التمن
واقف بيصرخ فى الفلا
حرية كاملة للوطن ، ولا ّ فلا
الدم عربون التمن
غالى صحيح ، إنما
هوه فدا أغلى وطن
قام الشباب قومة واحدة بيزعـقوا
احنا فداه .. و فدا الكرامة ،
و الزمن
هوه زماننا فيه ح نبنى ،
فيه ح نعلا بالوطن
الروح لـُـو عاشقة ،
والفؤاد فى ترابه الزعفران
هوه بيته و السكن
لما الشعوب بتقول كرامة
سكتها ح تكون سكة سلامة
و المهر نار .. بحر من الدما
تحرق صحيح إنما
ترسم طريق و تمهده
هوه طريق آخره الكرامة
و المصرى له قيمة و قـَـيامة
يوم الغضب
يوم الغضب
علم الكرامة انتفض
على أعلى سارى فى البلد
قام و رفرف و انتصب
و الشباب اللى قالوا الرقاب
و الدما و الأرواح
هيه فداء مصر الوطن
و لا فيش كرامة ، تنتزع من غير تمن
شُهَدا إن قتلنا البغى .. أحرار إذا عشنا بعدها
لكن مش ح نرجع إلى عصر إنذل فيه أهلنا
نصنع اليوم مجتمع يستحقه عن جدارة ابننا
الشعب اللى ثارللكرامة ،
اسمه ف سجل الخالدين انكتب
و اللى ظلم ، و اللى بغى ،
اسمه من كل الوجود انشطب
الهمة و الصبر الجميل يا شباب
النصر واقف لكم ع الباب
و الشمس من تانى من ساحة التحرير
رايحة تنور من جديد فى ثورة التنوير
مصطفى سلام
26 يناير 2011
مين يحب الحمار
كل منافق قام اليوم
وف إيده سكينة ، قادوم
يرهب بيها شباب الثورة
لجل يطفى حماس الفورة
بيقول لك فى بجاحة يا ريس
يا أفسد حاكم جبار
إن سيادته بكل نفاقه
بيحبك يا أغبى حمار
6 قبراير 2011
صح النوم
طال النعاس بالشباب ، يا حلوة الحلوين
لكنهم فاقوا و رفعوا الأيادى للسما ، حالفين بكل يمين
ترجع كرامة الوطن و يعيشوا حُرّين و مرفوعى الجبين
ضحوا بأغلى ما فيهم : بالحياة فى ساحة التحرير
و قالوا قـُليـِّـل عليكى يا بهية ، دانت أغلى من كده بكتير
آدى الشباب المنور فى صفحة الفيسبوك
قايم يدمـّر قلاع الضلام و الطغاة و يدُك
عرّض صدوره للرصاص و قنابل الدخان
لكنه عمره ما جبُـن و لا عمره ضعف أو خان
إيشى تساوى الحياة و الظلم حاجب شعاع الشمس
رفعوا الحناجر بالهتاف من بعد ما كان همس
ثورة يبارك ربنا فيها و تنتهى بالنصر
أرواحنا و كل ملك اليمين فداكى ، يا أمنا يا مصر
حالفين ما نرجع إلا و رافعين رايات النصر
و النيل ح يجرى من جديد و السما حتمطـّر
و الخير يعم الوطن و الشمس تبعت لنا تحياتها
و النجوم ح تـُبْرق لنا م السما و تزداد المحبة أكتر
ساعتها ح نهتف كلنا : الله أكبر
الله أكبر .
9 فبراير 2011
الشعب ثار
فى يناير
الشعب قايم فيه و ثاير
و اليوم ده عشرين و خمسة
تم المراد ؟
بالطبع لسه
الزحف ساير يا شباب
ولحد ما نحقق مرادنا
الأمل وحده يقودنا
مناخيرنا شامخة فى الأعالى
و اللى قهرنا :
ح ندس أنفه فى التراب
هبوا يا شعب
اللى باقى كتير و صعب
إن كنت عايز تبقى حر
و كريم و لك قيمة و قدر
العرق و الجهد حتى و الدما
نبذلها بعزة عندما
تطلبها مصر لمهرها
المهر غالى إنما
عروستنا عالى قدرها
25 فبراير 2011
الشباب
يحيا الشباب اللى ثار
آدى القلوب اللى فاضت نور و نار
الرصاص ما رهبهم ، و لا ضرب نار
نحيا بكرامة ، أو نموت : هوه دا الاختيار.
النهاية : تحت أقدامنا الطغاة
فرعون ح يسقط كيف لويس فى فرنسا
اللى ذل الشعب عمر طويل
عمرنا فى يوم ما ننسى
الكرسى لازق بالغرا فى طيظ مبارك
من يوم مضلم : أسود و أغبر جا له مصادفة
عاملها هبرة ، عضمة ماسكها ف بقه كلب
و لا همه شعب غضوب بيقولـّه بره
و لا راعَى ضمير أو سخط رب
يا مصر ليه انت باكية مكشرة
الثورة قايمة و الخطة جاهزة مدبرة
ح يغور فى داهية و حياة غلاوتك يا بلد يا حنينة
و ح ندفع تمن كرامتك يا مصرنا مهما جرى
و تمن غباوته و تمن خيانته ح يدفعه فى لحظة قريبة
يا شعب حضّرله يللا المقصلة
جهزى لجثته يا مصر أوسخ مزبلة
اختفى بطرس
فى وسط الضلام
فى نص الليل :
اختفى بطرس !
أنا كنت وياه
و مستنيه
يخلص صلاته و الدعا
و نسهر ليلة و نهيص
و بره الكنيسة أنا واقف
أعـِدّ الناس
أشوف الفرحة فى وشوشهم ،
و جوه القلب ميت إحساس
خلـّص يا بطرس دى سهرتنا لحد الصبح
ح نلبس طراطير ، زعابيط ، و ننفخ الزمامير
و نعمل نفسنا : أنا بابا و انت نويل .. صح ؟
و من جوّه الكنيسة سمعت شمامسة بتترنم
و صوت الكاهن بيتكلم
يقول : على الأرض السلام
و بالناس المسرة
و الله محبة
يرددها كذا مرة
و انا برّه مستنى
أهو بطرس :
خلـّص صلاته و جاى ليا
رفض الشيطان الفرحة و الوئام بيننا
فجر قلوب مليانة أمل و محبة
و قعدت أدوّر على بطرس
لكين اختفى بطرس
الدنيا ضلمة مانيش شايف طريقى منين
إلا دموع زى النيران نازلة من العين
ناديت : يا بطرس : إنتا يا أخى فين
جابولى دراع مقطوع من الكتف و بينزف
و قالولى بصوت مخنوق من الدمع و بيهمس
آدى اللى باقى من أخوك بطرس
و طلعت أجرى و لا المجنون على الكورنيش
إيه الهدف ، أبدا مفيش
إوعى يا جرجس تفتكر دم أخونا راح هدر
على يد مجرم أثيم كافر من حثالة البشر
بس انت إيدك فى إيدى و ناخد بعضنا بالحضن
دى مصيبتك مصيبتى ، مصيبة لكل أبناء الوطن
إوعى يا مرقص تبتعد ، دانا قلبى من الهم انفطر
مصر العظيمة يبان معدنها أوقات الخطر
تعالى نزرعها من تانى :
ورود و زهور و نملاها شجر
يرويه دم أخونا اللى مش ح يروح هدر
مصطفى درويش سلام
فى حادثة الاعتداء على كنيسة القديسين بالاسكندرية
1 يناير 2011
