حمارسيدس

حمارسِيدِس

سوق البهايم رُحتها و اشتريت لى منها حمار ..

خمرى بلون الصبايا .. غـُرته بياض فى حَمـَـار ..

نِضيف كإنه ابن ناس , شعره طويل ناعم و متلمع ..

و ف وسط أصحابه ، جنابه ماشى تقيل بيتقمع ..

دا حمار حصاوى بديع الهيئة و الخلقة و المنظر

واقف فى وسط الحمير عزيز النفس شامخ و متكبر ..

همّا يا دوب سيات .. و صاحبنا مرسيدس ..

سماه صحابه الحمير : سيدنا الحمارسيدس ..

فصّـلت له عند السروجى أجمل و أبدع بردعة ..

أصلي أحب الحمار يكون مبسوط و آخر مجدعة ..

و صنعت له أجمل لجام ، فصّـلته من جلد البقر ..

آخردندشة ...

كإنه رايح يمثــّـل فيلم أو ياخدوا لحضرته حبة صور ..

همس فى ودنى الحمار و بصوت ملئ بالحزم و الإصرار :

إوعى تهزأنى ، و لازم تنادينى بـ : " يا سيد حمار " ..

نبقى حبايب ، و اكون حمارك و مخلص ليك دايما تمللى ..

و أكون صديقك و خدامك و أشيلك جوه فى عينيا ..

أصلى حمار نفسى عزيزة و كرامتى أغلى من الدنيا عليا .

ركبت عربيتى الحمارسيدس و مشيت أتفسح على الكورنيش ..

فسحة جميلة فى الصباح زيها فى الوجود و الراواقة : يوك ، مافيش ..

ماشية مزيكا على الكورنيش بتتمايل و تتعايق ..

و البشر محشورة فى الأتوبيس حواليها ، متضايقة بتتخانق ..

و التاكسيات متــْمردة على كل مزنوق رايج على شغله ..

و الدنيا متبعككة : تكاتك ، بشر ، سيارات : كله على كله ..

و انا اللى ماشى لوحدى فى الرواقة ، عفارم يا حمارسيدس ..

إيه رأيكم لو تعملوا زيي ، بلاها فيات و بيجو و مرسيدس ؟ ..

وقـّفنى فى وسط الطريق شرطجى ، رتبته شاويش ..

- اركن على جنب يا محترم من غير شوشرة و لا تشويش ..

الرخصة يا محترم فين !! ..

* أنا قلت له يا حضرة الباشا : ..... ما عنديش ..

ـ قال لى سيارتك عوادمها بتلوث البيئة ..

* سامحنى النوبة دى يا باشا ما يوقعك ربنا فى ضيقة ..

ـ لا بد نعمل لها فحص الكمبيوتر على الشاكمان ..

* دى لسه شاريها يا باشا م الأجنس ، و معاها كارت ضمان ..

شاورت نفسى كتير : أراضيه بكام لحلوح ؟ ..

إكرام يا عالم ، هو الكرم فى بلدنا مش مسموح ؟

تم التفاهم بسرعة : إفراج عن العربية و السواق ..

و إيدى ع الكلاكس ، انطلق ينهق و هاقْ يا حبيبى هاق ..

مريت على بنزينة أفـَـوِّل با لتبن و البرسيم ..

و سقت سيارتى و جرّشتها ف زريبة إيجارها جنيه فى اليوم ..

ح تقولوا لى يا جدع فيه حد يركب فى الزمان ده حمار ؟

أقول لكم : حمارتك العرجة أفضل من سؤال خبيث و لئيم !!

8 نوفمبر 2007