دوا الحب

دوا الحب

يا للى انت بتشكى م الهوى

و تقول فؤادك منه داب و انكوى

عمال تصوّت و تبكى تقول : يا لهوتى

إلحقونى بأسبرينة

بمضاد حيوى

أو أيتها دوا

مفيشى فايدة من الشكوى و الطنطنة

دا الحب أصله من الأمراض المتـْـوطنة

:يسكن قلوبنا و يتمكن و لا نقدر عليه

لا انت و لا أنا

عايز له دوا ؟ .. سبقتك أنا على العطار

إدانى (مقطف ) من الأعشاب و قال لى ده دوا جبار

و رحت أدور على ( مولانا ) – كتب لى حجاب

"تحطه تحت مخدتك ح تلقى الهوى اتبعزق و ولى و طار"

و لا فايدة شفتها و لا أية نتائج تذكر

رحت لطبيب القلب ، ضحك عليا و كركر

" دا الحب " عَـلــَقة " بتمسك فى البطين و الأذين الأيسر

.مُر أحيانا ، لكن حلاوته ع العموم أكتر

شيخ العرب قال لى يلزمك يا ولدى حجامة

يمشى بعدها قلبك ع الصراط مظبوط وآخر إستقامة

،قلت آهى تجربة و تعدى ، يمكن ألاقى الشفا

وقعت دايخ خدونى للطبيب

فرفرت قدامه كما فردة حمامة

معلهشى يا صاحبى : دا الرضا بالمر و الحلو أحيانا ْ

يهوِّن علينا المصايب فى الحياة .. اللى بالهموم مليانه

اوعى تتعالج من الهوى ، طعم الحياة فى الفؤاد يبهت

.و علاجك جرعة زيادة م الهوى عليها جنزبيلة و حبهانة

رد على الأستاذ حسن عبد الحليم بمنتدى أبناء مصر

13 مارس 2009