كلمتين و سجن

كلمتين و سجن

قالوا لى وقعتك سودا ، حتتحاكم أمام قاضى

يحكم بأقصى العقوبة عليك .. قلت لهم أنا راضى

مادام بالعدل أحكامه وْ قراراته

. و نا راجل لا مستقبل ليا و لا ماضى

مفيشى عندى حديد ، صلب ، احتكرته و لا أسمنت

و لا فيللا ف مرينا و لا بعت البلد و لا خصخت

و لا الكرامة أذليتها لأمريكا فى العلن و السر

و الغاز ما بعته لإسرائيل بالخسارة وأبخس سعر

و لا هرّبت آثاربمعرفتى و لا كوكايين ، و لا عملة

و لا خنت وطنى و لا كنت أبدا فى زمرة العملا

ولا اعرفشى غير كلمتين فلسفة وشوية نحو على إملا

ولا بصيت و لا قرّيت على اسيادنا و أحبابى

ولا متهوم فى يوم أغبر بأنى وحش إرهابى

ولا سرقتش ف يوم م السد كابلاته

و لا حرقتش بماس كهربا مجلس و قاعاته

ولا سكة حديد سرقت ف يوم فلنكاتها

ولا رددتش مع الناس التريقة و نكاتها

حتى الغلابة فى الدويقة ما أهملتش مصالحهم

لحد الجبل ما وقع فجريت عليهم أصالحهم

و لا جبت أكياس دم لوثتها و لا عندى عبّـارة

و لا هبشت من البنوك مليار و لا مليم و لا بارة

و لا فيللا اترشيت بيها على الساحل فى طريق مطروح

. بالعكس دى اللقمة بكسبها بعرقى ، و بطالع الروح

بقى يعنى همه كلمتين قلتهم ياخدونى لمحاكمة ؟

. كويس إنهم متمرنوش فيا ماتشين ملاكمة

مشكلتى إنى مبعرفشى أقول كلمة نفاق أو كذب

علشان ملياشى مطمع فى الوزارة أو أمانة الحزب

مشكلتى لما اشوف الأمور أقول دا غلط و دا صح

قالوا لى قول كلمتين للى فوق يرفعوك

. قلت لهم : خلص الكلام ، بح

11 سبتمبر 2008