دماء على القضبان
بالدم ع القضبان ، القطر كاتب بعجلاته :
"هنا تمت جريمة"
نفذها شيطان فاجر رجيم بأدواته
من الإهمال وْ فَكّرنا بأحداث زيها
قاسية و أليمة
إبكى و نوَّحى عليهم يا عيون مصر
بدل الدموع دما
زهرات ،
الحياة كانت بتنده عليهم
تعالوا بابتساماتكم و عيشوا الدنيا
جميلة منعمة
الضحك كان م القلوب الصافية طالع مجلجل
و الدنيا كانت جميلة و السعادة محوطة بالكل
فجأة ، زلزال وقع بتقله على الأوتوبيس : طاخين و طاخ
الضحك اتنقل لصراخ
و اتحولت دنياهم من الوردى للون الدم
و اللى أصيب صرخ بصوت مهوش طالع :
إلحقنى يا بويا و جرجرنى م البلا دا يا عم
البلد بزيها اتحولت إلى ميتم
و السواد كاسيها من راسها و حتى القدم
ما أسوؤه لون السواد و طعم الحزن
مع صوت البكا و الألم
الله يصبر أهلهم و ذويهم
و يعوض على أمهم و أبوهم
و يقبلهم مع الشهدا
و يعيشوا فى الجنة
حياة الأتقياء السعدا
18 نوفمبر 2012
No comments:
Post a Comment