ســــر
سر م الأسرار حقولهولك ، كنت خبيته
بادور على قلبى فى صدرى فى مطرح ما كنت حطيته
بين الحنايا بادور و بابحث كتير، أنا مالْقيته
لو إنه جالك و هام حواليكى بالذمة قوليله
يرجع ينور و ينبض فى رحاب بيته
دا اللى يفوت داره يقل ف قيمته و مقداره
يجيلى أجيب له الدقيق و هو يصب فيه ـ يا قمرـ زيته
5 أغسطس 2011
العفو
العنف ليه بقى طبعك و القسوة يا مصرى
غيرت طبعك ؟
دا العفو كان فى الطبع شئ حصرى
و الرحمة كانت فى قلبك مع الدما بتسرى
4أغسطس2011
مرتبة الشرف
قلبى من جوه صدرى رقص من فرحته و اتخطف
لما الأميرة ارتدت تاج من دهب مترصع بمرتبة الشرف
قمة ذكاء ، و التفوق بيه القريب و البعيد سلم و اعترف
الأدب و الذوق و واخدة من كل علم بطرف
كتبت شيك على بنك السعادة و قلت له :
روح على حساب الأميرة و انصَرف
لو بسى يعرف بأمورتى رئيس الحكومة عصام شرف
لخدها وزيرة العمارة فى المحروسة .. آه بسى لو عرف !
حتبنى لنا مصر الجديدة : عمارات ، ﭭلل و قصور..
و هندسة آخر ترف
فن العمارة وقف يقول للتاريخ كلمته ثم انصرف ..
قال دى أميرة أميرة الجمال و المفهومية عن جدارة ..
مش صدف.
3 أغسطس 2011
على إيشى قاعدة تدورى
و القلب ملهوف على نظرة هنا
يصرخ يقول يا جميل إحنا هنا
قاعد و مستنى الرضا
شوف يا قمر من كام سنة
ما شايفاشى ؟
دا اللى ما يشوف ضنى الفؤاد
يبقى يا جميل أطبش
14 يوليو 2011
مع الطبيعة ..
ما تغيّريش من جمالك بحبة بودرة و روج و رتوش
أشوف عيون المها بلون الدجى حارساها سهام و رموش
و انا كل ما انظر لهم ، قلبى يسيح م الهوى و يبوش
يطب ساكت من هواه و اجرى على الطبيب :
الحق يا طبيبى و حوش
دا اللى بتجرى ورا الماكياج :
منظر و بسّى ، و الحقيقة فاشوش
من غير كوافير : شعر الجميلة حرير ، حتى و لو منكوش
أما الخدود دى هيه تفاح أمريكانى ، لكن ما هوش مرشوش
شوفوا الشفايف : دى ورد بلدى بيرقص من فرحته مدووش
بينهم سبيل ، أسدين فى الالتحام يتحولوا لوحوش
اللى يقرب حيتكهرب و يرجع منكسر مدشوش
خصوصى لصاحب النصيب ، وغيره راجع م الميدان بللوش
20 يوليو 2011
دموع
فى عيون أمى
بتهد ليه يا ولدى فى أساس بيتك
مش هوه دا الحب اللى عليه ربيتك
فى كل غنوة تقولها : يا حبيتى يا أمى
فى كل أفعالك تزيد من غمى و فى همى
عايز و عايز و عايز من غير جهاد و مشقة
من أول اللقمة إلى التعليم إلى الصحة و عايز شقة
منين يا إبنى ، و انت قاعد معتصم و متظاهر و لا بتبنى
ما باخدش منك غير كلام ، خيبت فيك ظنى
بتحبنى ؟ .. دا الحب عندك يا دوب مجرد كلمة
و مفيش جهاد ، دا العمل واجب يزيد بُه ربنا النعمة
الفرقة دبت و كله بيرفع بالشعار صوته
"بحبك يا بلدى" .. بلاشى مش عايزة هذه النغمة
قوم يا مصرى : شوف جدودك دوخوا الدنيا
علم و حضارة و قوة بالعمل و الهمة
معقولة إنك حفيد خوفو و أحمس و رمسيس العظيم ـ بالذمة
و حفيد صلاح الدين اللى جعلنى فى يوم فى الدنيا أعظم أمة
غضبانة عليك يا ولدى م النهارده ليوم الدين
إن لم تقوم و تنهض للبنا و تشمر الساعدين
أرفع إيديا للسما أدعى يا ولدى بالهداية و ما تكون من الضالين
يا رب حقق دعايا لولدى ..
يا مجيب الدعا ..
آمين
27 يوليو 2011
إيدين متشابكة
أحط ايديا فى إيديكى
و عينى باصّـة فى عينيكى
و إيدك نايمة فى كفى
و انا بالوعد مستكفى
أحط الإيد على صدرك
أحس بنبضه بيقوللى
أنا مشتاق .. يا طول صبرك
و نارى الحارة بتخللى
هوانا سر من سرك
11 يوليو 2011
