أنا ربكم الأعلى

أنا ربكم الأعلى

كلاكيت أول مرة

وقف على الصرح اللى بناه لحضرته هامان

و قال لقومه "أنا الإله اللى منِّت عليكم بطلعته الأزمان"

بيستخف بيهم فى شموخ الغطرسة وْ كمِّـل معلنا ، قال :

" ما أريكم إلا ما أرى يا أيها القطعان"

أنا ربكم الأعلى

كلاكيت تانى مرة

التورتة لهطها بشمعها و قرقش المعازيم

ما خَلّلى تنتوفة لغيره و لا حتة بمليم

و ابقوا قابلونى بقى لما يظهر لمصر

دستورها المرتجى الجديد المستديم

منه لله يناير و يوم خمسة وعشرين

قلنا خُلصْنا للأبد من ظلم و استبداد ،

كبسوا على أنفاسنا م السنين ستين

هبّ الشباب و الشعب كله هَبة أسود وْ شُداد

و الأمر أصبح بإيدنا و الأمل يزداد

و البشر طلوا علينا و الفخر بين العباد

و ف ليلة ضلمة طلع يقول لنا  "مفيش غيرى

الأمر ليا و ليا النهى و الشورى من تدبيرى

و كلمتى قانون نافذ و مقولتى دستور و تشريع

و اللى ما يرضى بقولى ، يا عينى عليه ح يضيع

فاكرينه لما قال لهم : أنا ربكو الأعلى ؟

و ازدراهم و استذلهم و استعلى

سامحونى : دا كان جدى و أصل العرق دساس

وراثة منه و دا حقى

ورُّونى راح تعملوا إيه ، اتفلقوا بقى يا ناس "

بمناسبة قرارات محمد مرسى فى 21 نوفمير 2012

مصطفى درويش سلام