يحمور(1)
عضو مجلس شِعب
افتح خريطتك تلاقى هناك ع الجنب ..
قبلى المحيط الجنوبى من نواحى الغرب ..
بلد لا فيها فساد و لا مسخرة : لا سرقة و لا نهب ..
يحمور نجح فى انتخاباتها و أصبح عضو مجلس شعب..
أصلهم هناك ما يفرقوش بين بشر و بهيم ،
كله عباد الرب .
لبس جنابه البردعة و كل ما ع الحبل ..
لاجل ما يبان اين ناس قدام الرئيس و الكل ..
و دخل بحافره اليمين ، خد له مكان فى القاعة ..
بيبيونة حوالين رقبته و منظر و زى الفل .
طرطأ ودانه عشان يسمع بداية الجلسة ..
ساعتين تلاتة خطب .. نهق :
خلاص ؟! .. لسه ..
أعضاء و قاعدين كأنهم أصنام حجر دقشوم..
و اللى بيهزر و يضحك و اللى بيلعبوا حلبسة .
أول قضية يناقشوها كانت بدل جلسات ..
اهبش يا جدع هبشة ، هات يا جدع هات ..
" طب و البلد و المشاكل و الناس اللى منتخبينكم .."
" مبقاش غير يحمور يعلمنا الأصول و الشغل و الواجبات ".
نمد قانون الطوارئ سنة ؟ .. موافقة ؟ .. آ.. موافقين ..
نفرض ضريبة على البقدونس و ع الجرجير ؟ .. موافقة ؟ .. آ.. موافقين ..
نضرب اللى كتب هذا ا لزجل شلوطين ؟ .. موافقة ؟ .. آ.. موافقين ..
تمام كده يا بقر ، الله ينور عليكو يا حلوين .
آدى قضية !! حلو .. " ح ندخـّـل مفاعل نووى "..
يحمور يقول الأصول " تشوفوا العائد السنوى .."
ما احناش فى كده بين الدول بدعة ..
و يكون مكانه بعيد هناك فى السبعة ..(1)
هربوا الجماعة م المناقشة ، أصلهم من غير مؤاخذة حمير ..
اللى يقول آه يا بطنى ، و اللى ينهـّق : عندى التهاب رئوى .
يحمور ينهق : يا إخوة ركزوا فى هذى القضية ..
صوت من بعيد ينعـّـر :" إيه البلاوى ديـّـا..(2)
الحزب قال لنا لا مناقشة ، اتكتم يا جاموسة "..
" بهيم ، ماهوش عارف إنى حمارحصاوى ..
تجيلو ألف رزية ".
طيب بلاش المفاعل :
نناقش العولمة و الارتباك المالى ..
قالوا نستدعى عالمة من محمد على
تفهّمنا العولمة و الموقف الحالى !!
العولمة مين يناقشها غير العوالم - أصلها كارهم ..
و اللى يقول طنشوا و التانى يقول وانا مالى .
يحمور يقول لهم إيه رأيكم فى أوباما ؟
" يا جدع و إحنا مالنا ، ماتبطل تلامة " ..
يا اخواننا أصبح رئيس الكرة الأرضية ..
و الله ؟ .. ياما لسه ح نشوف منه و ياما .
العضو الموقر سأل : يا ترى مين رايح اليابان ؟
فريقنا الجميل المحترم و الا فريق الصوف ؟
رد من الزريبة حمار قال أنا ملينى الخوف ..
قال الموقر : دا فريقنا حديد قوتة ألف حصان ..
ـــــــــــــــــــــــــــــــــــــــــــــــــ
(1) يحمور : اسم صديقى الحمار .
(2) السبعة : بلد على الساحل الشمالى للمحيط الجنوبى .
(3) النعير هو صوت الجواميس " جمع جاموسة " – و لا مؤاخذة .
