إعلان
تعالى معايا نحط النقط فوق الحروف
إن كان عليا أنا ، فالحب زى الشمس
ظاهر و مكشوف
أصرخ و اقول بين البشر
لا خايف و لا مكسوف
أماانت ، فالتقل طبعك
دايم و طاغى و مألوف
ما دام تحبى ليه تخبى و تقفلى قلبك
حبك و حبى مش حرام ،
طول ما الهوى طاهر عفيف
قربى دا البعد غول مفترى ظالم مخيف
فضّيها سيرة
تعالى نفضها سيرة
بلاه الهوى و بلاها غيرة
فى كل يوم ليكى معايا قصة
أخرتها درسين فى الهوى ينتهوا بحصة
قلبى صحيح فى الهوى عيّل
ما بص يوم للصبايا الفاتنات ..
يعنى يا دوب بصة
لحد ما جيتى لطشتيه و لا أجدعها نشالة أو لصة
طب يعمل إيه ؟ .. دارى جمالك ، دارى عيونك
هدّى النيران اللى بتحرق مهجته
من غير ما ينبس أيها نبسة
شايلالى فوق راسك حتتين من ضلام الليل ..
فتنة
و انا واقف فى حالى أتأمل فى جمال الخلق
قدام بيتنا
بارفانك خرم نغاشيشى ، شد مناخيرى وراكى
كمان العين
مشيوا وراكى بيسألوا : جايبة الحلاوة دى كلها منين
مزيكة كعوبك على الأسفلت
ضابط إيقاع فى فرقة
ترقص عليها القلوب ،
و الرد مليون و مليون دقة
ما تيجى نعملها سوا :
مش دبلتين و مأذون و حبة عفش فى شقة ؟
و لمة مرح : زغاريد و طبلة
و ليلة طيبة و زفة
إيه هوه ده ؟
باين دماغى اتخوت
و المخ جات له خمسميت هفة ..
طنشى ، فوّتـى و يللا نفضها سيرة
دوّرى لك على فارس بعيد عنى ،
وانا حادوّر لى عن أميرة .
24 يناير 2010
المحاكمة
القاضى :
نادى يا حاجب على المدعى
المدعى :
حاضر يا فندم ،
القاضى :
و تحلف ما تكذب و لا تدعى
المدعى :
أحلف و ما اندم ..
بقلبى المتيم
و روح الجمال
اقول الحقيقة ..
و أروى الوقائع ..
مريرة و بريئة ..
القاضى :
و توجز فى قولك
فى عرضك و طولك
أمامى قضايا
فى حجم الجبال
أخلصهم فى جلسة
دا طبعا محال
المدعى :
طبيت صريع الغرام
لما رمتنى برمش
وقعت من عالى المقام
لما رأيت الوش
صافى بنور مستدام
لا فيه خداع و لا غش
قلت لها قلبى سكن
فيه المقام ليكى
و السعادة و السكن
القاضى :
بعد هذا ، إيه جرى ؟
المدعى :
طلعت لفوق للسما
طبعا دى نجمة أو قمر
القاضى :
يا خبر !!
و عملت إيه ؟
المدعى :
وقعت مغمى عليا
و الناس تفوّق كلها فيا
قعدت أصرخ و اهاتى
هاتوا لى حبى و حياتى
طب سيب لى يا قمر قلبى
سلبت فؤادى و روحى و دمرت حبى
غابت و لم تسأل م السما عنى
غرّها الخضوع و الاستسلام اللى بان منى
القاضى :
طلباتك إيه هيه قول يا مدعى
المدعى :
حكم المؤبد تفضل و تحيا معى
القاضى :
نادى يا حاجب على الحبيبة
خلليها تقف جنبى هنا .. قريبة ..
إيه الجمال ده يا قمر
دا الحسن يا بيضا على وشـِّك علم
(فى همهمة) : " كتك يا مدعى مصيبة
حد برضه يزعل دا الجمال ؟
كتك يا مدعى خيبة "
المدعى :
إحم .. إحم
القاضى :
أيوه ، نعم
إيه قولِك ياجميلة
فى دى المقولة
ليه هجرتى المدعى عليكى و طنشتى
رميتيه فى بحر الهوى يغرق
و فى السما غبتى ؟
المتهمة :
يا حضرة القاضى دا مش شايف منى غير حُسنى
طماع و فاضى ، و مش عايز إلا الرضا منى
و لا هَـمُّه عقلى و لا رأيى و لا فكرى
و هُمّه يا قاضى فى الحقيقة الأنا الماضى و الحاضر
و الجاىِّ من عمرى
ليه يامولانا الرجال بيسحرهم عيوننا و رموشنا والأجساد
ما احناش جوارى يا مولانا كما الماضى : لا رجع و لا عاد
ما احنا النسا زيكم : وجدان ، عقول متنورة و أفكار
متفوقات فى السياسة و العلوم ، و الفن كيف ما سار
بيقولوا نص المجتمع ، لألأ تلاتربع
كلامنا كتير حقيقى ، لكين الرجال بتحبه ، و له تسمع
لو لم تحبوا كلامنا ، تفتكر ح نقول الحكاوى لمين
و انتم تقولوا الكلام مستنظرين نقول لكم آمين
فين العدالة ، يا حامى العدالة و العدل و القانون
عايزنى أعيش معاه حياة ما يرضاها بشر أو دين ؟
القاضى :
مش بسى حلوة ، دى فيلسوفة كمان !!
أوصاف ما شفتش زيها ، على غيرها من النسوان .
الحكم بعد المداولة
صادر بإسم الدولة :
إيه رأيك فى غيره يا حلوة و يكون مالى هدومه وْ أولى ؟
تعاليلى أنا ، أشيلك فى عيونى و انزّلك فى المقام الأعلى
المدعى :
لهوتى ، يا خيبتى يا ضيعتى
أنا جيت لقاضى الغرام أشكيلو أحوالى
لهف الحبيبة و قاللى دى أصبحت مالى
ح استأنف الحكم و أوصل لحد النقض
و اكنس عليه السيدة و اشكيه لطوب الأرض
و ادعى عليه فى صلاتى : فى السنة قبل الفرض .
9 نوفمبر 2009
(1)
الطريق
ماشى فى دنيا ضلام ما عارفشى طريقى منين
عارف بدايته ، لكين النهاية يا ترى على فين
ح تقوللى ع الأخرة ، عارف ، مش هيه ديه المشكلة
لكن ، يا ترى : حاركن شمال ، يا مغيث
نجنا و اجعلنا من أهل اليمين
حاولت أكون دايما من عباده المؤمنين
صليت و صمت مع الزكا ، مؤمن بيوم الدين
كافحت فى الدنيا كتير :
صبر و جلد وصفاء ضمير
لكن خطايا تملا المسافة من هنا للصين
ح يقولوا : فلان : قرب تقدم للعرض ع الجبار
وحيد حاقابله ، لا أب ينصرنى و لا جار
(2)
الآخــرة
اسرافيل ..
يوم القيامة ..
و دا يوم كرامة ..
أو ندامة ..
ماسك بقوة باليمين ..
و بأمر م المولى المتين ..
فى الصور ..
بكل جبروت الملاك ..
نفخة ينفخها وحيدة ..
تنتهى كل الحياة ..
إن كان هنا و الا هناك ..
فى الصور..
و بنفخة أخرى مْدويّة ..
هُمّه يا دوبك نفختين ..
تنفتح كل القبور ..
قاموا الخلايق أجمعين ..
من كل درب و كل لحد ..
اتجمعوا ف يوم الحساب ..
ما هربش منهم أى حد .
تلقى اللى واقف فى ذهول ..
عمال بيسأل ، حيران يقول ..
يا ويْلتى ..
إيه اللى حاصل هاهنا ..
يا هول عينى ، و العنا ..
دانا كنت راقد ..
مين اللى أيقظ م المراقد..
الكل واقف فى سكون..
ممكن يكونوا سكرانين ؟!! ..
أبدا ، دا صاحى ومنتبه ..
عمال بيسأل ع اللى حاصل له و به ..
مرعوب و شاهد ..
هول المشاهد ..
و يقول ساعتها ، يهتف يهاتى ..
يا ريتنى قدمت لحياتى ..
و ساعتها لا ينفع ندم ..
الوقت مش وقت العمل ..
الوقت دا وقت الحساب ..
و الكل فتحوا له كتاب ..
يتسئل ، و لسانه مش قادر يجيب..
و لا جنبه صاحبة أو حبيب ..
تشهد إيديه ، رجله و جلده ..
بالخير اللى ليه ، أو شر ضده ..
----------------
يا ربى وزرى تقيل عليا
و الذنوب
حاولت قبل الموت أتوب
و انت غفار الذنوب
جيت لك بملء الأرض ذنب
المغفرة ، بالفضل عاملنى يا رب
يشفع ياربى إنى عشت كتير ومت
على لا إله أبدا إلا أنت
----------------
عبدى شهد لى ع الدوام بالوحدانية
الذنوب مهما تكون كما و كيفا جاية منه
و المغفرة و العفو و الرحمةعليا
---------------
النور بيسطع فى القلوب
فتجيب – ورعا - بالوجيب
ترجو من المولى رضاه
و الله غفار الذنوب
---------------
الأمر يصدر من الحق ، مالـُهشى رد
أخدونى أمشى ع الصراط اللى هوه الحد
بين النعيم ع اليمين ، و الشمال : النار ما ترحم حد
حده كمثل السيف ، حامى كمثل الشفرة
بالفضل نمشى عليه و العرض عرض الشعرة
اللى بيمشى ، و اللى بيجرى ،
و اللى بيزحف و اللى كمثل الطيف
تمشى الخلايق عليه ، يا بخت مين عدوا
يلقوا حبيبنا بإيديه ، يسقى الفرات من يده
---------------
هيا إلى الجنة
فيها ما تتمنى
و كتير كتير أكتر
مما رأت عينك
أو سِمعته ودنك
و لا يخطر على بالك
و لا مر بخيالك
يلقانا خزنتها
أهلا بكم طبتم
----------
عايز عنب ؟ ..
تجيلك التكاعيب مادّه ف عناقيدها
تتمنى تاكل بلح ؟ ..
النخل ييجى يقولك كـُـل من النخلة اللى بتريدها
أما العسل
تجيلك نحلة تسقيك الشهد من إيدها
---------
من بين إيديك شلة من الحور .. حور إنمـا ِعين
جمال ما عمرك حلمت بيه ، يسبى القلوب و العين
النور مشعشع م الوجوه و العيون صافيين
---------
إتمنى و لا تطلب ، تلقى الأمنية قدامك
أكتر كتير مما تمنيت ، متحققة لك
و المؤمن اللى بالنعيم اكتفى ..
لما يكون فى صحبة المصطفى
---------
خمر و عسل ، ميّة و لبن ، بيقدم لك الولدان
لا سُـكر تسكر و لا حَــَزن ، و الشرب بالمجان
لا فيه تعب أو نصَـب ، كسالف الأزمان
و انت فى ضيافة ربنا ، كريم منان
---------
ما فيش لغة تقدر توصف لنا الجنة
يا رب توعدنا ، و تطل على روحنا ،
و العفو من عندك ، عما بدر منا
---------
يا بخته اللى سكن فى قمة الفروس
فى حياته عاش فى ظل ربنا القادرالقدوس
لا غرته الغرورة بشهوة و لا لذة و لا فلوس
ينظر إليه من العلياء ربنا بنوره
يشرق عليه : يزداد فى بشره و سروره
منهم يا ربى بفضلك : إجعلنا و اكتبنا
و بالكرم الإلهى إغفر لنا ذنوبنا.
آمين
3 نوفمبر 2009
يــــاه
ياه
دا انت لو تعرفى
أو دقتى طعم الشوق
أو قلت فى يوم آه
لكنت قدّرتى
كل اللى ملا قلبى
و لكنتى بادرتى
قـُمْتى و حضّرتى
قلبك مكان ليا
و ازداد الهوى عَندك
و شـُفيتى من عِندك
لكن أقول يا مين
يقدر يوّصل لك
يحكى و يقولك
عن حبى اللى مش قادر
أداريه ، دا نوع نادر
عمرك فى يوم تلقيه
مش قادرة عليه تجاوبيه؟
طيب ، خلاص سيبيه
16 نوفمبر 2009
يا دى الجمال
مر القمر قدام حبيبى ، و انحنى
يا دى الجمال ، يا دى الحلاوة ، ف خفته .. أموت أنا
دايب فى حبه ، كاتم فى قلبى الهوى من كام سنة
أطلب وصاله ، و يسوق دلاله ، و يسيبنى فى عكننة
لو بسى بسمة ؟ أو حتى نظره ، أغلى أمل ، أحلى المنى
لو إن مصل الحب آخده !! يشفينى من دا العنا.
أكتوبر 2009
يا أهل مصر
يا أهل مصر
فى كل حارة و كل نجع
اتجمعوا
قربوا لى
هاتوا ودانكم و اسمعوا
قولى ، و عوا
إمتى الحيتان راح يشبعوا ؟
أكلوا البساريا و البياض
و البلطى و البورى و حلـّوا بجمبرى
و لا حد قال و اعترض و لا حد عاد
يرضيك كده يا مفترى ؟
و لا حد دافع عن حقوق الغلبانين
و لا محامى ينبرى
و الحزب هايص فى الهجايص
و الشعب لايص
يغلى و كبده بينهرى
أكتوبر 2009
