القمر لما نظر

القمر لما نظر

القمرلما نظر لى بطرف العين
لخبط كيانى ما عدت عارف شمالى من يمين
و نا اللى ماشى فى طريق الهوى فى جوار الحيط
.لا ليا دعوة بعاشق و لا مقتول بالرمش و الحاجبين

قلت لها يا بيضا داانا غلبان و قلبى على قدى
قالت لى أهو انت الضحية اللي مفضلة عندى
و انت القتيل اللى يهوى يدبحك رمشى
.اوعى تقاوم ، دا قدر مقدور، لا هو بيدك و لا بيدى

اسهو عنك يا قلبى دقيقة ، ألقاك يا خيبة .. فى فخها طبيت ؟
لو كنت تعرف طبيعة النسا ، لكنـّـيت مكانك لا رحت و لا جيت .٭
يوم ح تعرف غلطتك و تقول يا ريت اللى جرى ما كان
سلمت أمرى لداعى الهوى و رفعت الإيدين و هويت

قلت لها شئ من الرحمة يا جميلة و أحسنى الذبحة
قالت لى دى نظرة وحيدة من ورا رمشى : نعسانة حليوة ، صابحة
قلت لها قلبى ضعيف ما يستحملشى , قالت لى ماليش دعوة
.توسلت ليها ميتين مرة ، مفيش فايدة , و اتبح صوتى خمسميت بحة

ياللى هويتوا من قبلى .. قولوا لى يا خـُبرا
هل للهوى دوا ؟ .. مصرى أو مستورد من بلاد بره ؟
دَبَحتـْنى وردة جميلة و سابتنى غرقان فى الهوى وحدى
.إن كان فيه علاج فى الهند أو فى الصين : أشد لها الرحال بكره

-*-* *-* *-* *-* *-* *-* *-* *-* *-* *-* *-
٭ كنـّيت : استقريت هادئا فى مكانك
21 يونيو 2008