الحلو ما يكملش

الحلو ما يكملشى

ليه بسّى يا حلوة يقولوا الحلو ما بيكملشى
قاعد أدور على عيب فيكى , فى الحقيقة : أنا ما لقيتشى
يبقى المثل يا حلوة الحلوين : كذاب فى أصله ، و ما بيُصْدُقشى
.مش كل ما حفظه الزمان من الأمثال ، مظبوط و ما بيكدبشى

بصيت فى عينها لقيتنى مسحوب و متجرجر على وشى
قالت ليه التهور يا جدع ، ما خفتش يدبحك رمشى ؟
أو أقول بيتحرش بالقمر ياخدوك على قاضى ما بيرحمشى
.احمد ع السلامة ربنا و قوم ، يللا اتكل و امشى

يا حلوة مرأى الجمال مشروع ، لا هو عيبة و ما حْرُمشى
:قالت لى ياللى انت واقع فى الهوى ، روّح
.قلتلها على قلبك ؟ .. قالت لى ما يحكمشى

ليه الجمال بالحرام حاوطوه ، لا يظهر و لا يبانشى ؟
.أما الوحاشة ، فمقق عينيك بالنظر ، لا مانع ، و لا تخافشى

11 نوفمبر 2008