ليه الغضب ؟!
جمعة غضب !!
قولوا لى يا ناس :
إيش يكون السبب
حققنا معظم حلمنا ،
و الباقى على ورق الزمان
كله بأوان
مسطور و متقدر و انكتب
عارف :
هيه ثورة فى قلوب الشعب و عقول الشباب
إللى غاب
تلت قرن مغيبينه فى السجون
و اتهام إنه سطحى ، و اتهام بالجنون
معتقل فكره و مسجون العواطف و النفـَس
ما بين حبيب العادلى مرات ، و بين أنس
و النهاردة مصر عادت لابن مصر
أحلى و أجمل ما تكون فى أى عصر
ماشيين فى طريقنا ، و البُـنا قايم و جارى
على كتفى أنا المسلم
مع القبطى ، أخويا أنا و جارى
و العدل ماشى كعهده صارم قوى و دقيق
على كل ظالم ، مش محابى رئيس سابق أو صديق
فرصة يا عالم للبلد ترتقى و تنهض
بالصبر و الإيمان و الحب ، لا نكره و لا نبغض
و اللى ظلمنا سنين مسيره بحبل و فيه ح يتعلق
بالعدل و بحكم القضا ، و الله بعدله ح يقضى و ح يوفق .
27 مايو 2011
No comments:
Post a Comment