قلبى و الهوى

قلبى و الهوى

ركبت موجة زمن سافرت على الماضى

أتارى كان لى زمان قلب ، رايق عفى و فاضى

لا فيه غزالة هزته و لآ هوى هده

. دلوقتى قاعد أرمم فى نفسى و ألـِـّــم أنقاضى

الغصن كان أخضرمزهزه و متخنصر بالورود

و الحلم كان أجمل و أروع كتير منه الوجود

عصفور يغنى ع الغصين ، و القلب بيردد غناه

. ولا آه يا ليل و لا آه يا عين ، و الكل فرحان بالحياه

الدنيا ناسية طبعها ، و جمالها زايد ، طاب لنا

آدى رقصنا ، و آدى زمرنا ، و آدى طبلنا

أبعت بضحكة للأثير يحملها لأعماق المدى

دلوقتى ضحكى بينتهى حتى قبل ما يـبتدا

عينى عليك ، إيه جرا لك ، إيشى صار

حطت عليك كبشة علل ، و الهم بالليل والنهار

الشُعرا ياما اشتكوا م الشيبة وْ همها و كومة متاعب

إوعى يغرك شبابك سِوا كنت راجل عفى أو بنت كاعب

إسأل مجرب يا فتى ، طغى و افترى أيام شبابه

النهارده تعالى شوفه و الهموم واقفة ببابه

. عينى عليه ، إيه دا جرا له و إيشى نابُه

1 فبراير 2008