معايدة

معايدة

أجمل معايدة من أجمل صديقة

إحساس رهيّف ، ألفاظ رقيقة

كان نفسى أشوفك و لو دقيقة

لكين الدنيا و ده حالها

جافة و جافية ماهش رفيقة

لحظة تأمل

لحظة تأمل

قعدت أقلب فى دفاتر عمرى ...

إيه كل ده ؟ .. يا خبر !!!

قدمت إيه باعتبارك بشر ؟

كمثل البعوضه من الخيرات ،

أما الشرور فبركان ثار و انفجر

صفحاتها بتقوللى :

حاسب على مهلك :

قربت ع الصفحة الأخيرة

جملة مكتوبة بخط يقراه اللى جاى بعدك :

تمت بحمد الله ، و انطوت صفحاتك ، بعدها تهلك

انتهى فى الحياة عملك ، انتهى بؤسك و انقضى سعدك

بعديها يمصمصوا شفايفهم و ينصرفوا من عندك

ما يبقى لك سوى عملك و دعوات طيبة من ولدك

و خير فى يوم عملته و وجه المولى كان قصدك

فى عيد ميلادى

14 أكتوبر 2010

اهمد

اهمد

لو كنت أعرف إن الجواز بالشكل ده حلو و لذيذ

و لا كان كلام الناس يهمنى و لا نأورة و لا تأويز

وكنت رحت اتجوزت لى دستة

أخلطهم بحبة عسل على لبن و آخد كل يوم لهطة

الأولى تفطرنى عسل و التانية تزغطنى كما البطة

لكن أخاف مراتى الطيبة تغضب فأزعل تجينى فى النافوخ جلطة

أو حتى تتهور فتنزل على دماغى ضرب بالبلطة

دا كيد النسا حراق كما فلفل على شطة

و الغلطة معاهم حتكون لك فى عمرك هيه آخر غلطة

ما تهمد يا عجوز و بلاش شقاوة ،

ما تكمش فى الزوايا : كما الأرنب أو القطة

25 سبتمبر 2010

الصيام فى رجب

الصيام فى رجب

أقول له تعالى يمين يقول لى يا أخى لأ

أقول طيب شمال يقول لى يا أخى لأ

طيب نغرب و الا نشرق ، برضه يا أخى لأ

خلانى حطيت إيديا يا أخى فى الشق

لا عاجبه شئ فى الحياة ، إنسان عجيب أخر عجب

حتى الصيام ما بيعجبوش لو إنه كان فى رجب

الغضب باين فى وشه ، مقدور عليه و انكتب

قلت له لو إنى أشوف بسمه فى وشك :

أديك تلاتة جنيه دهب

29 سبتمبر 2010

يا نهاق أبيض

الأوله هاق ، و التانية هاق

و التالتة مش كل من نهق له تنهيقة تقول لى دا يبقى حمار

دا نهيقنا يا سيد صبا على سيكا على حجازى كار

النهقة تطلع من القلب معزوفة بالنوتة على الجيتار

بيسرقوامنها المقامات

يغنوها مطربيكو اللى عاملينلى كبار

و هيه أصلا نهقتين من هنا على حبة نعيرمن هناك

لا كلام و لا نغم

و الصوت أنا عارفه طبيعى بما إني يا آدمى حمار

29 سبتمبر 2010

انزلاق

إنزلاق

ألم فظيع قال الأطبا دا انزلاق

أصرخ الصرخة يسمعها اللى فى مالطة و الجيزة و الوراق

قالو لى إحشى جيوبك باللحاليح و اعمل العملية

- القلب يا طبيبى مخاصمنى ، ما يستحملشى

كفاية إنه مستحملنى : أقعد لى حبة أو أمشى

- خايف ؟ دى هيه موتة وحيدة مش اكتر

لو كنت أعرف له دوا : فى الهند أو فى الصين

أو فى واق الواق ؟!!!

قطرة ندى

قطرة ندى

وقعت فوق شفايف ورده

اتبسمت

وانا قلبى اتخطف : إيه الجمال ده

أصلى متيم بحب الجمال فى جميع الخلق

أحلف لك أقول الحق

تأسرنى بسمة بريئة فوق شفايف رضيع

منورة ف فصل الربيع

تسكرنى زهرة فوق غصنها بتتمايل

و تدّلـع

و يتوه فى حسنها عقلى و الفؤاد بيولع

شوفوا الجمال فى جيوش النمل و نظامه

الكل شايل على راسه قسمته و نصيبه

ماشيين طابور : الكل عارف صنعته و مقامه

يسقط من فوق دماغها رزقها

تحلف لترجعله و تحمله و تجيبه

و ده طير على فرع فى شجرة

واقف ويــّا أليفه فى خشوع و صَلا

كانوا فى الصباح خماص البطن اللى دلوقتى اتملا

ساكتين و الهوى عمال ينعكش ف ريش الجناح و الديل

فى صمتهم كل الكلام عن الهوى و الميل

خايفين قبل ما يِِِخـْلص كلامهم من هجوم الليل

عصفورة بالشوق على الشباك ،

واقفة بتصوصو

و القطة فى البلكونة باصّـه لها ،

بتضحك و بتنونو

القطة كسلانة ، راقدة بتتمطع

و دى م السعادة بتتنطط و تتدلع

و الكلب واقف فى الطريق ،

و الطمع فى عيونه لامع بيتجمع

و لكل واحد م الخلايق رزقه اللى ما يخلف

بس المهم الكفاح لنيله بالعزيمة و طول الصبر

و أسلوب الوصول له يكون حلال أشرف

يوليو 2010