الدنيا و ما فيها

الدنيا و ما فيها

مش عارف أعمل ايه فى الدنيا اللى أنا فيها
أعيشها زى ما هيه و لا ّ أجافيها ؟
إن كنت أجافى تبان لى مفاتنها
.و ان ملت ليها تظهر بلاويها

لذيذه هيه و طعمة بدون فلسفة
لا تقول أرسطو قال و لا إخوان الصفا
تعقيدنا فيها خللى الجمال اختفى
.عيشها كده تلقى الحنان و الدفا

أسعد ما فيها كان أبونا اللى عاش فى الغابة
تفرقشى معاه إن كان هاتور أو بابه
ثمرة تقع له يلتهمها و يشكر
.و الشرب مية ترميهاله سحابة

مبقولشى نعيش زى ما عاش جدك
الدنيا دى ما تعيششى فيها لوحدك
بس البساطة تبقى لك دستور
. اسعى إليها و ابذل عليها جهدك

مصطفى سلام
10 اكتوبر 2003