الكورة

الكورة

ثلاثى فريق الآنسات للكورة

تشكيلة ݘـوزيه ، روعة و مسحورة

فى خط ضهرالفريق : واقفة مريومة

فرح فى خط الوسط شيكابالا و شمشونة

و فى الهجوم ݘـانا واقفة ملخومة

شوطى يا ݘـانا

شاطط جوه مرماها

كورة مجنونة

هاهاهاها

الكابتن سالم

      الكابتن سالم

سالم دا كابتن كبير فى الفرقة بيمسى

لا تقول دروجبا أو إيتو أو شيكا أو ميسى

غاوى أكل الحلاوة و البسكويت و بيشرب البيبسى

مامتو عايزاه يذاكر ، يا غادة يا ستى طنشى و انسى

سالم دا ولد عبقرى

لو إنه ذاكر فى السنة أسبوعين بسى

ح يطلع الأول و أزغرد له و يعلى م الفرح حسى

و يجيب لنا مجموع ما جابه قبله جنى و لا أنسى

و اشوفه رايح جامعته راكب شيفروليه أو حصان أو تاكسى

                                                24/2/2012

تأملات باكية

تأملات باكية


عيد جديد
قالوا ميلاد
ميلاد دا إيه ؟
دا عام بيجرى
و لا حد يعرف
و لا حد يدرىِ
العمر ينقص
و احنا بنرقص
و التورته والعة
فوقها الشموع
لو بس ندرك
لو بس ندرى
نبكى بدموع
العمر ضايع
و الناس بتلهو
و لا فيشى مانع
إن إحنا ننسى
إن الحياة
حلوة و غرورة
غانْـيَـة ومُلعب
واحنا بهبلنا
واخدينها مَلعب


أجيال بتيجى
أجيال بتمضى
و اهو كله ماشى
و اللى بيبصم
و اللى يوقع
يا دوب حضور
و اللى بيلبس
و اللى بيخلع (1)
و اللى بياكل
و اللى يجوع
و اللى بيخلع (2)
و لا حد يبقى
و لا غيره شئ
واحد أحد
فردٌ صمد
الكل يفنى
هوه اللى باقى
سبحانه وحده
هوه الإله
و لا شئ سواه
و اللى تراب
راجع إليه
روح م السما
تدخل فى برزخ


دنيانا فانية
الدهر فيها
يمضى فى ثانية
فين جدو آدم
مِنْ بعده عالم
فين سِيْدنا نوح
أجيال كتيرة
تيجى ، تروح
و الدنيا واقفة
تحكى ، تبوح
عن سر فيها
كامن فى كلمة :
مافيهاش خلود
و لا فى الوجود


يُنفخ فى صور
الكل ينهض
يمْضى حضور
الملك لك
وحدك يا رب
الأمر لك
وحدك يا رب
النهى لك
وحدك يا رب
الرحمة منك
رحمن رحيم
فتاح عليم
و لطيف بعبدك
و العفو عندك
(دموع غزيرة قبل إسدال الستار)
-------------
(1) أى يخلع هدومه
(2) أى يفلسع (هاها ) ،
أى يتكل ، أى يورينا عرض قفاه – و المعنى هنا : مغادرة الحياة الدنيا
فى عيد ميلادى
14/10/2011

الفرقة

الفرْقة

فرّقنا – من بعد ما كنا إيد واحدة فى الهدف – نفسينا

و لا نظرة منا للخطر المحيط من كل الجهات بينا

من السلوم إلى الوادى إلى الدلتا و شمال سينا

إيه جرى لنا ؟

قولوا لى يا ولاد تحوتمس و أحمس و رمسيس ، و من قبلهم مينا

بالذمة اللى انتو عاملينه ده يرضى بهية العزيزة :

دنيا أو دينا ؟

إِلْحق يا نارمر ولادك بيمزقوا الوحدة

اللى بنيتها بصبرك و بإيمانك و بحبك لوادينا

يا أهل مصر :

أمكم عايزاكو تنسوا خلافاتكم

و نحط من أجلها اْيدينا ف أيادى بعضينا

و بلاش تفرحوا فيها قلوب الأعادى

اللى النهارده باصّين علينا و شمتانين فينا

                                         21/6/2012

العفو

العفو

العنف ليه بقى طبعك و القسوة يا مصرى

غيرت طبعك ؟

دا العفو كان فى الطبع شئ حصرى

و الرحمة كانت فى قلبك مع الدما بتسرى

4أغسطس2011

الضيق

الضيق

اتملا بالأسى قلبى ، و صدرى كساه الضيق

يقولولى عليك بمرسى و غيرهم يقول لى شفيق

و بين ده و ده احتار دليلى و شتتوا فكرى

ألقاشى خبير يدلنى ع الطريق

 أو ناصح أو صديق ؟

                               15/6/2012

أبو الهول يبتسم

أبو الهول يبتسم

أبو الهول من فرحته بولاده و أحفاده

حققولو الأمل و الحلم العظيم و مراده

بصوا لشفايفه الصامتة: زوَقتها الابتسامة

يا ولادى النهارده ما عليكم عيب و لا عليكم ملامة.

ليه أيها الأحفاد من ساعة ما بنانى خفرع

و انا شاهد على التاريخ ، بانظر له و له أسمع

لما رأيتكم فى الميدان و عيونكم بالأمل تلمع

عينى أنا لقيتها مندهشة ، وفرحانه و بتدمّع .

جل اللى نصر صبركم، دا النصر المبين عنده

سبحانه ، كتبه للصادقين من خلقه و من عبده

المشكلة : ناوي على إيشى يا مصرى من بعده

مصر عايزه جهادكم يا شعبها : شدوا عزمكم شدوا

الشعب وعد العلا لحبيبته ، هيا شبابه حققوا وعده

1 يونيو 2011

الزمن

الزمن

فِضْيِتْ دماغى من الأفكار

من بعد ما كنت باصدح ع الغصون و أهاتى

هايم و باستمتع بالحياة الحلوة و زينتها

و باقبلها ملعلعة وغرورة على علتها

               و املا الفضا ساعات و ساعات بضحكاتى

و سعات م الألم و شدته تنطلق آهاتى

عشتها و مليت الفؤاد من سحرها

ضِحْكت عليا بغمزها و فتـَّحت للغى أبوابها  

و دارِت حقيقتها و أخفت عن العباد سرها

و آخرتها :

مبقاشى غير نقطة نحطها ف آخر الكلام

نحطها : على الله تكون مسك الختام

بعدها نمضى ،

بعد ما نقول لكم عليكو السلام

                                                       3/6/2012

الزائر و النابح

الزائر و النابح

زائر⁽¹⁾ على شعبه و قدام العدو نابح ⁽²⁾

يقتل فى شعبه و يسحل ، و شرعه بكل الموبقات سامح

اللهُ معاك يا شعب سوريا البطل

قدمت صورة للشجاعة و نموذج ما حصل

لا النهارده و لا بكره و لا امبارح

 ينصرك على السفاح و شبيحته ربنا

و يهوِّن عليك المذابح

--------------------

(1)          أسد

(2)          كلب                                         12/6/2012

                             

الرئيس بارومة

الرئيس بارومة

حضرة جناب رئيسنا المحترم بارومة

ونائب حضرته المبجل عبد السلام بريمة

ح يسمكروا البلد و يصنفروها

من قبل شبرا البلد لمصر القديمة

و دى مشكلة عايزة همة رجال و عزيمة

و الشعب يهتف له عاش الرئيس المفتخر ذو القيمة

و ان فشل مش مشكلة ،

حيرجع لصنعته كما رجعت  لعادتها مدام ريمة

14/4/2012

الحرية

الحرية

ماشى يشاغب فى الخلايق و يقول أنا حر

ماشى يا صاحبى ، بس من غير ما على الغير تعتدى و تضر

و لا تؤذى شريكك فى الوطن و تبدر حواليك بذور الشر

و لا تمشى فى الشوارع تقول للخلايق يا شر اشتر

و زى ما إنت يا صديقى حر ، إحنا كمان أحرار

واقفين ندافع عن الحرية ، و لو بالحديد و النار

دى مصر حرة و قيمة مصونة فى السنة و الأذكار

و بْبركة من مشى على أرضها من أنبياء أطهار

                                                   9/3/2012

انتخابات بايظة

إنتخابات بايظة

الدعاية الانتخابية :

دخلنا منافسة أنا و هيه

على رئاسة جمهوريتنا

مقرها قصر العروبة اللى ف بيتنا

و فى التلفاز، فى النايل فاميلى

وقْفِت توضح لى

و لكل أهل البيت :

راحت أم أولادى

توضح لنا و تشرح

و كان وقتنا يسمح :

أنا الشقيانة طوال عمرى

على الخدمة و حاجاتكم

اودى الواد لمدرسته

و اجيب البنت م الروضة

و اروح بمرضاكم على الدكتور

و ادادى فى ده ، و ادلع فى ده

و الاعب مين عليه الدور

و اروح السوق يابو عيالى

تبعزقى قرشى و في مالى

و لو قصّرت أحيانا

"ما ليش دعوة ، و انا مالى"

أنا شقيان على عيشكم

ملابسكم ، مدارسكم ، كمان ريشكم

أقوم م الفجر، و أروح و أسعى

أجوب على رزقى ، أرضنا الواسعة

و أرجع بيتى تمانية أو تسعة

التصويت :

و تبدأ لحظة التصويت

عيالى المتمردين : عفاريت

و غالـْبِـنّى على أمرى

و قالوا الاقتراع سرى

محاولات تزوير:

و جو لى يبيعوا أصواتهم

و شوف الصوت بكام لحلوح

بلاش تزوير يا روح قلبى

و قول صوتك بكل وضوح

إعلان النتائج :

البنت صوتها لامها

و الواد كذلك زيها

و بدون تردد

صوتى توجه نحوها

تلاتة ليها و انا واحد

دا صوتها ده اللى انا واخد ؟

دا كلنا ليك يابو الأشبال

أنا و صوتى وأصوات العيال

فى رثاء المجمع اللغوى

فى رثاء

المجمع العلمى

سلام عليك يا مونج

انت و باقى الزملا

مصيبة جديدة لانج

أعظم تراث اتنهب

من بلطجية و عملا

و وصف مصر اتحرق

و باقى التراث اتسرق

يا مصر ابكى و نوَّحى

دا الشنق فيهم أولى

العين بتبكى بالدما

صعبة الأمور إنما

شمسك ح تطلع تانى

و تحققى أحلى الأمانى

و ح ييجى يوم النصر

نهتف نقولك كلنا

تعيشى إنتِ يا مصر

و تحيا مصر

تحيا مصر