إيه فايدة صيامك ؟
إوعك تكون فاكر صيامك فضل و عبادة
دا انت صيامك تقاليد و موروثة بالعادة
إن لم تصون اللسان عن الشر و تصده
و تلجـّـمه بلجام الخير بقوة و عزيمة و إرادة
يبقى صيامك فايدته إيه ؟
ماشى مكلضم مشلضم تعاكس فى دبّـان وشك
و تتخانق مع الخلايق و تتشاكل معاهم و تتمحك
رافع دماغك م الزهق و شامخ بطرطوفة مناخيرك
و تقول اعذرونى دا انا صايم يا عالم بدون شك
يبقى صيامك فايدته إيه ؟
و ف شغلك مكسل و خملان و نايم على المكتب
تحلم بالكنافة و القطايف و كباية عصير و كاس سحلب
و طظ ف مصالح خلايق ربنا ، يغوروا ف ستميت داهية
و تقول كفاية انى أنا صايم و الصوم عبادة عليها الرك
يبقى صيامك فايدته إيه ؟
دا الصوم عبادة بتدفع للعمل و تعلم جميل الصبر
عبادة مخصوص بها ربنا بينكم فى العلن و السر
عبادة كتبها علينا ربنا زى الأمم من قبل
يرفع بها ربنا مقام الصائمين و يعلـّى لهم فى القـَـدْر
تقدر تقوللى صيامك فايدته إيه ؟
صايم و ييجى ميعاد الصلا ، تخطفها خطف قرود
تقيلة على قلبك ، و لا تحافظ على المواعيد
هوّه انت مش عارف إنها على المؤمن كتاب موقوت ؟
أصل العبادة كلها يا مسلم عايزة إرادة و عزم شديد
يبقى صيامك فايدته إيه ؟
ليه بسّى تتنازل عن ثوابه ؟ .. تقدر تقوللى ليه ؟
دا شهر ربك عظـّمه وْ بارك فى أيامه و لياليه
تتصفد الشياطين و تتقفل أبواب الجحيم فيه
يا بخت مين يكسب مغفرة ربنا و رضا المولى عليه
28 أغسطس 2009
No comments:
Post a Comment