فى القلب

فى القلب

( أحب و أكره )

حبيت كتير لما انقطع قلبى

و فضلت أشكى و اقول انجدنى يا ربى

البنت ديّـن عيونها عيون غزلان

فضّيت لها فى الفؤاد أجمل الأركان

و السمرا دى ، إيه رأيك يا فلانتينو ؟

فى هواها الفؤاد وقع و اتقندل على عينو

عينى على البيضا

ماشية ف طريقها منورة

تقولشى شمس الأصيل رايقة و متغندرة

:يللا يا جميلة ادخلى لسه القلب فيه حتة صغيّرة

اللى هناك دى بدر تقول للنجوم : يللا اتطرقى قومى

محفوظ مكانك يا جميلة ف مهجتى ، لا تزعلى ولا تلومى

ماشى يحب و كإنه الولد بيقش .. أوكإنه سبعتين كومى

و يقول أنا عايش يا دوب ساعتى و لحظتى و يومى

إن كان فؤادك صحيح فى الهوى و الغرام راغب

ما تبصش لفوق قوى ، دى العين ما تعلاشى على الحاجب

إوعك تسيب قلبك فى الهوى يتقلب يمين حبة و حبة شمال

ح تبص فى الآخر لا تلقى لك حبيب أو خل أو صاحب

لكن ما زال فى القلب حتة صغيّرة دافية

شايلها لحب الخير لكل الناس ، و الصحة و العافية

مش بس حب الجمال ، دا حب الحق أعظم منزلة و أعلا

و حب الخير طبيب للنفوس و أدوية فعّـالة وْكمان شافية

- - - - - - - - - - - - - - - - - -

ملــّيت أنا م الهوى و زهقت برضه من الغرام

عرضت الفؤاد للبيع ، قالوا لى تبيعه يا ترى بكام ؟

أقول لكو الحق ؟ صُعب علىّ و قلت خلليه أهو مخزن

يعشش حبايبك فيه ، و يزيدوا كمان إن أمكن

خربان صحيح و حاله : يا قلبى لا تحزن

أنا قلت أغيّر و أبدِّل بالحب حبة كـُـره .. أو حبتين

و اشوف هل يساعهم فؤادى الحزين مع بعضهم الاتنين

الحب ، و عرفنا : ح احب الفل و الياسمين

و الكره ؟ .. مين أكرهه يا ترى فى الورى ، و أمقت مين ؟

أكره مستبد اتغـر بالدنيا و بالقوة

دى الدنيا بتجرى وراه النهارده

بكره حيجرى وراها هـّوه

اليوم دا جاى بالضرورة : على مهله أو على سهوة

أكره صبية على وشها .. كيلوين مكياج

(تقولشى فنانة رايحة مهرجان جرش أو مهرجان قرطاج (1

أكره ولد صايع و واقف يعاكس فى بنات الناس

لا ذوق أو أدب و لا أى ذرة من الإحساس

(2)و التانى واقف يزعّق ف أبوه و يتنرفز عليه و يبوّق

نفسى أضربه قلمين ، لكين الضرب لا يفيد و لا يْحوّق

أكره منافق يؤلف قصايد مدح فى وشك

و ينتف فروتك ف غيابك و يدبحك و يغشك

و اكره عديم الأصل واطى يخون صاحبه

اللى معاه كان سره و كان جده و كان لعبه

(كِيفْ ما فعل بدران فى صديقه الحميم أدهم (3

قتل أخوه و لم تدمع عليه عيونه و لم يندم

أكره جماعة بشر بيتزاحموا كلهم و بيجروا

عايزين يلحقوا مكان يقعدوا فيه داخل المترو

و الشاب قاعد فى أماكن كبار السن و العجزة

و جدو قدامه واقف ملخلخ يصعب عليك أمره

أكره عربجى بيتعامل بكرباجه مع حماره

وكإنه عدو صهيونى بينتقم منه ، و ياخد م البعيد تاره

و هوّه وسيلة الرزق ، لو يرقد ما يلاقيش اللقمة

دا حماره أقرب إليه من أبوه ، و ابنه ، و حتى من جاره

:الكـُـره كلمة يسمعها رجالة و ستات

تكشر و تقعد مرجوفة كتير قوى وخايفة

(3) دا الحب و الكره كلمتين أصلها واحد و متـْلازمة و متـْضايفة

تدوق مرارة الكره إلا و الهوى مشعلل

بناره الوالعة فى قلبك

دى الدنيا – لو كلها حب و بس – تبقى صحيح هايفة
________________________________
(1) مهرجان جرش فى الأردن , و مهرجان قرطاج فى تونس
(2) يبوّق: يعلى صوته بقلة أدب
(3) إشارة إلى ملحمة أدهم الشرقاوى
(4) أصلها واحد و هو القلب ، فالحب و الكره فى القلب
لفظين متضايفين : لا يفهم أحدهما إلا بمقارنته بالآخر


1 أبريل 2009