جريمة قتل
عصفور و عصفورته
ع الغصن كمشانين
هوه يزقزق لها و هيه تزقزق له
بيقول لها إيه يا ترى
أنا مفهمش
حبة غرام ؟ حبة هوى ؟
أنا معرفش
أصلى ما نش سليمان
و ساعات يقعدوا ساكتين
الجو دافى ظريف
حبة هوا متدلعين بيدلعوا فى ريشهم
واحنا فى فصل الخريف
يستمتعوا و يضحكوا و مبسوطين
----------------------
حبة عيال صايعين
فى الإيدين بندقية صيد
صوبها ولد و هوه بجد سعيد
داس بشدة ع الزناد .. هب
طب الوليف بطلقة فى قلبه شهيد
و عند رجل الولد وقع ، اترمى و دب
زاحه برجله و رماه على جنب الطريق
طارت الوليفة من غير حبيب ، من غير رفيق
وقفت على فرع فى شجرة قريّبة ، تصوصو صوصوات
صوصوة دى يا ترى و الا صوات
عينى عليها فى الجاى من عمرها
مين راح يكمل معاها رحلة الأيام
أما الولد : روّح لبيته سعيد
فرحان بخبرته فى الصيد
واتلقح و نام
14 ديسمبر 2009
No comments:
Post a Comment