فى ميدان السيدة

فى ميدان السيدة

(زينب رضى الله عنها)

على باب حفيدة المصطفى

أنوار و تقوى و كرامات

لمقامها يسعى المؤمنين

بركات و ذكر و صلوات

منظر غريب ليه العجب

(بيصوروه حبة خواجات .. (1

ميدان فسيح قوى إنما

مليان حاجات ياما .. و حاجات

سوبيا , زلابيا , متاع جزم

(خمير شفا و عسلية و شربات ..(2

و فطاطرى ع الناصية و حلوانى

و محل جبنة و بسطرمات

فسخانى ريحته تجيب طنطا

و كبابجى . مطعم مشويات

صالون حلاقة و جزارة

و موبايلى بيحمّـل رنــّـات

و دا كشك بنبون و سجاير

و يبيع جرايد و مجلات

مسمط و فاتح ع الحارة

(فتة رهيبة و حلويات ..(3

طشتين بالوظة مقرفة

قاعدة تبيع منها عدلات

و أوانى بوظة معفنة

(يتجرعوها بالقـَــرعات ..(4

و شباب و آخر أنتكة

متـانجچـين فى إيدين فتيات

عصابات من الأولاد واقفين

و رخامة و هزار و معاكسات

ساعات خناقة تقوم بينهم

و ساعات سخافة و مشاغبات

شاعر بيشعـِـر بربابة

يا ليل يا عينى على الآهات

الأرصفة اتزرعت بالناس

عالم مرصص بالألوفات

هنا نشالين , هنا نصابين وتلات ورقات

جيش شحاتين اتجمعوا

يتعدوا فعلا بالميات

سدّين مسالكنا علينا

رجالة و عيال مع ستات

حسنة يا فندى ربنا

يخلف عليك مليون حسنات

أدّى لـ ده , طيب و ده ؟

دا لسانه بينقـط دعوات

إدّيته شئ .. طيب و انا

باجرى على كومة يتيمات

والدى الكفيف مات و النبى

الفقرزنقـه فطق و مات

والتانى دا ما اترباشى

مش عاجب سيادته عشر بريزات

ينفع بإيه دا و النبى

لحلوح يا لوح

ما عاجبشى ؟

هاته رجعه تانى لصاحبه

دا انت بتتلكك يا أفندى

طيب خلاص معلهشى و هات

فوضى و آخر فشكلة

و الأمن غارق نوم و سبات

و وصلت المقام عند الطاهرة

صليت لى ييجي عشر ركعات

و قعدت أقرا فى مقامها

م الذكر بعض سور و آيات

أصل ف هوى أهل البيت قلبى

هايم و دابت فيه الذات

و فضلت لله أدعى و أدعى

و عيونى مليانة دمعات

و الناس تطوف حول مقامها

حجاج بدون كعبة و عرفات

و اللى بتسجد قدامها

تبوس ثراها و العتبات

و تبوس نحاسها و مقامها

آل إيه ؟ ياعمى دى بركات

و اللى بتكـنس فى مقامها

على واحدة وحشة من الجارات

و تقول يا ستي يا طاهرة

تبقى فى ضهرك يا جمالات

و الست دى قاعدة بتدعى

عايزة عريس للبت زينات

و خرجت للشارع أطلـّــع

قرشين زكا عنى و صدقات

حطيت إيد يّــا ف جيوبى

فى المحفظة رزمة جنيهات

يا نهار أبوكم مش فايت

نشال نشلها و عدى و فات

لو أعرفه أشرب من دمه

و أقطـّـعه ست ترنشات

إزاى يا عالم حأروح ؟؟

!! أدفع منين أجرمواصلات

" اقعد فى ريحى و استنى "

قالها بإخلاص و احد شحات

!!يعنى عاوزنى أقعد أتسول ؟

لو حتى فيه قطع الرقبات

طب خد : دى خمسين قرش بحالها

رماهاتلى واحدة بنت ذوات

صدقة و جات لى من شحات

. و تبت أعود تانى يا بهوات

مصطفى سلام

31 أكتوبر 2006

--------------------

(1) حبة = شوية
(2) خمير شفا = عرقسوس
(3) حلويات = فشة و لحمة راس ..الخ
(4) القرعات = جمع قرعة و هى عبارة عن نصف الغلاف الخارجى لثمرة جوز الهند حيث يستخدم نيابة عن الكأس فى شرب البوظة التى هى نوع من الخمر البلدى المعفن