حاجات كتير

حاجات كتير

حاجات كتير

بيقولواف حياتنا لها تأثير

ما نيش عارف يا صاحبى لها تفسير :

(1)

يعنى الغرام ، إيه لازمته ؟

و السهد و التعذيب ، من توابعه و لازمته

يحلف لها الولهان بدينه و ذمته

غرقان فى هواها صبابة و حبها لشوشته

يرسم لها ع الشجر قلبين ، و السهم شابكهم

فى الحفـْـر أزميله بيبتكر و فى الرسوم ريشته

ردت عليه الغرام

بشوية كلام

سمُو البدن و َسِوّدوا عيشته

آه يانا يا غلبى .

(2)

و نتقابل فى الطريق و ناخد بعض بالأحضان

وسيلة تحية فى الفرح و فى الأحزان

و ياما الأطبا قالو لنا بطلوا أسلوبكم

دى حمى الخنازير واقفة قريِّبـة من بابكم

آه يانا يا غلبى .

(3)

تقول لصاحبك فى ودنه كلمتين

يقول سرك يا صديقى المحترم فى بير

تلاقى سرك فى الصباح على الألسنة

إن كان صغيّر أو كبير

دا السر يا سادة أمانة م الأمانات

و خيانة الأسرار جريمة و إثم خطير

آه يانا يا غلبى .

(4)

شلة من الستات اتجمعوا على غيبة ، أو نميمة

شوفوا فلانة الفلانية : قرشانة و مجرمة و لئيمة

و الا محمود و صاحبته ، و صفية و سامية و كريمة

و لا همهم يوم الحساب و العقاب و الندم ساعتها

قاعدين بياكلوا لحوم البشر كأنهم فى وليمة

آه يانا يا غلبى .

(5)

و صعيدى جاى من بلاده يشرّف المحروسة

فاكرنا ح نقابله بالترحاب و بالأحضان و كام بوسه

يقابله واحد قرندلى أو شلة ْقليّـلة مدسوسة

يهروا جنابه بالنكت و التريقة و يسودوا عيشته

مش على بالهم إنهم بينخروا فى الوطن كما سوسة

آه يانا يا غلبى .

يناير 2009