سيبك من الهم
يا عم زيح الهم عن قلبك
بكره الفرج ييجى و تتبدل الأحوال
.قاعد تغنى للنكد .. موال وراه موال
ربك بحكمته قادر
ينقلنا من حال مش قوى إلى حال
نرضى كتير عنها , ربك كريم متعال
هيـّة تبات نار يا عمى وبعدها تصبح
(تلقاها انطفت .. صبحت هشيم و رماد ..(1
خللى تكالك على ربك
بسى يا عمى .. خلليك فى أمورك جاد
تُخلص فى عملك و تُنتج
نصبح مبسوطين وعال العال
يا عم دى الدنيا دى عايزة
كفاح كتير و اجتهاد و نضال
انزع يا عم الكسل .. و قعدة اليأسان
الياس يا عمنا , دا قلة فى الإيمان
و بلاش حديت الخيابة , و هايف الأقوال
و كلام مصاطب و خيبانين , ودا قال يا عمنا و دا مال
الجد يا عمى يحقق تقدم الإنسان
تلقى الزراعة والصناعة زهزهت و ازدادت الأموال
قوم يا جدع .. دى بلادنا مش عايزة
إلا شباب قوى , عامل , من نسا و رجال
------------------------------------------
(1) ترجمة للمثل الشعبى : " تبات نار , تصبح رماد "
مصطفى سلام
21 نوفمبر 2006
No comments:
Post a Comment