عزيز قوم ذل

عزيز قوم ذل

الأسد
من ورا القضبان
فى جنينة الحيوان
قال لى يا إنسان
ظلمت العبد لله الأسد
اللى الصمد
. خلقه كمثلك حر

فى قلب أفريقيا
وسط الرعايا على عرش المملكة
و بدون فذلكة
.هذا الأسير كان الملك

حتى أتى حكم القدر
على يد صياد آدمى مجرم خبيث
و بكل أسلوب واطى و خسيس
خدنى و حبسنى فى القفص

و قعدت أزأر و أزأر .. و لا هوه سامعنى
و سهرت ياما ليالى .. كرامتى بتوجعنى
أنوح و أبكى و غرقت فى دمعى
. و مراتى عن بعد بتولول بيا لهوى و يا سبعى

و ولادى شبلين تركتهم أيتام
لو شفتهم حتقول سبحانه من أبدع
النار فى قلوبهم م الذل بتولع
شايفين أبوهم فى القفص منضام

عصبة رجال أقويا.. شالونى بلا رحمة
و معايا بعض الوحوش من آكلى اللحمة
حِمل معانا يا جدع .. هيلا هيلا هوب
. و لا فرق بين ملك الوحوش ولا حتى أصغر كلب

رصونا فوق اللوارى .. و كلاكس .. و انطلقوا
وجابونا هنا ع الجيزة .. و الفرجة يا ولد ببريزة
و شوية عيال م المدارس جاية تتمهزأ
و بعد العز شوفوا الأسد .. قاعد بيتهزأ
ناقص يحلقوا لى لبدتى و يللا ارقصى يا عزيزة

يا ترى ياأم العيال من بعدى : إيش حالك ؟
نسيتى ؟ ... و الا الليالى فى سواد حالك ؟
قومى ارفعى لى قضية فى الرفق بالحيوان
. أرجع لعرشى متوج .. وأربى أشبالك
11/10/2004