الفقير

الفقير

مقدمة

هوه يعنى عشان فقير
يلبد لسانى جوه خشمى.
لو ضهر ليا يكون كبير
يحمل معايا بعض همى
!!أو شرطجى : لوا , صول , غفير
أمشى ف دراه و أقول دا عمى

(1)
يوم رحت أنا قلم المرور
يادى المهانة و الكدر
أكوام بشر و مفيش طابور
زاحم بكتفك و انحشر
ادخل فى كلابيظ البشر

فى الأولة رحت النيابة
و صارعت جوقة م الديابة
و وصلت للبيه الموظف
وشه كشر , يا رب ألطف
إبراء لذمة حضرتى
!! غرامات عليك , يا لهوتى
يا اخوانّـا انا عمرى ما اسوق
سيارتى إلا بالأصول
!!لكن : لمين أشكى و اقول ؟
ادفع !! دفعنا مرغمين
لحاليح و طالعه م العينين

!!روح ع المرور .. يا لهو بالى
اتفرجوا يا خلق هوه
ع اللى حصل و اللى جرا لى

(2)
ادخل يا حلو و لف ع الشبابيك
منظر, عدوك ما يرضاهوش ليك
اللى يزقك , و غيره بيشتم فيك
.وَرَقى يا باشا خلــّصه , ربنا يخليك

و لا فيش ودان تسمع , و لا حد فيك يسأل
واحد ألـُعبان كده قال لى يا راجل : إعقل
ابرز برايزك .. كل شئ يخلص و يشهل
.الصعب يبقى يسير , و المستحيل يسهل

و اهو دا اللي صار
كل اللى كان صعب و عسير
لحلحت لحاليحى , خلته من بعد عسرته سهل و يسير
و خَرَجت و الرخصة بترقص فى الإيدين
نهتف للبرايز
أقوى كتير من جورج بوش و الآنسة رايز
ربنا يزيد فى البرايز
. تخلــّص ليـّا كل مانا عايز

22 يناير 2007