آآآه يا قلبى

آه يا قلبى

آآآه يا قلبى

واجعنى و دقاته مهش عاجبانى

أصل الحبيبة معكننة

و البسمة على وشها واحشانى

امتى يا مصر الوجع ينتهى

و ترجع ليالى الأنس من تانى ؟

إمتى ولادك يعود الحب لقلوبهم

إمتى – حبيبتى - يعود العزم فى عيونهم

إمتى السواعد ح تبنى المجد و تعلـّى

إمتى العمل يرجع و يرجع لنا شهد الأمانى

مرضانة ؟ .. ربنا معاكى يا ستى و يحميكى

و يهدى أولادك ، دا همه دواكى اللي ح يشفيك

حسدوك الأبالسة ، حالا حاجيب الطاسة و أرقيكى

و حترجعى ست التاريخ و أم الدنيا و يخسأ من يعاديكى

و يشهد ليكى بالريادة – يا حبيبتى - القاصى و الدانى

16 مايو 2011

مصر تتحدث مع ابنها

مصر تتحدث مع ابنها

- يا ولدى ليه القساوة دى منك

إياك نسيت إنى أنا أمك

نازل تكسّر و تحرق فيا و كإنك

مانتاشى ولدى و آلامى و أحزانى ما تهمك

- يا اماى لأ مش أنا ، دول شلة من السفلة

دول مش ولادك ، ولادك ما يعملوشى دى العملة

بكره حنروح على امبابة متجمعين فى شلة

فى ايدينا صحبة زهور ، حنهدى أخونا العزيز مرقس :

وردة متزوقة بالحب و خمسميت قبلة .

10 مايو 2011

الأسد أصله قطة

سوريا عليها العيون بالدمع سحاحة

كم من شهيد وقع بإيد البغى فى الساحة

أسد على شعبه و فى الجولان قطة و نعامة

يا ما نشوف م الندل لما بيستأسد ، ياما نشوف ياما

الدم غالى وأغلى م الدهب ، و لا عمره ح يروح هدر

يوم الشعوب ما تثور، نجوم الكرامة فى السما تنبدَر

ساعتها فى أوسخ مزبلة ح يرموا اللى بشعبه غدر

هوه دا درس التاريخ ، بس فين اللى يتعلم ،

و مين اللى ياخد عبر .

اللى يجاهد بياخد درس من دَرعا

عن الكفاح و النضال و البطولة ، ليها أوسع سمعة

رصفت شوارعها بالدما ، زرعت على الرصيف شهدا

لم تركع لباغى و لا لظالم ، ما استسلمت للطغاة أبدا.

لو كان لى وسيلة ،

لبوست إيد أهلها ، و بالدم أروى زرعها و أشجارها

سوريا دى جوه قلوب العرب ، و مصر و شعبها جارها

2 مايو 2011

خد بالك

خد بالك

كلمة سمعتها بودانى

و سمعها معايا القاصى و الدانى

قالها بْعلـِّــو الصوت و رددها

عاقل و متودّك و غير المصلحة ما يريدها

ثورة مضادة رموز الماضى بتشعلها

و الحزب اللى ما يتسمى بكل فلوله يؤيدها

يا شعب خد بالك ، بربك و الوطن و بدينك:

ما تديش الفرصة يا مصرى لـْعدوينك

إيدك فى إيدى ، ح نبنى مصر من تانى

دانتى أم الدنيا و أصل الحضارة و أقدم فى التاريخ بانى

19 أبريل 2011

يا جناوى

يا جناوى

صباح الخير يا ولد العم يا جناوى

لإيش الهوجة ، و إيش العزم ، إيش ناوى ؟

على مهلك دى لسه الثورة عود أخضر

بتأسى بدون قسوة جراح الماضى و تداوى

( بمناسبة ثورة شعب قنا على تعيين المحافظ الجديد )

20 أبريل 2011

مين يحب الحمار

مين يحب الحمار

كل منافق قام اليوم

وف إيده سكينة ، قادوم

يرهب بيها شباب الثورة

لجل يطفى حماس الفورة

بيقول لك فى بجاحة يا ريس

يا أفسد حاكم جبار

إن سيادته بكل نفاقه

بيحبك يا أغبى حمار

6 قبراير 2011

صح النوم

صح النوم

طال النعاس بالشباب ، يا حلوة الحلوين

لكنهم فاقوا و رفعوا الأيادى للسما ، حالفين بكل يمين

ترجع كرامة الوطن و يعيشوا حُرّين و مرفوعى الجبين

ضحوا بأغلى ما فيهم : بالحياة فى ساحة التحرير

و قالوا قـُليـِّـل عليكى يا بهية ، دانت أغلى من كده بكتير

آدى الشباب المنور فى صفحة الفيسبوك

قايم يدمـّر قلاع الضلام و الطغاة و يدُك

عرّض صدوره للرصاص و قنابل الدخان

لكنه عمره ما جبُـن و لا عمره ضعف أو خان

إيشى تساوى الحياة و الظلم حاجب شعاع الشمس

رفعوا الحناجر بالهتاف من بعد ما كان همس

ثورة يبارك ربنا فيها و تنتهى بالنصر

أرواحنا و كل ملك اليمين فداكى ، يا أمنا يا مصر

حالفين ما نرجع إلا و رافعين رايات النصر

و النيل ح يجرى من جديد و السما حتمطـّر

و الخير يعم الوطن و الشمس تبعت لنا تحياتها

و النجوم ح تـُبْرق لنا م السما و تزداد المحبة أكتر

ساعتها ح نهتف كلنا : الله أكبر

الله أكبر .

9 فبراير 2011