الصيام فى رجب
أقول له تعالى يمين يقول لى يا أخى لأ
أقول طيب شمال يقول لى يا أخى لأ
طيب نغرب و الا نشرق ، برضه يا أخى لأ
خلانى حطيت إيديا يا أخى فى الشق
لا عاجبه شئ فى الحياة ، إنسان عجيب أخر عجب
حتى الصيام ما بيعجبوش لو إنه كان فى رجب
الغضب باين فى وشه ، مقدور عليه و انكتب
قلت له لو إنى أشوف بسمه فى وشك :
أديك تلاتة جنيه دهب
29 سبتمبر 2010
الحيرة
الليل كما الهـِـــوّ ف سكونه
و ظلمته فارده جناحينها على السهران
الفكر بيجيبه و يوديه ، عمال يمطوح فيه
و الدنيا محيراه ماهوش عارف إيه سرها ، إيه ؟
راح للفلاسفة بيسألهم قولوا لى جواب مظبوط
أرجع و عقلى من القلق فايق .. سعيد مبسوط
قالوا له الجواب عن سؤالك ده صعب ، غير موجود
لو إنت تعرف قول لنا ، و شكرنا يبقى زايد لك و غير محدود
راح على الشعرا ، ملقاشى غير خيالات
اللى بيعشقها : دى جنته ، و اللى كارهها :غرقان فى بحر آهات
شاعر رومانسى عاشقها و نازل غزل فيها
و التانى بيقول له تغور ، دنيا الغرور ، يحمينا من بلاويها
القطب صوفى يقول الدنيا أصل الشر
مليانه شهوة و مفاتن : إهرب يا أخى و فر .
َولـّـى لسيدنا الشيخ ، عالم من العلما
" روحى فى القلق و العقل شاتت إنمـا
حيران بيسأل عن الدنيا و العلاقة بالسما "
" هيه طريق الوسط بين العدم و بين الوجود الحق"
" أوهام ؟ " ..
" لأ ماهيش أوهام ..
هيّه اختبار بنخوضه بحق و صدق
قبليها ما لك وجود حتى صدور الأمر : كن فتكون
تتمشى فيها ع اليمين بالهداية ،
أو ع الشمال إن كنت م الضالين
بعدين تسيبها و تترك لها حقها منك
روحك تروح للعيشة مع الخالدين
أهل اليمين ، و ما أدراك ما أهل اليمين
فى سعادة من رضا الرحمن ، متنعمين "
و ان كنت من أهل الشمال و العياذ بالله
آه من حياتك ساعتها وْ نصيبك م العذاب : آآآآه
رجع راضى و سعيد بالإجابة اللى فايز بيها
باصص للسما ، فين النجوم المتلألئة يناجيها
نايمة و راقدة على فرشة فى العلالى سوده يلاقيها
بيعشقها و هيه مطنشة و مش ساءلة
غيرهاشى واحدة اتعطفت ، بعتت له شئ من أشعتها
وشه اتملا بالإيمان : تقوى على نور
و الفؤاد بذكر الله اطمأن وْ صبح مسرور
5 نوفمبر 2010
يا نهاق أبيض
الأوله هاق ، و التانية هاق
و التالتة مش كل من نهق له تنهيقة تقول لى دا يبقى حمار
دا نهيقنا يا سيد صبا على سيكا على (الحجازى) كار
النهقة تطلع من القلب معزوفة بالنوتة على الجيتار
بيسرقوا منها المقامات
يغنوها مطربينكو اللى عاملينلى نفسهم قمم و كبار
و هيه أصلا نهقتين من هنا على حبة نعيرمن هناك
لا كلام و لا نغم
و الصوت أنا عارفه طبيعى بما إني يا آدمى حمار
29 سبتمبر 2010
إحنا و الحياة
بوحيلى بسرك
و سرك فى بير
و قولى الهُوَيـﱢـن
و قولى الخطير
دا قلبى يساعك
دا مخزن كبير
و ليه الحداشر
ما بين العنين
و وشك مغيم
و باين حزين
مش إحنا اللى كنا
بنملا الزمان
ببسمة بتلمع
و نكتة بتلسع
و إشراق منوّر
و ضحكة جنان
و نجرى و نلعب
كإن الدنيا لينا
فى بهجة و أمان
و حب ف إيدينا
و كان الشفايف
بتنطق نغم
و ناسية الألم
شوية صَـبا
و حبة حجاز
و ترقص قلوبنا
حقيقى بترقص
ما هواش مجاز
لا ماضى هاممنا
و بكره متاعنا
ما حدش يلومنا
ما حدش سامعنا
و مهما ادلهمت
نطنش ، نغمض
و شاريين دماغنا
و كنا بنرجا
دخول المغيب
قلوبنا بترعش
و فايضة وجيب
دا وقت الغباشة
لقاء الحبيب
و رجع البلابل
و صوت عندليب
و ليه النهارده
بقى رمز تانى
و له معنى تانى
و له طعم تانى
خلاف الشروق
بداية الحياة
نقيض الغروب
و ليه النهارده
نسينا الهزار
نخاف م النهار
و يرعب قلوبنا
دخول المسا
قوليلى بصراحة
بلاش بسبسة
تغـيّرنا إحنا
و اللا الزمان ؟
و اللا الحياة
قسيت علينا
و اللا السبب
جوانـّا ، فينا ؟
الدنيا هيّـه
لساها هيه
و الشمس طالعة
دهبى و بهية
و النخلة لسه
طارحة بلحها
و الأرض برضه
خيرها و سماحها
للى عايزها
و اللى يغيّر
من خلق ربه
شاهرة سلاحها
خللينى أسأل
تانى يا بيضة
من غير مشاغبة
و لا أى زيطة
العيب دا منا
جوانا إحنا
و اللا الحياة ؟
نستنى بكره
يمكن تكون .
فيه الحياة
أحلى و أحلى
و نعيد شبابنا
روح مش جسد
أما الجسد
رايح لحاله
و الروح دى عايشة
فى كل حالة
بعد الحياة
ف خلود للأبد
18 أكتوبر 2010
