البرنس يحيى

البرنس يحيى

بالمنتدى

البرنس يحيى

: على وزن سينية البحترى

( صنت نفسى عما يدنس نفسى .. و ترفعت عن ندى كل جنس )

:و معارضة أحمد شوقى

( اختلاف النهار و الليل ينسّى .. اذكرا لىَ الصبا و أيام أنسى )


( ردا على يحيى زكريا فى منتدى أبناء مصر )


يقـول بإنه حــتة برنــــــس ِ.. و ما فى مصرَ أى ٌ من برنـــــس

دعاوى لا أسـاس لها و لكن .. خيـــــــــالات يراها حين يمــسى

فيا يحيى بن زكريا تمـــهل .. أتيت بما لم يأت من جـــن و أنس

تقول بأنك الفقـــــران دوما .. فماذا قد جــــــــــرى لك منذ أمسِ

فعـد مثلـنا يا عـم يحـــــيى .. غــداك كــوارعٌ أو صـــحن عدس

على طبلية ٍ: بصل و فجل .. هو " الأورديفر " و بعــض خس

أراك غدا ستحلم إذ سالومى .. تحيطك يا أخى بخـــــــليع رقص 1

يدور دماغك الذهبى طـربا .. فتنحـره البــــــغى بوقــت أنــــس

على طبق تقدم رأس يحيى .. و تبدع بعدها حفـــــــــلات عرس

--------------------------

(1) سالومى هى الراقصة التى اتفق معها اليهود على أن تقتل سيدنا يحيى بن زكريا ، ففعلت و
قدمت رأسه على طبق من ذهب .

لامية امرؤ القيس

رائع يا أستاذ يحيى .. بس ليه تقسى على نفسك بالشكل ده ؟معذرة لست أنا الذى يكتب الرد

عليك .. بل :امرؤ القيس .. فلا تلمنى

قفا نبك من ذكرى حبيب و منزل .. بسقط اللوى بين الدخول فحومل


قفا ننظر

قفا ننظرإلى يحيى الجمــيل الفللى

ِ.. إذ يدّعى أن قد بنى فى الحُلم أجمل منزل

و تخيلوا أن قد دعانا للزيارة مرة

..فى فيللة ليست سوى عشيش ذابل متفشكل

ِكيما نصلْ لا بد نقفز فوق طوب للحماية من مياه الصرف

، إذ لا رصيفا نعتلى

و يزفنا جمع من الأطفال يصرخ بالأذى

..فنقول ابعد يا ولد يا جحش يا بن القرنـــدلى

إن الذى يقطن مثل هذا المــــنزل

.. سيصــــــــير حتما فى الحياة تـَرللى

لكن أجمل ما بيحيى من خصال أنه

..فى الشـــعر طعمُ فرولة و أريج زهرِ قرنفل

أيا يحيى : كثير كل هذا التبهدل

.. و إن كنت قد أزمعت الهجاء فأجمل

ِ..يا أخ يحيى قد بلغت ذرا القساوة ضد ذاتك

.. لِمَ يا صاحبى الموهوبَ:قفْ و تمهل

أنت الثرِىّ طوال عمرك بالقوافى و أفكارٍ عذارى

:قبل شعرك ، شاعر لم يَجتلى

أيعوزك الرأى

لا تقطن بتلك الفيلة الصغرى ، بل بقصرمنيف مهول شامخ علِ









مصطفى سلام
29 ديسمبر 2007

تعقيبا على زجلية يحيى زكريا بمنتدى أبناء مصر

حماريات

حا يا حمار
(مناقشة مع حمار)

نهّــق صديقى ف يوم نهيقة

قال دا قلبى فيه حريقة

من زمان غادر ما سابشى

من ركب راكب و لا اللى

.ع القدم ساير يسير

نهـّق صديقى ف يوم و قال

ميت ندامة ع الزمان

فسد الضمير و الوضع مال

.مبقاشى فى الدنيا أمان

نهّـق حمارى ف يوم و قاللى

ليه انت يا صاحبى تمللى

نازل كلام مليان و فاضى

إوعى تكون فاكر كلامك

.راح يغير فى الأمور

طب خد يا صاحبى منى عبرة

حتقول حمار ؟ ... لكنى خبرة

حاطط لسانى جوه خشمى

راح تلاقى ضهرى كله

مليان جروح تؤلم بتدمى

رغم ده .. شايل و ساكت

آهين يا قلبى يا كتاكت

باشتغل طول النهار

علشان عودين برسيم و فول

(يترموا لى فى الطوالة .. (1

ولا فيشى شفقة و لا قوالة

و لا حتى خد كل يا حمار

(بالليل زريبة تلم عضمى ..(2

أتخمد فيها و انام

.و آهى أى نومة و السلام

انتوا بتشكوا م البطالة

و احنا من نقص العمالة

عندكم سكان كتير

و احنا نقص من الحمير

:و عشان كده نازلين علينا

طاخ و طيخ ، حا يا حمار

طيب يا صاحبى خد قرار

ليه بس راضى تكون حمار

لو كنت تجمع يوم حميرك

ثورة و اضراب و اعتصام

رفص و نهيق ، وخطب .. كلام

مش راح يلاقوا حد غيرك

.يركبوا .. يشدوا اللجام

شكلوا لجنة حميرى

الأمرده قطعا ضرورى

حتى تدافع عن حقوقكم

(خاطِبوا السيد كى مون ..(3

يبعت لجان تدرس أراءكم

و اعملوا ع النت موقع

فيه المخاوف و الظنون

و المطالب و الشكاوى

:و ان كنت فعلا انت ناوى

سيد قراره فى بلدنا

روحوه ح تلقوا الكل غاوى

يسمع ، يوافق ع الحلول

من غير مناقشة و لا قوالة

راح ينصفوكم يا حبيبنا

أصلهم من غير مؤاخذة

.فطروا كمثلك عيش و فول

---------------------------
(1) طقم السيرفيس اللى يقدم فيه الطعام للبهايم
(2) الزريبة هى الـ Bed Room الخاصة بالبهايم
(3) أمين عام الأمم المتحدة




حمار بيحب

اندلق حمارى الخبيث فى هوى حمارة

ساكنة قريّب مننا , يعنى تعتبر جارة

يحْرن عليا و لازم يوماتى يعاين زريبتها

و يقوللى لو كنت دقت الهوى ، ح تبوس حيطان بيتها

ينْـهق نهيقة من قلبه المتيّم ، يتقطـّع لها قلبى

أقول له تجلد يا حمار ، يقول آه يانا يا غلبى

أقول له إيه العمل يا حمارى يقوللى نطلبها

و نروح لأصحابها و ندفع مهرها و نخطبها

مأذون كبير المقام يكتب لنا كتابنا

و ف ليلة صفا نعملها ليلة الحنة

و نعيش ليالى فرح ما شاف زيها حمار

و نـْـأجر زريبة مفروشة تبقى لنا السكن و الدار

حفل الزفاف راح نعمله ف أجملها صالة فى البلد

ْلم يعمله قبلنا بقر أو جاموس أو أيتـُها أحد

و يسجلوها فى العجايب ضمن موسوعة جينيس

ترقص لنا فيهاهياتم و تغنى نانسى لنا أو أليس

أحلام حمار ماهوش فاهم أمور الحياة كِيف ماشية

ماهوش عارف معاناتى لتوفير العلف لأمثاله من الماشية

قال إيه ح يتجوز و يخلف لنا كمان جحشين

أجيب لهم أنا سكن و غذا و كساوى و شيبسى بسى منين ؟

3 مارس 2008

!جحش الحكيم

تقوللى ديل الكلاب اتعدل .. أقول لك ما يمنعشى

تقوللى فيه غول و عنقا و وفا .. أقول لك يجوز ، يمشى

تقوللى فلان اللى فى بالك و بالى اتعدل .. أقول لك ما ينفعشى

تقوللى أحلف لك على كده .. أقول لك ما اصدقشى

!!يا بنى المنوفى لو يتعدل .. ينطق فلسفة جحشى

حمارسِيدِس

سوق البهايم رُحتها و اشتريت لى منها حمار

خمرى بلون الصبايا .. غـُرته بياض فى حَمـَـار

نِضيف كإنه ابن ناس , شعره طويل ناعم و متلمع

و ف وسط أصحابه ، جنابه ماشى تقيل بيتقمع

دا حمار حصاوى بديع الهيئة و الخلقة و المنظر

واقف فى وسط الحمير عزيز النفس شامخ و متكبر

همّا يا دوب سيات .. و صاحبنا مرسيدس

سماه صحابه الحمير : سيدنا الحمارسيدس

فصّـلت له عند السروجى أجمل و أبدع بردعة

أصلي أحب الحمار يكون مبسوط و آخر مجدعة

و صنعت له أجمل لجام ، فصّـلته من جلد البقر

... آخردندشة

كإنه رايح يمثــّـل فيلم أو ياخدوا لحضرته حبة صور

:همس فى ودنى الحمار و بصوت ملئ بالحزم و الإصرار

"إوعى تهزأنى ، و لازم تنادينى بـ : " يا سيد حمار

نبقى حبايب ، و اكون حمارك و مخلص ليك دايما تمللى

و أكون صديقك و خدامك و أشيلك جوه فى عينيا

.أصلى حمار نفسى عزيزة و كرامتى أغلى من الدنيا عليا

ركبت عربيتى الحمارسيدس و مشيت أتفسح على الكورنيش

فسحة جميلة فى الصباح زيها فى الوجود و الراواقة : يوك ، مافيش

ماشية مزيكا على الكورنيش بتتمايل و تتعايق

و البشر محشورة فى الأتوبيس حواليها ، متضايقة بتتخانق

.و التاكسيات متــْمردة على كل مزنوق رايج على شغله

و الدنيا متبعككة : تكاتك ، بشر ، سيارات : كله على كله

و انا اللى ماشى لوحدى فى الرواقة ، عفارم يا حمارسيدس

إيه رأيكم لو تعملوا زيي ، بلاها فيات و بيجو و مرسيدس ؟

وقـّفنى فى وسط الطريق شرطجى ، رتبته شاويش

اركن على جنب يا محترم من غير شوشرة و لا تشويش

!!الرخصة يا محترم فين

* أنا قلت له يا حضرة الباشا : ..... ما عنديش

قال لى سيارتك عوادمها بتلوث البيئة

* سامحنى النوبة دى يا باشا ما يوقعك ربنا فى ضيقة

لا بد نعمل لها فحص الكمبيوتر على الشاكمان

* دى لسه شاريها يا باشا م الأجنس ، و معاها كارت ضمان

شاورت نفسى كتير : أراضيه بكام لحلوح ؟

إكرام يا عالم ، هو الكرم فى بلدنا مش مسموح ؟

تم التفاهم بسرعة : إفراج عن العربية و السواق

و إيدى ع الكلاكس ، انطلق ينهق و هاقْ يا حبيبى هاق

مريت على بنزينة أفـَـوِّل با لتبن و البرسيم

و سقت سيارتى و جرّشتها ف زريبة إيجارها جنيه فى اليوم

ح تقولوا لى يا جدع فيه حد يركب فى الزمان ده حمار ؟

!!أقول لكم : حمارتك العرجة أفضل من سؤال خبيث و لئيم

(1)حميرستان

بلدى أنا عليها بالنواجذ عاضض

...الأمن كابس على أنفاسها و على صدرها رابض

..و على لسان أهلها و على رقابهم قابض

..لو قلت حتى بم .. أو كلام فى السياسة ملوش ضابط

..حتلاقى مليون عسكرى حواليك و ألف و تسعميت ظابط

.قررت أطفش و اهاجر و أترك الأوطان

(..و لقيت بلد حلوة و طعمة بأهلها و اسمها حميرستان (2

قابلنى أهلها بترحاب و عزفوا لى مارش نهيق

..أهلا و سهلا بيك عندنا يا أعز صديق

..فرشوا لى على أرض موقفهم بساط برسيم

.. (3)و اصطفوا طابور شرف : بهيم و جنبه بهيم

..و اتقدم إلىّ زعيمهم : حمار وقور و حكيم

..وفرد لى ضهره : بردعة مدندشة ع الموضة

..و صحبة ورود يقدمها لى حصاوى جايبينه من الروضة

.نزلت ضيف محترم على قصر الضيافة

..زريبة بحرى مرتبة و آخر لطافة

.بعد التحية و الكرم و الذى منه

..كاسين عصير برسيم مفتخر

.. لا تسأل كتير عنه

..خدنى الزعيم نحضر سوا مجلس الأعيان

..رئيسه حمار فصيح النهيق .. منطلق .. حلو اللسان

..دار النقاش و الكلام عن حماية الحيوان

(4)..و النقص اللى قائم فى العليقة و قسوة الإنسان

.. و حمارة قامت تدافع عن مصالح الحميرات

..و الظلم اللى عليهن انكتب و الضرب و الإهانات

..و التانية قامت تقول الزريبة من حقنا يا حمير

..إن كنا حاضنين جحوش بترضع ، و دا مش علينا كتير

..قام الرئيس ، قال نحوّل المشروع

..للجنة الفتوى فى المجلس و لجنة التشريع

..اللجنة قالت مفيش مانع ، و يعرض على التصويت

..أيه رأيكم يا حمير ؟ .. موافقين ؟ .. نهيق و صويت

...ديمقراطية فى الحوار تحترم ، حرية فى التنهيق

..و بدون مجاملة للرئيس ، و بدون وساطة للصديق

..و زريبة الرئاسة زرتها طبعا فى ميدان جاحشين

..ع الجنب نايمة المحافظة ، و الشجر أخضر على الصفين

..و خدونى فى كارّو فيات موديللها

2000متزوقة و متدندشة و يجرها حمارين

..و القوة و السرعة و الدفع ع الأربع

..و سارينة حمّـارى ليها البعيد يسمع

(..قوتها يا محترم عشرتلاف (دى سى بل ) .. (5

تزيد يا صاحبى و لا تضعف و لا تقل

.فى المسا ، أخدونى حفلة راقصة ف دار الفنون

..أحيتها ليا الراقصة حماريتا و المطربة جحشون

..و قعدنا نمرح و نضحك و النهيق حتى الصباح

..و ملينا ليلنا بالطرب و الرقص و اللهو المباح

.يا أهلنا : إيه رأيكم لو تحصلونى فى حميرستان ؟

..تلقوا الطيابة و إخلاص أهل البلد : لا زور و لا بهتان

..لا فيها أمريكا بتتحكم و حلف الناتو

..و لا انجلترا و فرنسا ، دا اللى اختشوا عندهم ماتوا

...و لا أمن مركزى عندهم و لا أمن دولة

(..و لا اعتقالات و سجون بتستقبل علَََـَـوْ لة ...(6

و الأمن فيها مستتب : لا حمار بيشتم و لا فيها رفس

(..لا تقوللى دا حمار و دا آدمى .. ماهو كله نفس الجنس (7

بس اللى ييجى يكون فى مستواهم فى صبرهم و طيبة النفس

..إيه رأيك يا صاحبى : دى الحياه فيها هنيّـة

(..حتقول أعيش وسطهم دايما و ما ارجعشى نهاقيا (8

(اللى يعوز ييجى .... يحجز فى حمار سبعة (9

(يوصل لنا فى تلات تيام أو تسعة (10

حاستنظره فى الموقف الدولى أرحب بيه

..و يلاقى كل الحمير تاخده بالحضن .... تقبـّـــل فيه

.----------------------------------

(1) ستان : تعنى بالأردية و الفارسية : بلاد أو أرض (2) تقع

فى الشمال الشرقى لجمهورية برسيملاند فى النصف الجنوبى لكرة القدم . (3) موقف الحمير

يعادل المطار الدولى أو موقف الأتوبيسات عند البنى آدمين . (4) العليقة : طعام البهائم و

يتكون من التبن و الكسب و الفول المجروش و يعادل الكشرى عند الإنسان .. (5) مقياس قوة

الصوت . (6) علولة : يعنى على ودنه . (7) يقول أرسطو إن (حيوان ) جنس ، أنواعه :

إنسان ، أسد ، حمار ، ألخ (8) نهاقيا = نهائيا و لكن بالفصحى !! (9) يقوم من موقف القاهرة

الدولى الساعة السابعة (10) حسب سرعة حمار الساعة سبعة

وساوس حمار

حوار دار بينى و بين حمارى
( بمناسبة ضبط جزارين يذبحون الحمير فى مجزر البساتين )

* خايف فى يوم تقل فى عقلك و تدبحنى

زى اللى حصل فى مجزر البساتين

يقرص عليك الجوع ، تطبخنى و تاكلنى

.انتم كده يا بشر : عاقلين على مجانين

- ما تخافشى يا حمارى العزيز دا انت حبيب قلبى

* خايف يا صاحبى ، دا عمرى مش بعزقة ، إن راح أجيبه منين ؟

- أحلف لك براس أبوك إنى ما اخونك أبدا

* مش ممكن أصدق بشر أبدا ، لو حتى حلف لى يمين

ماما قالت لى البشر ، إوعك تصدقهم

دا الكدب فى دمهم ، و الغدر طبع دفين

قل لى يا صاحبى : رايحين كده على فين ؟

!!يا نهار مقطرن !! .. مش ده طريقنا للبساتين ؟

14 مارس 2008



(يحمور(1

عضو مجلس شعب

افتح خريطتك تلاقى هناك ع الجنب

قبلى المحيط الجنوبى من نواحى الغرب

بلد لا فيها فساد و لا مسخرة : لا سرقة و لا نهب

يحمور نجح فى انتخاباتها و أصبح عضو مجلس شعب

أصلهم هناك ما يفرقوش بين بشر و بهيم

.كله عباد الرب

لبس جنابه البردعة و كل ما ع الحبل

لاجل ما يبان اين ناس قدام الرئيس و الكل

و دخل بحافره اليمين ، خد له مكان فى القاعة

.بيبيونة حوالين رقبته و منظر و زى الفل

طرطأ ودانه عشان يسمع بداية الجلسة

:ساعتين تلاتة خطب .. نهق

خلاص ؟! .. لسه

أعضاء و قاعدين كأنهم أصنام حجر دقشوم

.و اللى بيهزر و يضحك و اللى بيلعبوا حلبسة

أول قضية يناقشوها كانت بدل جلسات

اهبش يا جدع هبشة ، هات يا جدع هات

" طب و البلد و المشاكل و الناس اللى منتخبينكم "

" مبقاش غير يحمور يعلمنا الأصول و الشغل و الواجبات "

نمد قانون الطوارئ سنة ؟ .. موافقة ؟ .. آ.. موافقين

نفرض ضريبة على البقدونس و ع الجرجير ؟ .. موافقة ؟ .. آ.. موافقين

نضرب اللى كتب هذا ا لزجل شلوطين ؟ .. موافقة ؟ .. آ.. موافقين

.تمام كده يا بقر ، الله ينور عليكو يا حلوين

آدى قضية !! حلو .. " ح ندخـّـل مفاعل نووى "

يحمور يقول الأصول " تشوفوا العائد السنوى "

ما احناش فى كده بين الدول بدعة

(و يكون مكانه بعيد هناك فى السبعة ..(1

هربوا الجماعة م المناقشة ، أصلهم من غير مؤاخذة حمير

.اللى يقول آه يا بطنى ، و اللى ينهـّق : عندى التهاب رئوى

يحمور ينهق : يا إخوة ركزوا فى هذى القضية

(صوت من بعيد ينعـّـر :" إيه البلاوى ديـّـا..(2

الحزب قال لنا لا مناقشة ، اتكتم يا جاموسة "

" بهيم ، ماهوش عارف إنى حمارحصاوى

"تجيلو ألف رزية

:طيب بلاش المفاعل

نناقش العولمة و الارتباك المالى

قالوا نستدعى عالمة من محمد على

!!تفهّمنا العولمة و الموقف الحالى

العولمة مين يناقشها غير العوالم - أصلها كارهم

.و اللى يقول طنشوا و التانى يقول وانا مالى

يحمور يقول لهم إيه رأيكم فى أوباما ؟

" يا جدع و إحنا مالنا ، ماتبطل تلامة "

يا اخواننا أصبح رئيس الكرة الأرضية

.و الله ؟ .. ياما لسه ح نشوف منه و ياما

العضو الموقر سأل : يا ترى مين رايح اليابان ؟

فريقنا الجميل المحترم و الا فريق الصوف ؟

رد من الزريبة حمار قال أنا ملينى الخوف

قال الموقر : دا فريقنا حديد قوتة ألف حصان

ـــــــــــــــــــــــــــــــــــــــــــــــــ
(1) يحمور : اسم صديقى الحمار
(2) السبعة : بلد على الساحل الشمالى للمحيط الجنوبى .
(3) النعير هو صوت الجواميس " جمع جاموسة " – و لا مؤاخذة .


يحمور فى السيما

حمارى العزيز قال لى يا بو الدراويش

تعالى الليلادى ، نتفسح على الكورنيش

(أنا قلت فاكر يا حمار لما اشتريتك نوفى ..(1

رحنا نتفسح قبض علينا فى الطريق : شاويش ؟

قال لى بلاش الفسحة ، أنا نفسى أروح السيما

عايز أشوف حكاية حلوة يكون عليها القيمة

أنا قلت له أجيب لك شريط فيديو و بلاها زحام

وانزّل لحضرتك من على النت آخر الأفلام

قال لى أنا نفسى أروح و اندمج فى القعدة مع الجماهير

!!و اقعد أبصبص ع المزز ، دانا عقلى خلاص ح يطير

قلت له يا حمار البين : تبصبص ؟ .. انت نسيت أصلك ؟

ليه بننسى أصلنا ؟ .. آه يانا آه منك ؟

دا انت أصلك حمار و همه ( كلاس ) و ذوات

(قال لى مانا أرستقراطى و عيلتى كويسة وذوات !! (2

قلت له يا بن الحمار إمشى على زريبتك ما تدلعشى

قال لى ما تشتمنيشي لارفسك و أكسحك ما تقدربعدها تمشى

قلت له يا حمارى الحبيب عفوا .. خلاص يا صاحبى ما تزعلشى

مافيشي فايدة من المناكفة ، أخدت يحمورى على السيما

بيمنى نفسه بسهرة ممتدة للصباح حلوة و عظيمة

ماشى الحمار و حاطط حافره فى دراعى

و الناس متجمعين يسألوا ؟ .. أقول لهم يحمور دا ملكى و بتاعى

و هوه مش همه اندهاش البشر ، و لا وضعى بيراعى

ما كنا استكنينا فى دارنا ياحمار مفيش للهيصة دى داعى

ع السيما رحنا و قطعنا التذاكر .. دخلنا ع البلكون

ما بين نأورة و شتايم: إيه ده اللى جايبه يا مجنون

الحفلة خلصت أخدنى الحمار و حط دراعى فى إيده

مستواكم منحدر فى الفيلم يا صاحبى : لا قصة و لا تمثيل

طب دا أحمر حمار عندنا يخرج لكم سيده

و الا الولد دا اللى بيغنى و يرقص زى فرقع لوز

صدقنى افتكرته قرد شمبانزى ماسك سباطة موز

تعالى و اسمع عندنا طرب أبدا ما تسمع فى حياتك مثله

مزيكا و نهيق عربى ، أوروبى و أمريكانى .. كله على كله

(لا تقوللى سيكا و بياتى و صبا ، دا نغم حُمـَارى كار .. (3

(راح أسمّعك حمورة : نهيقها شامل جواب و قرار .. (3

أروع كتير من صباح و وردة و أسمهان ، و حتى ليلى مرار

.مراد دا يبقى اسمها ... افهم بقى يا حمار
------------------------------
(1) نوفى = جديد
(2) ذوات عن ذوات تفرق فالحمار من ذوات الأربع .
(3) مصطلحات فى علوم الموسيقى .
4 مارس 2008

دردشة

فى الأنتريه

فى يوم

ساعة عصارى

فى الأنتريه

:قاعدين سوا

أنا و حمارى

و حمارى دا ناصح خبيث

عايز يبادلنى الحديث

قعدة صفا

:قال لى يا مصطفى

بتهينوا ليه صنف الحمير

إمشى فى الشارع راح تسمع كتير

:اللى بيشتم في أخوه

و يقوللوا روح يابن الحمار

ترضى فى يوم : أشتم بهيم

أو حمار غلبان يتيم

و اقول له غور يا بن البشر ؟

و انتم يا صاحبى ، خُرْجين معايب

قـُـفـة عِـبَر

.و اللى بيته من قزاز ، ليه يرمى غيره بالحجر

هل شفت فى يوم

جحش بيحارب حمار ؟

أو حتى الحمير أشعلوا للحرب نار ؟

أو مثلا رفعنا ف وش بعضينا الحراب ؟

دمرنا وْ قتلنا زى ما عملوا الكلاب ؟

( عذرا لكم و بشدة يا صنف الكلاب )

وف غزة الصمود ، نشروا البلاوى و الخراب ؟

فيه حد يعمل كده إلا ابن آدم

و كمانى فى الغابة فيه بعض الوحوش

.الأصل فيكم طمع مدهون و مزوقاه حبة رتوش

،بعدها ، و بكل عين متبجحة بتهينوا أصناف الحِوان

و احنا زمايل فى الحياة بنمدكم بالغذا

و الزينة و الشغل الشقى

.و الأمان


14 فبراير 2009

رد على جمعة

ياااه اد ايه جمعة ده طيب وانسان في حاله وعلي قده

ربنا يديم عليه نعمه ويرزقه ويرزق عياله ويرزق كل اللي زيه

استاذي القدير مصطفي ممكن واحد سحلب لو سمحت؟؟ هههه

لا بجد اسلوبك جميل جدا في صياغة الموقف وكأنني اري المشهد امام عيني

ربنا يرزقك الخير يا رب تحيااااتي
( تعليق السيدة أم أحمد من هولندا )

الرد
أحلف لك لا بهزر و لا باكدب و لا بالعب

..تعالى يا ستنا شرفى مصر و اسقيكى تلاته سحلب

..و شوفى بعينك عم جمعة .. كاتم فى عينه الدمعة

..و الآهه فى قلبه ، و لا فيشى مين يرحمه ، و لا فيشى ناس سامعة

.كل التقدير لابنتى الغالية أم أحمد .. و العزومة على السحلب قائمة لمدة عام واحد من تاريخه!!!ه

هاهاهامصطفى سلام

جمعة القهوجى

جمعة القهوجى


جمعة جدع قهوجى على زباينه رايح جاى

لابس هدوم اشتكت و الجزمة بتصرخ : جاى يا عالم جاى

الفقر عشش فى بدنه من ساسه إلى النغاشيش

أجرة مفيش ، هيه يا دوبك حتة البقشيش

فى الفجر يبدأ شغلته و حتى نص الليل

و ن اشتكى مرة ، يلقى المذلة و البهدلة و الويل

راجل قليل البخت فى الدنيا : إن ما اشتغل ح يجوع

ما فيشى حاجة اسمها مرض ، و لا مصلحة ، و لا حاجة من دا النوع

مكوك يدور الساعات : أيوه ، حاضر ، جاى

قهوة و شيشة هنا ، عندك تلاته شاى

حافظ زباينه و طلبهم ، متعرفشى يا أخينا إزاى

جهز لنا الطاولة يا جمعة و وضب لنا القعدة

أنا الليلا دى ح انتقم م الحاج اسماعيل سعدة

الدومنه يا جمعة ، الماتش راح يبدأ

راح أدمر سعيد الليلا دى و أكتمه ما ينطق

نزّل لنا يا أخينا عدة الشطرنج

.إحنا بقى عايزين لنا كوتشينة جديدة لانج

من لخمته وقعت من إيديه كباية القرفة

" راح أحسب تمنها عليك أو تدفعه أو تشوف لك صرفة "


و آخر الليل يروّح لأهله و الشقا هده

لا عارف راسه من رجليه و لا ودنه من خده

يدعى الكريم : ديمها علينا نعمة

.دى رزقى و رزق أولادى : بتوفر لنا اللقمة


16 يونيو 2008

رد

ردا على عصام علم الدين بالمنتدى فى تعقيبه على

" الجنيه بيعيط "

(يا سلام يا سى عصام لو يعود للجنيه دورو.. (دوره

لا تقوللى دولار و لا ين و لا مارك أو يورو

..يقعد على القهوة و مادد فى رجله جزمته

..يبوسوها البُـعاد دول و يوطوا مذلة لعزته

..ساعتها نروح نشترى بمليم أرواح و كرملله

" ..و يمد الدولار للجنيه إيده : " يا محسنين لله

الجنيه بيعيط

الجنيه بيعيّط

قاعد على القمة و حاطط رِجـْـله على رجله
سِيدْنا الدولار و كل الدنيا خدامة من أجله
و انا الجنيه اللى ما يسوى يا دوب بصلة
جابوا الأطبة تعالج علته ، خيبت أمله
دانا كنت أساوى زمان كبشة من الدولارات
أعمل عمايل يقول الناس يا عينى على عمله
دلوقتى يدينى محسن لشحات يشترى لقمة
ما تكفـّى عيل صغـّير ، يسد بيها : جوعه و رمق أهله
السوق اللى بقيت فيه ملطشة ، حطوا من قيمتى
.و الا الغلابة إللى اتبهدلوا بهدلة !! ، و اللهِ ما يستاهلوا
طحن الغلا عضمهم ، و حالهم بيصعب على الكافر
فى مصر الفقير انذل يا عالم و الجوع بينده له
اللى عمل فيا كده ، حسبى و نعم الوكيل ربى
أنا بادعى عليه ربنا يلعنه و يخرب بيت البُـعاد أهله
يعنى مفيش راجل جدع ما جابت زيه ولادة
يرجع لى مجدى و اكون قد الدولارقيمة و زيادة ؟

21 يناير 2008

عيد ميلاد 2009

هالة و غادة

بصيت على الدنيا .. لقيتها وردة بتتبسم
سألت إيه العبارة ؟ .. قالوا إوعى تتكلم
هوّه انت مش شابف ؟ .. هوّه انت لم اعلم ؟
أنظر لفوق للسما : بصيت لقيت قمرين
و نجوم كتيرة اتجمعت : يشوفوا الجمال ده منين
الله ؟!! دى هالة و غادة منورين الاتنين
القلب دا بيتهم و فيه حبهم : ساكن
عامل عمايله فى قلوبنا ، مشعلل و مش : ساكن
فى نهارنا ما ينقص حبهم ، و لا فى المسا : كن
ربك خلقهم و قال للجمال : فى الزهرتين دول : كُن
لو عملوا انتخاب بين الصبايا الحور ك
مين تبقى الأميرة : هل هالة أو غادة
الحيرة جوه العقول ، و الفكر فيها يدور
و فى النهاية يقولوا الإمارة قسمة على القمرين
موافقون يا سادة ؟
ربى يبارك ، يا غتدة و يا هالة
فيكم : فى داركم ، و صحة و سعادة
لكل الحبايب
و عام بعد عام
نقول لك يا غادة
نقول لك يا هالة
عقبال ألف عام
صحة و سلام

4 نوفمبر 2009

عيد ميلاد 2008

عيد ميلاد النجوم

ح تقوللى فين القمر ، أنا اقول لك دا انقسم نصين
هالة و غادة جمالهم آية تسبى العين
سبحانه من سواهم و أحسن التقويم
.دول أصلهم ورد و زهور : نرجس على ياسمين

:بصوا و شوفوا ستنا غادة
ح تلاقوا الأدب و الفضل فوق العادة
و لميس و سالم و خالد فى سماها نجوم
.ست فاقت فى الكمال كل السيدات و السادة

دكتورة هالة : برنسيسة بين كل الهوانم
فى الذوق دى جامعة و مدرسة لكل المكارم
و رنا و رؤى زهرة بنفسج رائعة و فلة
:و روان دى قطة و حسن له فى القلوب منزلة
.و الرب عالم

عيد الميلاد و جينا له مجيّـة مخصوصة
لقينا الحبايب و النجوم قاعدة و مرصوصة
و التورتة بايدين أبو سالم هايلة و لا جروبى
.دا يستاهل عليها فى الحقيقة ألف مليون بوسة

ادعو يا حبايب ربنا بصافى القلوب
قولوا بشفاعة المصطفى سيدنا الحبيب
املا أيامهم هنا و لياليهم فرح و سرور
.يارب حقق دعانا يا كريم .. دا انت خير مجيب

مصطفى درويش سلام
4 نوفمبر 2008

عيد ميلاد 2007

عيد الميلاد

(هالة و غادة )

لمّــة جميلة جمّـعت كل الحبايب
اللى حاضر بالجسد ، و الروح من كل غايب
نسأل نقول إيه هيّـه الحكاية
قالوا دا عيد ميلاد أجمل صبايا
:غادة و هالة
زهرتين – آخر جمال – مفيهاش قواله
ما يقضينيش فى وصفهم شعر و زجل ، و لا ميت مقاله
البدر ينقص فى جماله ، و ف حلاوته ، و ف دلاله
و الزهرتين همّـا الجمال المستديم .. آخر حلاوة
و لكل زهرة فى القلوب منزلة و حب و غلاوة
يا رب ديم بيننا المحبة ، و الترابط و السعادة
و ارزق حبايبنا الرضا ، و الرزق فياض بالزيادة
و اجعل تجمعنا السعيد .. فى كل عام يبقى لنا عادة
حبهم فى القلب خالد ، و مكان حسن دايما فى قلبى
.يا رب بارك فى عيالهم ، و ف أهلهم ...... آمين يا ربى

4 نوفمبر 2007

الجزء الثانى

انتهى الجزء الأول و يبدأ الجزء الثانى

بفضل الله تعالى

يوميات تلميذ ابتدائى

يوميات

تلميذ ابتدائى

حطوا فوق كتافى ِمخلة مليانة كتب , قال إيه علام
ما يشيلها حمار, و لو انضرب , بقى دا كلام ؟
ضهرى انكسر من كتر ما شال و احتمل , إيه العمل ؟
لو إنى أدخل فى بطولة حمل أثقال راح أكون البطل

وقفنا صفين , طابور نحيى العلم
!!ساكت و لا كلمة , تقولشى صنم
خرقة مهربدة لا منظر و لا قيمة
و اهتف يا ولد , علوا صوتكم يا غنم
و هتفنا ورا ولد صوته مرعب , صوت أجش
إن ما كنتش تشوفه قطعا حتقول عليه دا جحش
تحيا .. تحيا .. تحيا مصر .. مين هيه دى مصر ؟
و احنا وراه هات يا هتاف و نزلنا وراه دش

و طلعنا على الفصل : جيش من العفاريت
ِسلـّم يا دوب عليه اتنين شايل عشرة من الكتاكيت
يا ويله اللى يتكعبل : ننزل عليه كربسة
و المشرفين ييجوا يدعبسوا عليه دعبسة

فى الفصل نقعد تلاتاشر على ديسكين
لا إنسانية تحكم فصلنا و لا رأفة و لا دين
مشرف مكشر باين غضب ربنا على وشه
يشخط و ينطر : اقعد يا حمار متعملوش دوشة

الأبلة تدخل بكام شخطة تقعـّدنا زى البلم
واد بيتكلم تزعق له : اخرس يا حمار يا بجم
طلع كتابك يا ولد , و فين يا بنت كراستك
!!يا ويله اللى نسيهم , طبعا حيتفستك
اكتب يا ولد , اكتبى يا قردة
خطك دا يقرف يا ولد ما يساوى واحد خردة
خطك و كراستك قرف ياحمار .. و قطـّعِتها
الأبلة نزلت على إيديا يالمسطرة و فرمتها
يا أبلتى لسه الأنامل ما استوتش
يبقى بتكلم زميلك و عامل كتير فى الفصل وش
و ف حصة جات لنا الأبلة و ف ايدها شيلة مخبية
!!الولاد يناموا على الديسك , و البنات يقطفوا الملوخية

فى الفسحة ننزل هجوم كاسح على الحوش
و المشرفين يضربوا فينا : حـّلق يا جدع حوش
شقاوة و عفرتة بدون قيود و حدود
حوش مدرسة دا يا عالم و لا ّ جبلاية قرود

و الواجبات , يا لهوتى , إمتى أحلها يا ربى ؟
تعالى يا ماما و يا بابا اقعدوا جنبى
ساعات بحالها اشتغل لما تنقور راسى
فين الكتاب يا ماما .. هاتيلى كراسى

عينى عليا , ضاعت فى الهوا طفولتى
و لا مدْرسة بتفهمنى و لا بابا و لا مامتى
ماشى .. أرجع و اعيشها لما ابلغ الستين
!!!ساعتها يقولوا عجوز خرّف , تافه و مجنون

مصطفى سلام
9 مارس 2006

يوم عمل

يوم عمــل

جرمق من العمال يطلعوا عشرين
قالوا لنا من طرف الحكومة إحنا لكم جايين
راح نزرع لكم فوق الرصيف أشجار
و الخضرة تبقى ع الطريق صفين
**********
فرحنا و قولنا سأل المسئولين عنا
حيحولوا حينا بعد الجحيم جنة
لا تقول باريس ولا لندن و لا حتى أسبانيا
و الزهر فوق الشجر و الطير حيتغنى
**********
هم الرجال همَة ... فاسك يابو محمود
أنا قلت أحفاد فراعنة ما يبخلوا بمجهود
هوه الوحيد اللى اشتغل و الباقى بيهندز
ضربة واحدة اللى ضربها , قعد بعدها مهدود
**********
كل الكتيبة اتجمعت ...يللا بنا نفطر
حبة فلافل و فول و شوية بصل أخضر
اقعد يا جدع و افطر .. عبّى فى كرشك
هوه العمل كان طار ... اقعد و لا تفكر
**********
مر المهندس عليهم لقاهم ع الطعام شلة
أهلا يا باشا و مرحبا تعالى بسمللة
كدبشى صاحبنا خبر .. فرشوا له فوق طوبة
و قعد معاهم ... و انا قلبى معلول منُهم علة
**********
بعد الفطار ما انتهى ... ع الشاى يا واد ولع
و الشغل يا هندزة ؟ .. ملعون أبوه .. يولع
و الجوزة دارت ما بينهم حامية و بتكركر
شد النفس يا هندزة تلقى الدماغ شعشع
**********
بعد الطعام و الذى ... قعدوا فى قلنا و قال
واحد جميل الصوت رقع له كام موال
مالت رؤوسهم و اتهزت الأوصال
تقولشى أبو دراع حضرته و الا دا متقال
**********
الضهر أدن .. وجب .. قوم بينا ع الجامع
صلى و خد راحتك قوى و صلى ع الشافع
فرض الإله أولا يا عم عب متجلى
قال يعنى صلاتهم صحيحة و لا ورعهم نافع
بعد الصلا .. الجو كان حران
قالوا نرَيح ... مين اللى كان تعبان ؟
ناموا شوية .. حتى وقت الإنصراف
و انتهى يوم الكتيبة من تنابلة السلطان

يادى المهانة

يادى المهانــة

خرس اللسان

بطل الكلام

أما الدموع فاتكلمت

أصل الوحوش بقوا أمريكان

و الإنجليز اتوحشت

ملقوش سوى لحم العرب .. أرخص غذا .. بين البشر

قالوا ننهشه و ندنسه .. يا حبذا .. لو ينهبر

نزلوا .. كلاب تنهش فى لحم الغلبانين

دولا ديابة – مش بشر – دول سعرانين

**********

يا دى النهار اللى فى لون اسود غطيس

اللى مات العدل فيه و الحقوق راحت فطيس

**********

شوفوا الغراب – يا دى المهانة – حط فوق قصر الرشيد

اللى شاده بالفخار و العز و المجد التليد

إللى إبنه المعتصم هب مرفوع الجبين

"لما حرمة بو استغاثت : " وا أمير المؤمنين

امتعض , و ما حط سيفه إلا فى صدر اللعين

كل ده من أجل حرمة من نساء المسلمين

**********

أين أنتم يا عرب ؟

!اللى ما صوت منكو اتسمع

!اللى ما سيف ليكو ارتفع

إنتو متوا و الا إيه ؟

دا انتوا متم و شالوكم مرابعة

و العزا فينو يا بيه ؟

!فى عمر و الا فى رابعة ؟

مصطفى درويش سلام
15/5/2004

يا قلبى

يا قلبى

عصفور مزقطط فوق الشجر بيغنى
ألحان ما غنى زيها قبله بشر أو جنى
سألته مين إنت يا عصفور يا ساحر قلبى و عنيا
:قال لى ما تعرفشى يا صاحبى العزيز إنى

أنا قلبك

لقيتك يا حبيبى مكتئب ومن الحياة يائس
وشك مكشر ممتعض و على الدوام عابس
أنا قلت أسليك بحبة أغانى حلوة و شجية
يمكن تزيل الهم اللى على نفوخك كابس

و انا صاحبك

شوف يا صديقى العزيز , بص الحياة قد إيه حلوة
ياه ع الجمال و الصفا .. دى كلها على بعضها غنوة
تلقى الحياة بتناديك .. تعالى هيا إليا
فتح عينيك للجمال و اجلى البصرمن أجلها ميت جلوة

و انا جنبك

شوف يا صاحبى العصافير كلها ع الشجر بتشقشق
مليا الفضا بالغنا .. آخر مرح فوق الغصون بتزقزق
عايزنى وحدى أعيش جنبك حزين و متنكد عليا ؟
أمال أسيب الشمس الجميلة على مين غيرنا راح تشرق ؟

اتقى ربك

مصطفى سلام
9 ديسمبر 2006

يا بهية

يا بهية

يا بهية ليه ولادك
زمزؤا م العيشة فيكى
اللى ناقم و اللى ساخط
و اللى ناقد و اللى شاخط ؟
و اللى حط و زاد عليهم
.قطـّعوا فى توب كاسيكى

يا بهية دول ولادك
نسيوا إنت يامصر مين
الحضارة اللى بنيتى
منذ آلاف السنين
بالمحبة و الوئام
بالأخوة و السلام
و النسيج واحد تملـّى وقلب واحد ع الدوام
و ان كنت عانيتى كتير , لكن معاناتك تهون
جنب واحد من ولادك .. صابه مس من الجنون
قام يقطـّع لك هدومك , يقطع الحبل المتين
.و النسيج أبيض و ناصع .. لوّنـه الدم السخين

محمود دا إيه و لا ّ شنودة
أو أليسا أو فريدة
همـّه برضه ولاد بهية ؟
أم واحدة يا خلق هيـّه
النيل أبو كل العطاشة
.لا تقوللى بطرس أو عكاشة

و الحروب مرت علينا
ميزت مسلم و قبطى ؟؟؟؟
دم بترو و دم معطى
ع الرمال رسموا خريطة
ماتوا من أجلك يا مصر
منصورة فوق سطح البسيطة
فوق رمال أرضك يا سينا
:كتبوا : دى أرواحنا رخيصة
:كى تعيش مصر العظيمة
وقـّعوا : أحمد و ويصا

مصطفى درويش سلام
18 أبريل 2006

يا أخى العزيز شربينى

إلى الشربينى خطاب

بمنتدى الواحة

يا أخى العزيز شربينى

..الود واصل ما بين قلبك و بينى

..المشكلة يا بن أبوى " خطاب "

..اللى ف ايديهم أمرنا و فصل الخطاب

..تركوا الأمورهايصة قوى و متبعككة (1)

..ما تاخدش منهم غير فلفسة .. مع فذلكة

..طب يا صديقى : إيه يكون الحل

..غيرة ع الوطن .. وعلى الأقل :لازم يكون فيه شئ م العمل

.. أو مجتمعنا ( سوف يرحـلْ للضياع )

..تاكله الديابه و تنهشه كل السباع .

مصطفى سلام
(1) متبعكـكه = متلخبطة

يا ابنى

يا ابنى

دمرت يا بنى قلب ابوك
و المرض عضه بنابه
الناس جميعا يخبروك
ع اللى جرى له و اللى و نابه
حطك يا سلم جوه قلبه
و قفل عليك يا ولدى بابه
حطك يا إبنى ف ننى عينه
أفنى عليك زهرة شبابه
كل الأمل نفسه يشوفك
من قبل ما تحين لحظة ذهابه
عالم كبير .. أستاذ جليل
دكتور عظيم الناس تهابه
ارجع يا ولدى لحضن ابوك
دا الشوق مرير طعمه و شرابه
ارجع لترفع راس أبوك
.و تزيل همومه و اكتئابه

10 ديسمبر 2006

هيـّه كده

!! هيه كده

هيه كده
ماشيه كده
تعدلها تعوج
تعوجها تعدل
تبقاشى عارف
إيش فيها تعمل

صعبان عليها
إنى سعيد
تلوى لى بوزها
و تقوللى عود
للبؤس ارجع
تانى من جديد
تقلب سعادتى
آلام و غم
تقدر تقوللى
لو فيها حل
إيش فيها أعمل
.قوللى يا عم

اطلب رضاها
ألقاه خيال
:و أَقـول تعالى
: تسخر , تقوللى
لما تشوف
حلمة ودانك
و دا شئ محال
أضحك تقوللى
.بطـّـل خبال بلاش هيافة و لعب العيال
كشر و زمجر
تبقى رصين
حتقودنى حتما
.نحو الجنون

يا خلق هووه
شوفوا لكو شوفه
فى الدنيا ديـّه
عملت لى طوفه
خبطت نافوخى
إغراء و زينة
جايا تقوللى
قوم يللا بينا
هيـّه جميلة
طعمه كمان
لكن غرورة
ملهاش أمان
أجرى وراها
ألقى سراب
آخرتها إيه ؟
حبة تراب

يا للى اجتباكم
رب الأنام
بحجى و حكمة و حسن الكلام
ألقاش لديكم
:رد لسؤال
فى الدنيا ديّـه
مرعوب و أخشى
سوء المآل

قالوا ابن آدم
يجرى .. يبرطع
ينزل و يطلع
فوق السحاب
و ما يملا عينه
.غير التراب

مصطفى سلام
23 نوفمبر 2006

هموسة

هموســـة

أحلى البنات ستهم هموسة
صنها يا ربى بقدرتك و اجعلها محروسة
أحلف بحبى لها إن كان فى عمرى بقية
لأرقص و أغنى ف فرحها يوم ما تبقى عروسة

هس اخرس

هس اخرس

حبيت أقول الزجل .. قالوا ما هوش مشروع
و فى المنتدى أنشره .. قالوا عليك ممنوع
قطعت حتة من لسانى و قلت له جاك نيلة
.جايب لى الكلام و الملام .. خليك كده مقطوع
................................
علمتك تبطل كلام .. عمرك ما تتعلم
وقلت لك صهين تفلعص .. تبص لى و تبلم
فرقلـّة دا و لا ّ لسان , إنت يا لسانى ؟
.حُرمت عليك القِوالة .. هسسس , إخرس ما تتكلم
ـــــــــــــــــــــــــــــــــــــــــــــــــــــــــ

19 أبريل 2006

هس

هـس

بطل كلام و اصطبح و اتلم يا لسانى
إلبد ف خشمك ... و ما تقولشى زجل تانى
و الشعر سيبه و طلقه , و حتى الهمس
حاقفل عليك خشمى و أعض بسنانى
**********
مصر اللى كانت زمان محروسة بالقرآن
أثنى عليها ف آياته ربنا الرحمن
صبحت بلا صاحب و لا أهل يحموها
صارت نهيبة ينهبها كل شيطان
**********
هاتى و قول ... طظ ف كلامك طظ
بلدنا فيها الكلام زايد و زى الرز
أصله ف بلدنا ببلاش ... و السمّع بفلوس
ضاع الغلابة ف بلدنا .. ملهمش فيها حظ
**********
طلقت أنا يا بنى الزجل و الشعر
و قلت أريح دماغى م الهموم و الفكر
أصل الكلام عندنا .. لا بينفع , و لا بيضر
أصله مالوش لازمة ... إلا فى بلد حر
********
مصطفى درويش سلآم
18/12/2003

نفيسة العلم

نفيسة العلم

أنا قلبى دايب فى هواهم
أسيادنا أهل البيت
أسعى و أمشى فى رضاهم
.و دا كل ما اتمنيت

فى يوم قصدت الصلا
فى السيدة الباتعة نفيسة
يومها ف مقامها كان فرح
بيزفوا فيه واحدة عروسة
الله ؟ !! دى أجمل منطقة
بيدشنوا فيها الجواز
.لا تقوللى شبكة أو مقدم أو مؤخر أو جهاز

و قعدت أقرا فى رحابها
طه و الفاتحة و يسن
و عجوز منورعن يمينى
قال لى يا إبنى : إنت مين ؟
أنا قلت له عاشق لأحمد
و هواى فى العترة الكرام
و قصدت بيتها أزور مقامها
.ألقى على الست السلام

قال دى نفيسة العلم يابنى
علم و تقى و بر و ورع
بحر الحديث و الفقه زاخر
سيدنا الشافِـعِى بيه انتفع
دلوقتى يابنى إيه ف إيدها ؟
تقدر تفيد بيه الخلايق
خللى تكالك ع اللى هـّـوه
رحمن رحيم عالم و رازق
إن كنت عايز منها حاجة
خللى سيرتها لك هداية
بادر بفعل الخير يا ولدى
.إنوى و خللى دى البداية

مصطفى سلام
12 ديسمبر 2006

نعمل إيه ؟

نعمل إيه

نازل صريخ .. هات يا عياط
حاجة تقطع كل النياط
!!الواد كإن بيقتلوه
أمه جايباه الحضانة
أصلها هيه و ابوه
.بالشغل أوقاتهم ملانة

ماشية عيونها مرغرغة
ترسم خطوط فوق الخدود
المبتدا عينها و آخره
.فوق الصدور و على النهود

قالوا لرفع المستوى
شغل النسا هوّه الدوا
ماشى .. ما عنديشى مانع
بسى نعمل إيه يا ستى
!!ف جيل صبح صايع و ضايع ؟

يجروا ورا القرش الحلال
و الهدمة و اللقمة الطرية
من غير عملها دا شئ محال
.يبقوا ديل فى الآدمية

!بس ذنبه الطفل إيه ؟
يتحرم من حضن أمه
ترميه حبيس ف الكى جى و تمشى
!!و تسيبه يوم يحرق فى دمه

عودى لقلبك يا مدام
بلا مال حلال بلا مال حرام
إيه فايدته لو حتى تل
لو إن طفلك ضاع و ضل ؟
عودى يا ستى للأصول
.و ان شا لله حتى ما حد كل

:دلونى يا أهل الحجى
الحل إيه المرتجى
يا نعيش فى يومنا لنفسنا
و ف بكره جيل كله شجا
يا نعيش كده على قدنا
.و نربى جبل فيه الرجا
مصطفى درويش سلام
18 يوليو 2006

نجمتين

نجمتين

(إهداء إلى لميس الإمام و ليلة عشق من أعضاء المنتدى فى اجتماع عيد الأضحى 1427 هـ )

قعدنا شلة اتجمعت ع الحب متعاهدين
هلت علينا من بعيد , من النجوم اتنين
لميس و ليلة عشق , أنوار بتسبى العين
قعدوا فى وسط المنتدى , كأنهم قمرين
أحكى لك اللى جرى و أحلف أقول الحق
قعدت أسبح ربنا بكل حب و صدق
المبدع اللى خلق لميس و ليلة عشق
لو قلت لى جمال منظر و بسّـى , أقول لك لأ
أخلاق و طلعة بهية و كمان كمال فى العقل
.فكر و ثقافة و موسيقى , مش بس حسن الشكل

أدعى يبارك ربنا , سبحانه عز و جل
جهينة و حامد و سيف و الإخوة و الأخوات
و سارة و ريم , زهرتين , دول أجمل الجميلات
.أسعد يا ربى سنينهم باليمن و البركات

مولانا البصل

مولانا البصل

يا جهابذه : فهمونى إيه حصل
إيه جرى فى السوق لمولانا البصل ؟
ماشى و رافع راسه و أسعاره إلى فوق
لا قانون بيردعه و لا أخلاق و لا أى ذوق
.و عامل لنا غاغة و دوشة فى البيت و فى السوق

إيه العمل ؟
هل فيه أمل ؟
إنه يطاطى للغلابة شويه
دى الناس اتشوت و مغلوبة ومكوية
لا قادرة تلبس , لا قادرة تاكل , لا قادرة تسكن
و نقول حتتعدل يجوز بكرة .. جايز يا بوى .. يمكن

وآدى احنا قاعدين ولايا .. بنستنى الأمل
و لا حتى قادرين نشكى و نبكى أو نعمل عمل ؟
دا السوق فى العلالى يا جهبذ ضرب
و جيبى يا جهبذ م النقدية يا حبيبى خَرَب
دا حتى الفجل رافع فى السما راسه
يدفع الغلبان فى حزمته دمه و كل فلوسه
و اللحمة ينظر لها ولاده ويقولوا يابا إيه ديـّه ؟
.أما السمك فميش فى جيبك يا فقير نقدية
و البيض يا صاحبى دا كل الماهية
يا دوب تجيب كرتونة .. إيه البلاوى ديـّه ؟

إن كنت عامل جدع .. روح اشترى قوطة
لو حتى بايظة مفعصة , و معفنة , و آخر عيطة
هأو .. مسموح فقط يا حبيبى بالنظر
راح ترجع لبيتك حزين و قلبك منكسَـر
أما عن الكوسة .. قالوا عندنا كتير
أخاف على عقلك من سعرها : يشت , يطير
كفايه ترجع من السوق يا دوب .. بعود بقدونس
من عند ناعسة , و ملح تغمس بيه .. من عمنا يونس
!!!و كفاية تفرح بفوز الأهلى فى تونس

مصطفى درويش سلام

مقلب زبالة

مقلب زبالة

مريت و انا ماشى ف طريقى
على كوم زبالة مفتخر
و سألت إيه ده يا صديقى
قال دا مخزن من نفايات البشر
و وقفت ساعة ابلع فى ريقى
و أمد لنهايته البصر
و قطط بتنبش عن طعام
و الكلب بالعضمة هبط
جيش فيران تمرح و ترعى
و لا فيه اعتبار لوجود قطط
و ذباب و ريحة منتنة
ينكرها أنف اللى انزكم
نمل و دواجن ميتة
جثة حمار فيه اندفن
يللا يا صاحبى بلاش قرف
منظر كئيب , ريحة عـفـن
دول مش تلاته فى مصرنا
دول بقوا مليون هرم

مصطفى درويش سلام
25 مارس 2006

مفيش فايدة

مفيش فايدة

سلام عليك فى تربتك يا سعد باشا
(كلمة و حكمة قلتها ما زال الركب بيها بيتماشى .. (1
مفيشى فايدة .. قلتها يا سعد مرة
.فعلا مفيش فايدة ف بلد فوق العيون ضلمة و غباشة

قالوا لنا الاستعمار سبب تخلف مصر و خرابها
نهب خيرها و ثروتها و سكـّـر عليها بابها
طيب .. أديلك نص قرن بيحكم مصر أولادها
تقدر تقوللى فى زمننا إيه م الحضارة نابها ؟

قالوا لنا حرية .. دا الاستعمار ما عمل فينا
ربع ما بيعملوا : إذلال و ظلم و بهدلة و الشرطة حوالينا
(كاوبوى أميركا لوحكم أو كلبه اللى فى لندن (2
.هل كنا حنبقى كده .. اسكت دا اللى فينا مكفينا

قالوا لنا الشعب ينعم بالعدالة الاجتماعية
و حسن توزيع الثروة و تأميمات و اشتراكية
وزعوا علينا الفقر و الضنك و الحسرة
.و بقى لنا خمسين سنة نسمع الاسطوانة هيه هيه

قالوا لنا مصر دى بلد العلوم و التكنولوجيا
كيميا و فيزيا و ليزر و ذرة و بيو- لوجيا
لا شفنا كيميا و لا ذرة و لا دياولو
(كفاية علينا الأكاديمى و العندليب و الراقصة سونيا (3

فى الصحة : العلاج تفوق القدرة تكاليفه
رفع الطبيب الفيزيتا ، و الدوا رافع علينا سيفه
بأدعى اللى خلقنى ياخدنى بدون أمراض
.موتة و خراب فى الديار تبقى ، دا الكل ماشى على كيفه

حتى ف مجال العلام .. من خمسميت جامعة
عدونا له مركزين ، و احنا ؟ .. ادلق علينا خمسميت دمعة
ياما قالوا لنا العلم و التعليم أصل كل تقدم
.أتارى كلامهم كله من تآليف أبو لمعة

(أما الصناعة قالوا لنا حنـّـافس دول أوربا .. (4
بس اصبر علينا يا شعبنا حبة
هدموا صناعات كانت عندنا ثروة
.سبقونا اللى كنا سابقينهم و بقينا ف وسطهم شوربة

جيشنا : قالوا عندنا أعظم و أقوى جيوش
فى علمه ، ف سلاحه ، ف رجاله ، نظيره متلقوش
فى يونية الشهير ، إنظلم ، لم يختبر و لا حارب
.فى أرض المعارك ندوّر عليه ، فين قياداته ؟ .. مفيش

شوف حتى كلامهم عما يسمى الدعم
منـّـوا علينا بيه .. ناس كده ما عندهمشى دم
فيه مهانة أكبر من بطاقة للتموين ؟
.نص كيلو سكر و زيت .. بلاش منهم خلاص يا عم

.و القطر يلبس فى قطر .. إهمال فظيع .. فين الصيانة ؟
ميّـات تموت .. تنصاب
مش مشكلة .. ناس جرابيع وغلبانة
(و يدوروا على أى واحد يعملوه الكبش .. (5
ييجوا و يدلقوا لهم بقين كلام
.و ع المصيف .. دى الدنيا زامتة و حرانة

:بعد دا كله يا عمى .. أقول لك
مفيش فايده
يا عم سينا فى حالنا .. دى نارنا فى القلوب قايدة
إن كانشى ييجى الولد .. اللى لحمه من تراب بلدى
روحه من روحها و قلبه فى الحديد الصلب بيعدى
إخلاص ، جسارة و حماسة مشعللة و إرادة
و معاه قوى الشعب الحقيقى .. رجالة فوق العادة
رمسيس يكون أو تحتمس يرفعوا راسها للسما فوق
و يحقق العدالة و الأمان بالأمل و الحب و الذوق
.إن كانشى كده : عمر الأمور يا عمى ما حتروق

مصطفى سلام
27 أغسطس 2006


--------------------------------
(1) قال سعد زغلول باشا كلمة " مفيش فايدة " .. و سارت الكلمة مثلا سائرا حتى ستينيات القرن العشرين حين أسدل ستار النسيان و الاهمال التاريخى على عظماء مصر قبل حركة الجيش سنة 1952.. فكان الناس فى كل موقف صعب يقولون : " سعد باشا قال مفيش فايدة " .. علما بأنه رحمه الله قالها لزوجه صفية هانم ( أم المصريين ) فى مرضه الأخير حين سألته عن حاله : فقالها !!
(2) عليهما لعنة الله و الملائكة و الناس أجمعين .
(3) ستار أكاديمى و مسابقة العندليب و غيرهما مما يلهون بها الشباب عن الجد و الاجتهاد .
(4) حنافس = سننافس .
(5) الكبش = من تلصق به التهمة إلهاء للرأى العام .

مطربنا

مطربنا

مطربنا هذا يا لورد كازا
سمكرى ، سباك شارب له قزازة
فينها أيام الكلام كان حتة حلاوة
.و الغنا كان سكر لذيذ آخر لذاذه
مصطفى سلام

مصرع قلم

مصرع قلم

قلمى اللى باكتب بسِنـُه الشعر و المواضيع
بصيت عليه النهارده : غارقان فى حبره صريع
طلبت له الاسعاف .. غابت تلات ساعات
قالوا البقية ف حياتك : قلمك توفى و مات
ضغطه ارتفع و انقهر من كتر ما هاتى
(اللى انتقدهم فى حياته .. آخر برود و تباتة .. (1
و لا حد قال له يا قلم إيه اللى انت بتقوله
.و لا فيش ودان للمسئولين أصغوا و سمعوا له

فين أدفنك يا قلم ؟ .. قوللى يا حبة عينى
دانتا صناعة بلدنا و مش كورى و لا صينى
فى السيدة عيشة ادفنك .. و لا ّ السيدة نفيسة ؟
دى قيمتك فى قلبى فى السما , عالية و ما هى رخيصة
وحياة غلاوتك دى ليلتك فى عمر مكرم
.حانشر لك النعى فى الأهرام حتى الجميع يعلم

رحت القرافة .. حانوتى قابلنى , و إسمه خميس
(مناخير طويلة , مكشرة , كإن البعيد أنوبيس !! (2
قال خمسمياية أولا .. إيدك على المعلوم
.......يا راجل دا حتة قلم
و لا ينقصوا مليم
موتة هيه يا خميس , وخراب يا راجل فى الديار
صمم على قوله وحرن , و المخ كِيف مخ الحمار

يا خلق حتى فى القرافة يبيعوا فينا و يشتروا
(دا الدين يقول فى الحلادى : يسروا , و ما تعسروا . (3

يعنى الفقير لو مات ما لهوشى حتى يندفن
........خاف القضا يا ِولــْد آدم
دانت النهارده إن كنت دافن بكره حتصير مندفن

(وأخيرا لقيت لك يا قلم مقبرة : بخ ٍ بخى (4
!!!سلة زبالة معفنة فى مطبخى
--------------------------
(1) تباتة : كراعة !! يعنى نطاعة .
(2) أنوبيس : إله الجبانة (المقابر) عند قدماء المصريين .
(3) الحلادى : اختصار لـ (الحالة دى) .
(4) بخ بخ : كلمة تقال للاستحسان .
مصطفى سلام
11 مايو 2006

مش غاوى مشاكل

مش غاوى مشاكل

غاوى مشاكل .. باين عليا
اقعد و أشكى .. و العلة فيا
يعند معايا .. ألعن شيطانى
.يكتر كلامى .. أقطع لسانى
أعمل ( لى ) إيه .. قولوا انتو بسى
أبحث و أدور .. على طب نفسى
إن كنت دارس , للطب , غاوى
قول لى يا صاحبى
أحمد عكاشة , و لا ّ الرخاوى
ألجأ لمين .. يهدى لى نفسى ؟

يا اخوانّـا عقلى .. َحيْشــت منى
صواميله فكت .. و دا غصب عنى
.أصحى ف مشاكلى .. و أبات فى همى

تاجر يغش , طالع يحش , نازل يحش
عامل يفبرك , و لا صنعة يُحبُــك
و لا ّ الصنايعى , يخرب جيوبك
.و الناس بقى لها , كام ألف وش

أستاذ فى فصله .. يهدم ما يبنى
مظلوم معاه .. إبنك و إبنى

(و الجار دا جُــّرة , جيرته دى مُــّرة .. (1
بعض المودة , يا أخ صــبرة
أخرج و أطفش , أطلع لبَــّرة
.ألقى الشوارع .. أسقط فى حفرة

ما زاد و غطى .. و بدون مغالطة
إرهاب جبان .. شايل لى شنطة
و ف وسط بلده .. يقتل , يفجّـر
لو إنه عاقل , يقدر يفكر
.فينه عدوه , روح له و كسر

عندى مناسبة
رحت أشترى لها
بدلة مناسبة
من غير ميعاد
(شارع فؤاد .. (2
هيصة و زحمة
و الشرطة تضرب
و الناس بتزعق
و لا عادش رحمة
إيه دا يا سيدنا
قال فى استياء
دار القضاء
آخر بشاعة
اتنين قضاة
بيأدبوهم
: تهمة شجاعة
· وقفة جريئة
· صدق و نزاهة
· قـُــُول الحقيقة

قول يا صديقى
ألجأ لمين .. يهدى لى نفسى ؟
إن كنت دراس , للطب , غاوى
.أحمد عكاشة .. و لا ّ الرخاوى

.ما ليش يا ربى ..غيرك يعِينّى
--------------------------------
(1) جـرة (ضم الجيم و تشديد الراء مع الفتح ) = مصيبة
(2) شارع 26 يوليو حاليا .
مصطفى سلام
28 أبريل 2006

أعمل إيه ؟

!!أعمل إيه ؟

مش عارف أعمل إيه فى الدنيا اللى أنا فيها
أعيشها زى ما هيّـه و الا أجافيها
إن كنت أجافى تبان لى مفاتنها
.و ان ملت ليها تظهر بلاويها

لذيذه هيّـه و طعمة بدون فلسفة
لا تقول أرسطو قال و لا إخوان الصفا
تعقيدنا فيها خللا الجمال اختفى
.عيشها كده .. تلقى الحنان و الدفا

أسعد ما فيها كان أبونا اللى عاش فى الغابة
تفرقشى معاه إن كان هاتور أو بابه
ثمرة تقع له يلتهمها و يشكر
.و الشرب ميّـة ترميها له سحابة

مبقولشى نحيا زى ما عاش جدك
الدنيا دى ما تعيشّى فيها لوحدك
بس البساطة تبقى لك دستور
.إسعى إليها و ركز عليها جهدك

مش حكاية حب

مش حكاية حب

قلبى من الهم انكوى
(عيان و ملقاش الدوا .. (1
قالوا وقعت يا مسكين
.فى معمعان الهوى
!!يا لهوتى !! عاشق و مش دريان ؟
!!و انا قلبى ضعيف مرضان ؟
قالوا الوجيب فى فؤادك زاد ؟
و النبض زايد عن المعتاد ؟

:يا أيها السادة من العشاق
أنا حالى جاى بالعكس
وقف الوجيب بالتمام
.و النبض انخفض للنص

(قالوا الحكاية إيه ؟ .. فضفض عشان ترتاح .. (2
لو إنى حكيت قصتى
.حابدأ م المسا و حتى الصباح

هيـّه حكاية شفتها , و قريتها فى الجرنان
منها تبان لك قساوة الإنسان
الواد بيضرب أبوه .. و يكرشه من بيته
!!بقى دا جزاتك يا عمنا من بعد ما ربيته ؟
قعد العجوز يشكى و انا أسمع
و الدمع فى عينيه يكوى و يتمنـّع
.و انا قلبى من حسرته مفلوق و متوجع
و عشان حتة عروسة ما تسوى يرمى أبوه فى الشارع
حتروح على فين ياعمنا .. دا ابنك لابوه بايع ؟
عينى عليك تعالى لدار للمسنين
قدامك إيه غير كده , يا عم يا مسكين ؟
و اجيب منين – المصاريف ياابنى – إنت أكيد تحلم
.هيا بنا نسلم أمرنا لله , هـّوه الكريم الأكرم

و عجوز بتبكى من قسوة الولدان
و الدمع جارى على الخدين بيقول , يا ويلك يا بنى الإنسان
راح تعمل إيه يوم الحساب , و إزاى حتقابل الديّـان ؟
اللى أمرنا بوحدته , و الوالدين إحسان
تركوها وحيدة من بعد ما جار الزمن
و القوة راحت و العظام حاطط عليها الوهن
(مش عايزة منهم غير يا دوب طلـّـة .. (3
.إزى حال ست الحبايب – ليس إلا

تبكى العجوز و تقول لكل البشر
قلبى يا نا على ولدى انطر
.و الولد قلبه على أمه حجـر

كل ده و بتسألونى : قلبى ليه انكسر ؟
(سيبونى فى حالى و همى , أبحث عن اللى حصل .. (4
.فى الخير اللى كان عندنا , و ضاع مننا و اندثر
مصطفى سلام
---------------------
(1) عيان = مريض , ملقاش = لم يجد
(2) فضفض = قل ما فى نفسك
(3) طلة = نظرة و السؤال عليها
(4) سيبونى = اتركونى .

مزاد عالمى

مـزاد عالمــى

عرضت الشيطان إياه

للبيع فى موقعى بالنت

وصلتنى له بيعه : رجّـالة و واحدة ست

و عرض مغرى أتانى م الدانمرك

واحد حيدفع فيه ألفين و تسعين مارك

و من فرنسا طلبوه بألف فرنك

و من لندن طلبوه بالاسترلينى

و فى آسيا قالوا عندنا منه , صناعة صينى

و من أمركا قالوا شيطانك ما يلزمناش

أصل الشياطين عندنا كتير و كتير من الأوباش

يا اخوانـّا دا شيطان لـُقطة تمام , ِطعم و ظريف

لـُـعبى صحيح خالص , لكنه دمه خفيف

إيه رأيكم أبيعولهم ؟ .. دا انا مستخسره فيهم

.أهل المنتدى أولى , و اهوو واخد عليهم


مصطفى درويش سلام

31 مارس 2006

محدش له دعوة بيا

!!محدش له دعوة بيا

اوعوا حد من المنتدى يدور عليا
محدش يا أهل المنتدى له دعوة بيا
راح أََغيب يا عالم عن حبايبنا شوية
على فين العزم رايح يا صديقى ؟
على المستشفى إياه فى العباسية
لما يعقل السيرفر , يا أهلى قولوا لى
حيرجع المخ و الأفكار و عقلى إليا

مصطفى سلام
6 ديسمبر 2006

محتار

محتار

مش عارف أمور الدنيا كيف ماشية
أمشى بأمانة فيها .. و لاّّ بالعافية
المشى ع الكيف أصبح هو السنة
و الصدق نار و الكذب انقلب جنة

مجنون

مجنون

!!!واحد مواطن – الله عليه – مجنون
ماشى بيضحك فى الشوارع على كل شكل و لون
لا همـّـه سوق مفترى و لا تاجر يغش زبون.
و الثروة و اللى محتكرها واحد من المليون
.مش مننا هُمـّـه .. دول من بلوتو هُمّـه أو نبتون

:هذا المواطن أنا قلت له يا عم
إيه بيضحكك و الدنيا هم و غم ؟
!!" سيبنى يا خالى فى حالى خللى عندك دم "
لو كنت عاقل تقوللى بذمتك إيه حصل أو تم
.بعقولكو يا عاقل .. دا انا عندى الجنون أكرم

تبص تلقى عندنا : إن البلاوى كتار
جنبك فى فلسطين تلقى الدما أنهار
أما العراق : وِلـْعت فى ربوعه النار
و الغرب طايح فى المسلمين : قتل و خراب و دمار
.و احنا – ياعينى – غرقانين فى الهيافة و الطبل و المزمار

لا جوّه لاقى فى حياتى متعة
الدنيا لا بتنظر إلىّ , و لا للفقير سامعة
ييجى وزير – مفروض يولع فى الضلام شمعة
يخلق مشكلة تشعلل فى النيران الوالعة
قال يعنى البلد ناقصة , نضيف للبدع بدعة

لو سبنا أرض العرب , و قصدنا العاِصمة كابول
:ما يتسمعشى غير صوت القنابل اللى نازلة تقول
يا ويلكم .. دوقوا بأسنا يا للى آمنتم بأحمد نبى و رسول
وحوش الأمريكان اللى ولوا على رأسهم غول
.الإسم بوش , لكين الصفات : أحمق غبى مخبول

طب حوّد يا سيدى - قبل ما تيجى - على الشيشان
قتل الصقالبة من أهلها المسلمين .. قد إيه إنسان ؟
شباب و بيحارب عشان حقه , و عرضه و الأوطان
و المسلمين طنشوهم و كأنهم مش أهل للإيمان
.و الغرب واقف بيتفرج .. شامتانين فى أمة القرآن

كل ده يا أيها العاقل وتستعجب ليه أنا مجنون ؟
طب دا انا اللى باستعجب : لسه فيه عاقل فى هذا الكون ؟
باين يا صاحبى إنى لوحدى العاقل .. سامحنى يا أخى .. باردون
سيبنى فى حالى و روح دوّرعلى مثلك :عاقل متزن و رزين
.أما أنا .. فبطلب من المولى القوة و الصبر الجميل و العون

مصطفى سلام
28 نوفمبر 2006

ماشى و مش ماشى

ماشى ومش ماشى

بمناسبة مقترحات تعديل الدستور)

ماشى , نعدل الدستور و نحدد السلطات
و يمارس المجلس سلطته و يحاسب الحكومات
و مع الفساد اللى انتشر , تكون له كتير وقفات
.و يعود لنا سيد قراره , مهاب من بعد ما كان مات

ماشى : يكون للمواطن , كرامة فى الوطن محفوظة
طحن البلا عضمه , و جنبه فيه فئات محظوظة
جلده على عضمه مكرمش , و ناس ملظلظة و كلبوظة
.المستغلين مزمزوا ْبلحمه على قرعتين بوظة

.....ماشى

و مش ماشى مع المادة السابعة و السابعين
حكـّـمت فى رقاب شعبنا فرعون من الفراعين
ما تعرف نهاية ولايته : تمانين سنة ؟ .. تسعين ؟
لو حتى عاش على الكرسى من السنين ألفين

دا هـوه قدر مصرنا مهما حصل أو قيل
اللى بيقعد على تلها , ما ينزل غير بعزرائيل
ع الكرسى لزق المقعده متاعته , بصمغ عربى تقيل
و كلامه شلة تصوره من محكم التنزيل

شلة نفاق على حضرته , عمـّـالة بتبارك
على قلب مصر و صدرها .. السيد اللى بارك
قالوا انتخاب حر و نزيه , و لا حد كان شارك
دا يبقى انتخاب يا عمنا ؟
.دى بلطجة و مهيصة و هجص و معارك

يناير 2007

ليه

ليه

و ليه يا سيدى الطفشان ؟
ما الكل زيك غلبان
و ادينى زيك مكروب
لا فرق بين درش و عثمان
--------------------------
(ردا على (عاوز أطفش لواحد اسمه عثمان

ليــه ؟

!ليــــــــــــــــــه ؟


قالوا حبيب القلب جاى يا عين
فرحنا .. فرشنا الرمل و الخضرة على الصفين
ورده رشقناها شمال , و وردة يمين
و يافطة مرحبا رفعناها على عمودين
. و ما شرف حبيب القلب

ليلة جميلة

ليلة جميلة

ليلة و لا كل الليالى .. ذكرى فى قلبى راح تدوم
لا يساويها فى جمالها .. أى ليلة و أى يوم
اتجمعوا كل الحبايب .. الكواكب و النجوم
دى قلوب بيضة و نقية .. صافية ما فيها غيوم
و عقول تناقش فى المشاكل .. دين و موسيقى و علوم
المنتدى جمع ما بيننا .. منتدى رائع عظيم
يا رب جمع تانى بيننا .. يا إلهى يا كريم
--------------------------------------
بمناسبة اجتماع أبناء مصر بنادى المعلمين 15 ديسمبر 2006

مصطفى سلام
16 ديسمبر 2006

كوز المحبة

كوز المحبة

كوز المحبة اتخرم .. إديله بنطة لحام
بقى ديّـه غنوة يا بجم ..و لا دا اللى يتسمى كلام ؟
بتغنى فوق سطح الثرى .. و لا ّ ف ماسورة مجارى
. عجبى على من له سمع .. هيص و قال له : يا سلام

مصطفى سلام
4 أبريل 2006

كله مصرى

كله مصرى

أهو دا اللى ناقص يعملوه
إحنا نعمـّر فى البلد
مجنون يقول لأ نحرقوه
يا خلق , يا عالم , يا هووه
شديت فى شعرى فاتـنحل
و خبطت راسى فى الحيطان
حطت على قلبى العلل
خايف على نفسى الجنان
بقى هيّـه دى أرض المحبة و الأخوة و السلام ؟
اللى مدحها ربنا .. وصى بها خير الأنام ؟
كان الهلال يحضن صليب
أيام ما قام بالثورة سعد
الثورة قامت فى الكنيسة
فى المساجد
فى كل حتة فى البلد
قسيس بيخطب فى المساجد
شيخ بيهتف فى الكنيسة
لم تباعدهم ديانة
أو فرقت بينهم دسيسة
تفرقشى جرجس عن سداحمد
أو تريزة عن أنيسة
--------------------
جـه كرومر من زمان .
خطة خبيثة مؤكدة
يبعد ما بين مسلم و قبطى
التقى أمة تقول له
دااحنا أمة موحدة
فى المساجد يلقى مصرى
فى الكنايس إبن مصر
فى عروقنا الحب يسرى
.يشهد علينا كل عصر
..........................
إيه بقى اللى صار يا مصرى ؟
إيه جرى يا اسكندرية ؟
دا انت طول عمرك مريا
الناس و جوك
فين لياليك الهنية ؟
مجنون دا إيه دا يا عروسة
يا منارة يا عزيزة
يقدر يلوث فى بحارك
حتى نقطة ف بحر مية ؟

مصطفى سلام
18 أبريل 2006