، عارف ، مش هيه ديـّه المشكلة

لكن ، يا ترى : حاركن شمال ، يا مغيث

نجنا و اجعلنا من أهل اليمين

حاولت أكون دايما من عباده المؤمنين

صليت و صمت مع الزكا ، مؤمن بيوم الدين

كافحت فى الدنيا كتير :

صبر و جلد وصفاء ضمير

لكن خطايا تملا المسافة لحد الصين

ح يقولوا : فلان : قرب تقدم للعرض ع الجبار

وحيد حاقابله ، لا أب ينصرنى و لا جار

(2)

الآخــرة

اسرافيل ..

 يوم القيامة ..

و دا يوم كرامة ..

أو ندامة ..

ماسك بقوة باليمين ..

و بأمر م المولى المتين ..

 فى الصور ..

 بكل جبروت الملاك ..

نفخة ينفخها وحيدة ..

تنتهى كل الحياة ..

إن كان هنا و الا هناك ..

فى الصور..

و بنفخة أخرى مْدويّة ..

هُمّه يا دوبك  نفختين ..

تنفتح كل القبور ..

قاموا الخلايق أجمعين ..

من كل درب و كل لحد ..

اتجمعوا ف يوم الحساب ..

ما هربش منهم أى حد .

تلقى اللى واقف فى ذهول ..

عمال بيسأل ، حيران يقول ..

يا ويْلتى ..

 إيه اللى حاصل هاهنا ..

يا هول عينى ، و العنا ..

 دانا كنت راقد ..

مين اللى أيقظ م المراقد..

الكل واقف فى سكون..

ممكن يكونوا سكرانين ؟!! ..

 أبدا ، دا صاحى ومنتبه ..

عمال بيسأل ع اللى حاصل له و به ..

مرعوب و شاهد ..

هول المشاهد ..

و يقول ساعتها ، يهتف يهاتى ..

يا ريتنى قدمت لحياتى ..

و ساعتها لا ينفع ندم ..

الوقت مش وقت العمل ..

الوقت دا وقت الحساب ..

و الكل فتحوا له كتاب ..

يتسئل ، و لسانه مش قادر يجيب..

و لا جنبه صاحبة أو حبيب ..

تشهد إيديه ، رجله و جلده ..

بالخير اللى ليه ، أو شر ضده ..

----------------

يا ربى وزرى تقيل عليا

و الذنوب

حاولت قبل الموت أتوب

و انت غفار الذنوب

جيت لك بملء الأرض ذنب

المغفرة ، بالفضل عاملنى يا رب

يشفع ياربى إنى عشت كتير ومت

على لا إله أبدا إلا أنت

----------------

عبدى شهد لى ع الدوام بالوحدانية

الذنوب مهما تكون كما و كيفا جاية منه

و المغفرة و العفو و الرحمةعليا

---------------

النور بيسطع فى القلوب

فتجيب – ورعا - بالوجيب

ترجو من المولى رضاه

و اللهُ غفار الذنوب

---------------

الأمر يصدر من الرحيم ، مالـُهشى رد

أخدونى أمشى ع الصراط اللى هوه حد

بين النعيم ع اليمين ،

و الشمال : النار ما ترحم حد

حده كمثل السيف ، حامى كمثل الشفرة

بالفضل نمشى عليه و العرض عرض الشعرة

اللى بيمشى ، و اللى بيجرى ،

 و اللى بيزحف و اللى كمثل الطيف

تمشى الخلايق عليه ، يا بخت مين عدوا

يلقوا حبيبنا بإيديه ، يسقى الفرات من يده

---------------

هيا إلى الجنة

فيها ما تتمنى

و كتير كتير أكتر

مما رأت عينك

أو سِمعته ودنك

و لا يخطر على بالك

و لا مر بخيالك

يلقانا خزنتـُها

أهلا بكم  طبتم

----------

عايز عنب ؟ ..

تجيلك التكاعيب مادّه ف عناقيدها

تتمنى تاكل بلح ؟ ..

النخل ييجى يقولك كـُـل من النخلة اللى بتريدها

أما العسل

تجيلك نحلة تسقيك الشهد من إيدها

---------

من بين إيديك شلة من الحور .. حور إنمـا ِعين

جمال ما عمرك حلمت بيه ، يسبى القلوب و العين

النور مشعشع م الوجوه و العيون صافيين

---------

إتمنى و لا تطلب ، تلقى الأمنية قدامك

أكتر كتير مما تمنيت ، متحققة لك

و المؤمن : اللى بالنعيم اكتفى ..

لما يكون فى صحبة المصطفى

---------

خمر و عسل ، ميّة و لبن ، بيقدم لك الولدان

لا سُـكر تسكر و لا حَــَزن ، و الشرب بالمجان

لا فيه تعب أو نصَـب ، كسالف الأزمان

و انت فى ضيافة ربنا ، كريم منان

---------

ما فيش لغة تقدر توصف لنا الجنة

يا رب توعدنا ، و تطل على روحنا ،

 و العفو من عندك ، عما بدر منا

---------

يا بخته اللى سكن فى قمة الفروس

فى حياته عاش فى ظل ربنا القادرالقدوس

لا غرته الغرورة بشهوة و لا لذة و لا فلوس

ينظر إليه من العلياء ربنا بنوره

يشرق عليه : يزداد فى بشره و سروره

منهم يا ربى بفضلك : إجعلنا و اكتبنا

و بالكرم الإلهى إغفر لنا ذنوبنا.

آمين

3 نوفمبر 2009

طنشى

                         طنشى

الهم و الغم و النكد إرميهم ورا ضهرك

و عيشى سعيدة و مبسوطة طوال عمرك

و طنشى الدنيا ح تلقيها ماشية حسب أمرك

و لا تهتز لمشاكلها و لا شعرة من شعرك

                       

                                       11/5/2012

بلطية

زمان – نشرت فى المنتدى قصيدة عنوانها " فى الحارة "

عن بنت بلدى جميلة اسمها "بلطية "

وهذا هو الرابط الخاص بها :

                                           http://www.egyptsons.com/misr/thread48284.html   

و هذه هى القصيدة الأصلية :

             فى الحارة

المشهد الأول

منديلها ابو أوية ..

دلوعة بيتعاجب ..

و يدلع الحاجب ..

رائع و متدندش ..

بيقول لها هاتى ..

من القورة كام حتة ..

جرتنى وياها ..

اتمنى فى رضاها ..

الحسن دا يهوس ..

حاجة كده بتروش .

المشهد الثانى

على قدها مالت ..

غمزت لى بعنيها ..

اسمعنى يا إنت ..

عاشق لمنديلى ..

و تقوللى تعاليلى ..

طب بص لملايتى ..

نازلة على كتفى ..

و مغطيا سدرى ..

ملفوفة فوق خصرى ..

حتقوللى يا وعدى .

يا لهوى يا حومتى ..

لو ترضى يا سعدى .

المشهد الثالث

الحلو فى البلدى ..

فى الذوق و فى الملبس ..

و حديت لذيذ بلدى ..

حاجة صحيح تهوس ..

و الخطوة فى البلدى ..

رقصة بتـدّرّس ..

بتدب بكعوبها ..

مزيكة يا عينى ..

الودن تسمعها ..

معزوفة بتشجينى ..

لو شفت هزتها ..

حتقول دى باليرينا ..

مكياجها ربانى ..

دى نفسها زينة ..

أو عطرها البلدى ..

بيرّقص المناخير ..

حاسب على نفسك ..

لا تروح بدون تأخير ..

روحى أنا ف بلدى ..

و جمال بنات بلدى ..

عقلى ما عاد عندى ..

سحرُه الهوى البلدى .

المشهد الرابع

حوّدت على قهوة.

جا لى ولد جرسون ..

شكله كده ملعون ..

-      " فنجان معاه شيشة " ..

-      " عمرانة بحشيشة " ؟ ..

-      " لا يا ولد حاشا "..

-      " ليه بسّى يا باشا ؟  ..

تلقى المزاج بيها  ..

ملعونة بلاويها ..

الدنيا و ما فيها " ..

-      " يا ابنى أنا سكران ..

كاسى و كان مليان ..

فضّيتـه فى قلبى ..

أصل الهوى فاض بى " ...

المشهد الخامس

- " البنت بلطيـة ؟؟؟؟؟؟؟؟؟؟؟؟!

يا نهار أبوك اسود !!

-      " ليه يعنى .. إيه هيـّه ؟!

-      " امشى و لا تحـّود ..

ما تروحشى فى داهية ..

دى بنت ابو كرشة ..

جبار و لا بيرحم ..

أخلاقه كتير وحشة ..

ينزل على دماغك ..

يفلقها بالشومة ..

و تنط فى كرشك ..

سكينة أو مطوة ..

يللا قوام امشى ..

لا شيشة و لا قهوة ..

لا يطب على سهوة ".

المشهد السادس

و خرجت م الحارة ..

بالحسرة يا خسارة ..

مليان كتير بالغم ..

مالي انا يا عم ..

و بلاها بلطية ..

ابعد تكون أسلم ..

دوّر على غيرها ..

أسماك كتير فى اليم .

مصطفى درويش سلام

17 مارس 2006

و فى هذه الأيام ذكرنى أخى الحبيب الشاعر وجدى محمود بهذه البلطية

فقررت أن أعاود المحاولة و أذهب إلى الحارة لأرى ماذا صارت إليه بلطية

المشهد السابع

فينك يا بلطية ؟

جرفنى الشوق أشوف البت بلطية !!

لسه فاكرها ؟

اللى ِمشيت وراها من سنين فى الحارة اللى فى الحسينية

لالا ..لأ .. أنا مش مصدق عينيا اللي ملزوقين فى وشى

بطيخة دى ماشية  ؟  أو قول دى برميل طرشى

فينها المانيكان اللى كانت جننتنى من سنين ؟

فين الحلاوة ، فين الدفا اللى كان طالل بيضوى فى العيون ؟

فين الموسيقى اللى كانت بتعزفها خلاخيلها؟

كانت تطرقع على الأسفلت : مزيكا بشبشبها

تتهز ليها القلوب ، تطرب و تتشنـّف

دلوقتى تدق الأرض تتزلزل و الحيطان ترجف

فين القلوب اللى كانت بترمح وراها على خيلها ؟

يااه !! كل ده أصبح تاريخ زمن فات و انقضى

انظر يا صاحبى ، تأمل تصاريف القضا

و لا حاجة فى الدنيا باقية على حالها

لا غنِى ح يفضل له مع الأيام ماله وغناه

و لا الجميلة ح تفضل ع الزمان فى نورها و جمالها

إيه الحكاية ؟

البت خدها نصيبها المعلم عبد العظيم عبده

تاجر كبير فى الصنف : بودرة ، حشيش ، بانجو أو أفيون

كل المزاج تلقاه ، مهما المزاج ده يكون

الواد زعيزع أبو الروس بلغ عليه ، خانوا

قبضت عليه المباحث هوه و ثلاثة من إخوانه

بيحضروا لغزو السوق بالمخدرات كانوا

قاعدين حداه جوه الوكالة عنده

دخل فيها اللومان، و ساب لها الدنيا تعيش فيها من بعده

بلطية ماشية و ماسكآ ف ديلها بِسرياية

سألت عن اسمها قالوا بياضة ، و البياض ع الجمال آية

آية تفكر بامها اللى كانت قبل ما تغدرالأيام

هوه القمر إيش راح يخلف سوى قمر الزمان

و آدى نصيبها من جوازها و جوزها الذى كان

فين الصبا و الجمال، و الفرْح و الحيوية

فين الشباب اللى كان مشعلل مية فى المية

صُعبت عليا و فرت دمعة من عينى

كله مضى و انكسر قلبها ، كما لو طبق صينى

عينى على الأيام ، دا الغدر فيها طبع

و احنا الغلابة اللى مالنا من حظها ، إلا الطاعة و السمع

نبكى و نضحك ولا هيـّه ساءلة بكا ده ، أو ضحك

ابكى كتير يا عين على  أيامك و المصير إللى ما فيه شك

تمشى  الحياة ، و الكل غفلان فى الطريق ماشى و بيجرى

و نتغير ، و نتبدل بأمره هوه : لا أمرك و لا أمرى

مصطفى سلام

24 مايو 2010