العـَـدَل

العَــدَل

قاعدة و حاطة إيديها ع الخدين
مستنظرة العـَدَل : يا ترى ح ييجى منين ؟
م الدلتا أو م الصعيد ؟ .. من سينا أو مطروح ؟
أو من حلايب ح ييجى فارسها أو شلاتين ؟
:من بحرى أو من قبلى ، مش ديّـا القضية
:ييجى من مطرح ما ييجى .. لكن بشرط
: ما يكونش م المنوفية

ييجى يقول لها لبـّيت نداكِ أنا يا اْمـّه
عديت فى طريقى الموانع و الظلم و الضلمة
جايلك و روحى على كفى و الأمل فى قلبى
و حلفت لانزع من فؤادك كل بؤس وغـُـمة

مش راح يكون من جديد الناصر صلاح الدين
(لأ .. دا عمر : العدل و القوة و الصلاح و الدين ..(1
دا الصابرة قاست كتير : ظلم وهزايم ، فقرو مهانة
.كل الخلايا ف جسدها ملاها اللصوص و القهر و الفاسْدين

إمتى يا فارس ح تيجى ؟ .. دا الكيل اتملا و اتدلدق
و الأسى ملا القلوب : بقى هيه دى الكنانة يا جدع ؟ .... لأ
كانت منارة علــّمت كل البشر سر الحضارة و الملكوت ؟
.الحق يا راجل حبيبتك .. دا الشعب قـرّب ينفلق و يطق

قاعدة تهاتى ، تنادى : يا ضناى الحقنى
دا الجهل ضارب فى قلبى و الخيانة راح تخنقنى
و لا حد سائل فى خيبتى ، و لا شهم قام ينقذنى
.و غرقت فى بحر الفساد المر من ساسى إلى دقنى

إلحق يا ولدى ، دا انا وسطى انقطم وازداد الألم و جروحى
يوم من بعد يوم بتدهور صحتى وْ ح تطلع للسما روحى
و لا حد من أهلى يهمه الأمر : لا حاكم و لا محكوم
.بادعى يا ولدى - يجيبك ربنا – فى سرى و فى بوحى

شاطرين يغنوا ف كل عيد : " اسلمى يا أمى
"دا انتِ الحياة و الروح اللى بتجرى فى دمى
(و لا شايفة منهم يا ضناى غير جزاء سنمار ..(2
.و ادينى قاعدة أولول ، ح اموت بحسرتى و بهمى

أولادى لما اتحكموا .. أنا قلت بركة و خير
أهو أحسن كتير من حكومة يسوقها الغير
اتجبروا و اتحكموا ف شعبهم بالحديد و النار
أكلوا فى خيرى و سابوا لشعبهم فتافيت
.قال المثل : لو إن فيها الخير، ما كان رماها الطير

20 أكتوبر 2008
--------------------
(1) المقصود أن الفارس القادم سيكون شبيها بعمر بن الخطاب : مثال القوة و العدل
(2) سنمار : رجل رومى بنى قصرا عجيبا للملك النعمان – من ملوك العرب فى الجاهلية – و كان جزاؤه أن أمر به النعمان فألقى من فوق القصر فقتل حتى لا يبنى مثله أو لا يتسبب فى هدمه – و من هنا كان المثل العربى الذى يضرب لمقابلة العمل الحسن بالجزاء السئ


.