ميل عليكى الهوى
l
تقاسيم على أوتار قلب
ميل عليكى الهوا
طيّر حرير شعرك
خدو و رماه بعزقه
بالواحدة فوق ضهرك
2
ميل عليكى الهوا
داعب حَمَار خدك
قال لك يا حلوة يا بيضا
مين فى الجمال قدك
3
ميل عليكى الهوا
ساب الكريز فى شفايفك
أدوقه يا قمر : ماتتكسفيش
رشفة واحدة وغيرها مفيش
ماحد شايفنى و لا شايفك
4
5
ميل عليكى الهوا
و التف على خصرك
و استأذنك فى رقصتين
دا الإذن ليكى يا قمر
و كله من أمرك
6
ميل عليكى الهوا
قابله بسحرهم حراسك
مادد شفايفه لشفايفك
و قام من حرقته باسك
مطّرعليكى القبل
من ساسك إلى راسك
وهوه ما هو فى الهوا
راهب و لا ناسك
مالك فزعتى م القبل
و كإن الغضنفر هجم
أو دخل فيل باسك
يسقيكى
خمر و عسل
و يسكر م اللبن فى كاسك
طالب حلال يا قمر
ييجى يقابل ناسك
يشبع هواه يا قمر
و يهدّى إحساسك
7
ميل عليكى الهوا
شالك على جناحه هيلا بيلا
حطك على صدرى و بيِّتى عليه الليلة
غرَّقتى بعديها الفؤاد فى بحر أوهامه
و المهجة صارت مريضة بالهوى وعليلة
8
ميل عليكى الهوا
طيّر الفستان
شئ م الجمال المخبى ظهرلى و بان
رميت عينيا عليه : ظهر لها المكنون
رجَّعتِ ذكرى قديمة و اللى ف زمانى كان
9
ميل عليكى الهوا
زغزغك فضحكتى
هَوَا لعوب ، الهوى مبدؤه و ُنكَتى
قلبى م الهوى خايف عليكى يلطشك
إن كنت خايفة على مهجتك
سلميهالى و اتكلى علىّ انت
10
ميل عليكى الهوا
و اتشعبط بطوق توبك
و حط إيده فى وسطك وقال لك حبك و مكتوبك
إن كنت مهرة حرون ، أنا فارسك و محسوبك
وانا فتاكى يا قمر ، و راجلك و مطلوبك
11
ميل عليكى الهوا
بدر الهوى حواليكى
و كل من داق الهوى
عشق الجمال فيكى
هو العليل و انت الدوا
سلمت الفؤاد ليكى
12
ميل عليكى الهوا
و قال لك كلمة فى ودنك
سمعتها ، أقولهالك يا بيضا عن إذنك
قال : دا الحب عامل عمايله فى قلبى
عقبال ما يعمل زيها ف قلبك
13
ميل عليكى الهوا
نقش الحنة فى ايديكى
و اتجمعوا أحلى البنات
و التفوا حواليكى
ما شافوا قبلك عروسة
و الضى فى عينيكى
شهقوا لجمالك وقالوا
اسم الله يا حلوة عليكى
14
ميل عليكى الهوا
قال يا حلوة ضمينى
دا انت حياتى و عقلى و قلبى و نور عينى
و اللى بينك فى الهوى يا مهجتى و بينك
يرضينى ساعة و ساعات يا حلوة يشقينى
15
ميل عليكى الهوا
جمع ما بيننا فى ليلة غاية فى الظرف
جمع ما بين الحروف بالهوى و الطرف
غنيتى فيها للهوى و هوه لسه فوق الحرف
قلتلك متى تانى ؟ قلتيلى حسب المزاج و الظرف
16
ميل عليكى الهوا
شاف وشك الوضاح
هو احنا بالليل يا قمر و الا الصباح
مصمص شفايفه م العجب
و عدى عليكى و راح
17
ميل عليكى الهوا
بصبص يا جميل على دنيتك
يا دوبك هيه ثانية
ملـَكُه العجب
ديّـاً يا صاحبى دنيا تانية
ما شفت أبدا زيها
من شرق آسيا لألمانيا
18
ميل عليكى الهوا
يا زهرة البانسيه
ترك فؤاده ف إيديكى
إوعى يا قمر تنسيه
قطف له قطفة ع الطاير
و قال يا حلوة مرسيه
19
ميل عليكى الهوا
قطف من فوق شفايفك قطفة
دى القطفة من فوق شفايفك موصوفة له وصفة
و البوسة علاج للهوى
يشرب عسل م الشفة
20
ميل عليكى الهوا
شرب شمبانيا من كاسك
سكر و غنى للهوى
و شعلل بالهوى يا حلو إحساسك
ليه الممانعة يا قمر لو كل يوم باسك ؟
21
ميل عليكى الهوا
و دخل بدون تصريح
لما الفؤاد انكوى
بالحب و التباريح
لما ضناه سَتْر الهوى
بالحب أصدر ميتين تصريح
من قبلها قال لك أحبك
بالرمز و التلميح
شاف فى العنين منك رضا
مكتوب على وشك صريح
22
ميل عليكى الهوا
يا صحبة الأزهار
شاط الفؤاد و انكوى
لما اترمى فى النار
اللى ما يهزه الهوى
لا مؤاخذة يبقى حمار
23
ميل عليكى الهوا
يا اللى جمالك عجب
طاغى و فاق الحد
و لا زيه أنا ما لقيت
أو شافت عينيا حد
24
ميل عليكى الهوا
عاطر لطيف و عليل
تقل عليه الهوى
غنى يا عين يا ليل
بالحب مال و استوى
و صبح مريض و عليل
25
ميل عليكى الهوا
خد عقلى منى و طار
هز الفؤاد فاتلوح
ما ساب لى فرصة اختار
شنكلنى فيكى الهوى
و رمانى جوه النار
26
ميل عليكى الهوا
تبِّـت و لم يمشى
حاسب يا جدع م الهوى
أحسن يقتلك رمشى
سفاح قلوب جبار ما يرحمشى
بص المتيم قتلته بسهم من رمشى
لكنه برضه ما حرمشى
و جاى يقوللى اقتلى تانى
دا انا ليلى بطوله ما بنامشى
27
ميل عليكى الهوا
خبط على بابك
داخ من حلاوة طلعتك
و انبهر بشبابك
واقف و كله أمل
فى صف خطابك
قتلتى ليه فيه الأمل
من قتله إيش نابك
إيش تعملى ف عدوينك
لما بتقتلى أحبابك
28
ميل عليكى الهوا
خلاكى ميلتى على عودى
طالب شوية هوى
حنَّى عليا و "جودى"
إسمك من الجود اتخلق
يا حلوة يا جودى
ما تبخليش يا قمر
إدينى ، إدى و زيدى
29
ميل عليكى الهوا
هفهف على هدومك
فرحان من بهجته بقدومك
ظقطط له ظقطيطة
كشّرتى فيه لما نظر
زعل منك ، ضرب دماغه فى الحيطة
30
ميل عليكى الهوا
سكر من جمالك ،
تايه ومن حبك نسى ناسه
مبقاشى عارف رجله من راسه
مشى بعدها يتطوح من اللذة اللى ملت قلبه
من راسه إلى ساسه
شاف فى طريقه جدار ،
بدل ما يبوسك راح للجدار باسه
31
ميل عليكى الهوى
واقف يخبط على باب حصنك
مجذوب إليكى و مجنون بنور حسنك
و عيونك بسحْرها قالتله بالمفتشرإنك
فتحتيله بابك و نال الرضا منك
أسقيكى الحليب و تسقينى قهوة من بُنِّـك
نكهة بطعم العسل حلّاها جمال سنِّـك
أغنى لك على عودى
وأسمع " ليالى " من فنك
32
ميل عليكى الهوا
مال على المحبوبة
شاف الجمال و انزوى
راح فى غيبوبة
فاق و قال للهوى
توبة يا هوى توبة
33
ميل عليكى الهوا
لمح جمالك و اتلحس
و انكتم صوته وانحبس
و هوه مشاغب شرس
قال لى بطلت الشقاوة أنا
و كفاية قمرى الجميل دا و بس
و سكتْ بعدها و اْخرَّس
هس
34
ميل عليكى الهوا
خد خصلة من شعرك
رماها فوق الجبين
و الباقى على ضهرك
قوليلى يا قمر مين
يقدر على سحرك
قلبك مقفل ع اللى فيه
قوليلى إيه سرك
35
ميل عليكى الهوا
قابل رموش دباحة
هدى و قال للقمر
يا بدر بصراحة
مقدرش أهوب ناحيتك
أو اعدى فى الساحة
إزاى تقتلى مهجتى
و تنامى مرتاحة ؟
36
ميل عليكى الهوا
لاعب قميص شفتشى
شاف الحلاوة و الجمال
و لمح الرموش
دباحة بيها بترمشى
و بنفضة فى جسمك
و قلبك المشتاق ترعشى
رجع سعيد منتشى
قلتيله عيب اختشى
و اللى ما ما داق الحلاوة
كفاية عليه بعضشى
37
ميل عليكى الهوا
هفهف على فرعك
دلق أغانى الهوى
و العشق فى سمعك
واقف و قلبه الحزين
صعبان عليه دمعك
مسح بحبه الدموع
قاد فى الفؤاد شمعك
38
ميل عليكى الهوا
و الدنيا كانت حر
ملس على شفتك
خدك سِخِن وِ اْحمَّر
تفاح أمريكانى استوى
و الحب ما له مفر
و انت يا حلوة الحلوين
مش ناويه تجيبيها البر
39
ميل عليكى الهوا
سحره قمر وناس
و انا قلبى داب و انكوى
من رقة الإحساس
لما رأى نظرة عينيك
داست وتر حساس
راح يجرى إيه يا قمر
لو إنه حضن أو باس ؟
دا العطف بالمختصر
شيمة كرام الناس
40
ميل عليكى الهوا
ولّع فى الفؤاد جمرة
طفيها يا حلوة بشفايفك
قلتيلى سيبها مولعة
إيه يجرى ؟
قلتلك طيب ميعاد للغرام
قلتيلى فوت بكره
أنا قلت فين عشنا
قلتيلى فوق شجرة
نسهر ليالى فى الغرام
نتغطى بالقمرة
و نعيش فى عشتنا و لا الأمرا
يا سلام على كده
دى أجمل فكرة
41
ميل عليكى الهوا
خبط على الصندوق
قومى افتحى له يا قمر
ملهوف ضناه الشوق
عازم ليدخل يا هوى
بالعافية أو بالذوق
يصب فيه الحنان
و الهوى و يدوق
واقف بيعلن غرامه
فى داخل الصندوق
بعلو صوته كما فى بوق:
دا اللى ينال الرضا
يبقى صحيح مرزوق
42
ميل عليكى الهوا
و انتى كمان ملتى
قال لك كلام فى الهوى
و انتى كمان قلتى
يشكى لهيب الغرام
قلتى له يا حومتى
قلتى له مين عذبك
قال لك يا قمر إنتى
من ساعة عينيا ما شافت
نورك فى ليلة منورة بنتى
حطيتى ليه بينا يا قمر
حيطة أسمنتى
43
ميل عليكى الهوا
و البلبل لبد فى العش
داق الدفا و العسيلة وانتعش
غنى هناك غنوته ،
قعد له ساعة و انكمش
سكر، خرج فى الهوا
غنى و قال :
أنا راجل جدع
44
ميل عليكى الهوا
همس فى ودن القمر:
ح اسأل سؤالى بجد
ليه الحَمَار نص الجمال
فى الوردة
أو فى الشفايف
أو إنه فوق الخد
أو حتى فى البطيخ
أو إنه جوه الشق
عايز إجابة بصدق
أما حمار الدما – هل دا جمال ؟
من الطبيعى : لأ
جاوبنى و قول الحق
45
ميل عليكى الهوا
سكر و اتلحس عقله
صرَّخ و قال الدوا
جاله الطبيب قاله
بوسة تدوبها فى كاس العسل
بعد العـَشَا وْ قبله
قاله و فين الصيدلية
قال له على شفايف حبيبك
روح استسمحه و قابله
و ادفع تمن الدوا
و اديله الهوى كله
و قبل ما تدفع فؤادك
بكولونيا و البارفان
تدعكه و تبله
وان كان ح ينسى طريقه
نار الغرام ح تدلّه
روح له شايل هواك
فى الفؤاد و تقول له
أنا العليل ، فين الدوا
اشفى الفؤاد و ارحمه و دلّه
46
ميل عليكى الهوا
عاشق و كله أمل
يلهط رضاب سته
كان نفسه يدوق العسل
قلتيله مش وقته
واقف على الباب و انهطل
دمعه على بخته
بيقول يا حلو العمل
مجنون و السبب إنتو
كان يجرى إيه لو هنيتيه
و نفختى فى صورته
تاخديه فى حضنك و الدفا
و تخففى حيرته
يحكى غرامه و تسمعيه
يتخلى عن صمته
يا ترضى عنه يا قمر
يا يبيعه فى الكانتو
47
ميل عليكى الهوا
فوق الشفايف حط كاسه
و بيمسِّى
قلتيله ما حط كاسه
على كاسى
من قبل كاسك لا جنى و
لا إنسى
الحب بيننا ياقمر
قدر مقدّر، سلميله الفؤاد و انسى
و نتوه فى ليل الهوى سوا فى سفينة
لا تهدى و لا ترسى
و اضمك لصدرى و تسمعى دقات تقول لك
يا حبيبتى و مهجتى ميرسى
ما سكن فؤادى سوى
نجمتى
فى يومى و لا بكرة و
لا أمسى
لو حبتين تركزى فى
الغرام
راح تشعرى بالدفا
داخل و ح تحسى
لو ترضى بيه يا
قمرالزمان بسى
يزداد هنايا بالهوى و
ُأُنسى
أسعد حياتك و تتهنى
أفقى يا قطتى و رأسى
4
49
50
51
ميل عليكى الهوا
وقف يرتعش , ممشيش
واقف يبصبص عليكى
مَحْلى البصبصة م الشيش
شاف اللى طلب منك يشوفه
و انت ترفضى طلبه ولا ترضيش
ميل
عليكى الهوا
ميل عليكى الهوا
و الدنيا كانت ليل
و الحب طاب و استوى
و القلب فاض به الميل
و اللى يقاوم مصيره
ويله من الهوى و مليون ويل
53
ميل عليكى الهوا
ميل عليكى الهوا
و الفرْح فى ركابك
و البسمة فوق شفتك
و الخمرة فى رضابك
بهرتى نجوم السما
دول همه أحبابك
تقلانة ؟
و تْدارى ليه الهوى
و الحب بلوعته وشى بك
