الغـُلب

الغـُلب

(صور مصرية مقلوبة )

عجبى على ابن مصر الصابر على الأوجاع
راضى وحامد و شاكر، سوا كان شبع أو جاع
ماشى فى درا حيطة يقول الستر يا ربى
( يحكمه فرعون ، يعبده ، أوأى عـرّة من الصياع .(1

مغلوب على أمره غالبا فى كافة الأوضاع
يسجد لجلاده و لا يهمه لقى بـُغيته أو ضاع
حتى الشهامة اللى كانت خصلته وْ زاده و زُوًًًًًًّاده
ضاعت بسوط القهر.. ماعادشى كريم شهم وبطل و شجاع
---------------------

البنت يخطفها الذئاب فى عز الضهر عينى عينك
تصرخ ، تولول ، و تستنتجد : يا كريم العنصرين فينك
الكل باصص يبحلق يقولك يا عم و انا مالى
.دافع يا مصرى عن مروءتك ، وعن عرضك وعن دينك
---------------------

كنا زمان ، لما بنركب الأوتوبيس
يقف الشباب الجميل و يقعّـدوا العواجيز
فين النهارده الأدب و الذوق ؟ ضاعوا مع الأيام
كانوا شباب مصر العظيمة و القلوب متفجرة أحاسيس





---------------------

فلاحنا كان يصحى من النجمة ، يجرى على عمله
و الصانع المصرى اللى كانت صنعته منتهى أمله
الدش خيب شعبنا و الليل قهاوى الكسلانين
ممكن يا مصرى نعود نحقق من جديد للوطن أمله ؟
---------------------

كنا زمان نوطى وننـْحنى نـْبوس إيد الكبير
هل كنت تقعد قبل منـّه ؟ أبدا ، مستحيل دا يصير
و لا إيد على الطبق تتمد من قبل ما يقول لنا بسملله
. و العيلة مجموع شملها على خير كتير و وفير
---------------------

عبد النبى و وهيبة خلفوا محمود
عيـّـل جميل الطلعة ، زيه ملوهش وجود
مرض الولد بعنيه ، إيه العمل يا وهيبة
. الواد دا يا عبده و راس أبوك محسود

جريت على الشيخ الولى الصالح عماد الدين
شخبط لها شخابيط ، قال إيه حجاب يشفيه م الحسد والعين
جاهل و هبلة جمعهم ضلام العقل و الغفلة
. عكم التمن هبرة فلوس ، و رزق الهبل ع المجانين

فكرتنى حكاية الولد ده بطه حسين
و الجهل اللى ضيع عينيه – مش بس واحدة – إنما الاتنين
أو يحيى بن حقى ..... وقنديل ام هاشم
. دا الجهل عيبة و معيرة فينا يا مصريين
-------------------

تقدر تقوللى النهارده شربت كام سييجاره ؟
اللى واخدها كيف أو منظرة و شطارة
بعدين ح تندم و تصرخ ، تولول : يانا يا صدرى
.و لا طب راح ينفعك أو صيدلة ، يا خسارتك ، يا ألف خسارة

البنت ماشية وْ حبيبها متأنجـﭽين حلوين
النيل بيضحك لهم و الفل و الياسمين
لمحهم أخوها ، قامت خناقة بين الاتنين
ناس كتير اتجمعت وقفت بتتفرج حيرانة : تشجع مين ؟

بقينا فى أخلاقنا يا مصرى من غيرخطوط حمرا
فين الصواب ، فين الخطأ ؟ لا بنعرف و لا بندرى
حبة يقولوا دا حق للعشاق ، و طظ فى التقاليد
.و الباقى قالوا دى فـُجْر و عربدة ، ملعون أبو الفـَـجًًًًًًًرة
-------------------

شحات و داير فى الشوارع : حسنة يا أسيادنا
دا الرزق مقدور من المولى ، لا شطارة و لا بْإيدنا
مات الفقير، راحت الحكومة مفتشة داره
.قعدوا ساعات يعدّو المال ، ضحك علينا و على ولادنا
-------------------

أجمل ما فيك إيمان و تقوى و توكل
و صبر ع المقسوم و على العبادة مقبل
و حب الرسول و أهله و عترته و أصحابه
.لكن كتير عندك تواكل و محبط كتير و مكسل
-------------------

ماشى ف طريقى فى الزحام ، أخدت لى كتفين
تولونى
وقعت مش عارف هـّوه طريقى منين
و لا حد قدم لى اعتذار و لا حد قال معلهش
هيه المروءة سابت بلدنا يا مصرى و راحت فين ؟
------------------

دى كلها صور سودا مقلوبة من عصر الزحام
بس الأمل موجود و قايم فى قادم الأيام
يللا إيدينا سوا نرفع مصرنا فى السما عالية
.بالعلم و الإيمان فى بحبحة ح نعيش سوا فى سلام

_______________________
(1) توالت على مصر عدة قرون حكمها خلالها أصيع ناس فى العالم : المماليك
20 مايو 2008