البــــــــدر
الشعر
الشعر ليل و حاطط على القِـمة
طاير بالهوا فى كل ناحية
و ساعات تجمّعه و تلمه فى لمة
جدايل حرير ملـْمَسه و الفتلة
بصيت عليه ، طار منى العقل بالذمة
القورة
القـُورة بنـّورة منورة و بتلمع
يا سلام على النور اللى طالع منها بيشعشع
عايزنى أقول الحقيقة ؟
طيب يا حبيبى بص لها و بعدين اسمع
دا انا فؤادى نظرها ، طار منى بالذمة
العينين
أما العينين ، فبلاش عنها نتكلم
أبص لهم ينجرح قلبى و يتألم
أتوه فى دنيا غير الدنيا ، و أسألهم
منين البريق اللى بينور فى وسط الضلمة ؟
و اقول سبحانه اللى خلق و أحسن خلقه
أصلى نظرتهم ، طار منى الفؤاد بالذمة
الأنف
الأنف مسحوبة رومانى
تسحر قلوب ملايين
ما فيه مثيلها ف زمانى
و لحد يوم الدين
نظرت لها كام نظره
طار الفؤاد بالذمة
الخدود
تفاحة أمريكانى
أو بالقليل لبنانى
حطوها ع الخدين
و يقول العذول آه يانى
جايبة الحَمَار دا منين
تقول لهم ربانى
عينى عليهم زاغت
و المهجة عليهم راحت
عشـْقِت جمال الخدود
على قمر موجود
فى قلبى مش فى الأرض
و اما رأيت الجمال
طار الفؤاد بالذمة
الشفايف
شايفها بكرزة متغطية
حمرا بلون الورد
مليانة ، مكتظة فرعونية
مقرّبش منهم حد
حلاوة و كمان عسلية
ح يجننونى بجد
غمضت عينى لإنى
خايف لرد الفعل
لما اشتهيت لمسهم
و انا شهيد حبهم
طار الفؤاد بالذمة
--------------------
قوليلى أعمل إيه ؟
ليه أصلا قابلتينى
عايزة تطلعى عينى ؟
ماشى فداكى العيون
و القلب اللى صبح مجنون
لكنى باتمنى
إنك تضمينى
إما إلى صدرك
أو قائمة قتلاكى
و ان مرت الأيام
بالصبر ح استناكى
و ان ُمت يا صابحة
إقرى عليا الفاتحة
16 نوفمبر 2009
No comments:
Post a Comment